Fakamatalaaga 7:1-29
7 KUA mua e mitaki he talahaua mitaki ke he puke lolo mitaki; mo e aho ka mate ai kua mua he mitaki ia ke he aho ne fanau ai.
2 Kua mua he mitaki he fano ke he fale kua tagi ai, ke he fano ke he fale kua eke ai e galue; ha ko e fakahikuaga he tau tagata oti haia; kua manatu ai foki e tagata moui ke he hana loto.
3 Kua mua he mitaki e mamahi he loto ke he kata, ha ko e maanu ai he mata kua mitaki ai e loto.
4 Ko e loto he tagata iloilo ha ha i ai ke he fale ne tagi ai e tau tagata; ka ko e loto he tagata goagoa ha ha he fale ne olioli ai haia.
5 Kua mua e mitaki he fanogonogo ke he akonakiaga he tagata iloilo, ke he fanogonogo he tagata ke he lologo he tagata goagoa.
6 Ko e mena tuga ne patapatakā he tau akau mahukihuki ki lalo he ulo, kua pihia e kata he tagata goagoa; ko e mena fakateaga foki ia.
7 Ko e favale ke moua ai e tau mena kua fakagoagoa ai ni e tagata iloilo; ko e mena foaki noa foki kua kelea ai e loto.
8 Kua mua e mitaki e fakahikuaga he mena ke he hana kamataaga; kua mua e mitaki he tagata kua fakauka kia ia kua loto fakatokoluga.
9 Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.
10 Ua pehe a koe, Ko e heigoa e mena ne mua e mitaki he tau aho fakamua ke he tau aho nai? he nakai ko e iloilo ne huhu ai a koe ke he tau mena ia.
11 Kua mitaki e iloilo tuga ne tufaaga, kua homo atu foki hana aoga kia lautolu kua kitekite atu he lā;
12 Ha kua eke e iloilo mo mena ke malu ai, kua eke foki e tau tupe mo mena ke malu ai; ka ko e aoga he iloilo kua moua, kua moui ai a ia ne toka ai.
13 Kia manamanatu a ke he gahua he Atua; ha kua maeke kia hai he fakahako e mena ne fakakeu ai a ia?
14 Kia fiafia a ke he aho ke monuina ai, ti manamanatu foki ke he aho ke malaia ai; kua tuku fakafehagai he Atua ko e taha ke he taha, kia nakai iloa he tagata e mena ke tupu ai ka mole atu a ia.
15 Kua kitia e au e tau mena oti nai ke he tau aho he haku a mahani fakateaga nai; ko e tagata tututonu to mate a ia mo e hana mahani tututonu; ko e tagata mahani kelea foki to moui leva a ia mo e hana mahani kelea.
16 Aua neke tututonu a koe ke lahi ue atu, ti ua fakalahi e koe hāu a iloilo ke lahi ue atu; ke tamate e koe a koe he ha?
17 Aua neke mahani kelea a koe ke lahi ue atu, ti ua goagoa a koe; ke mate he ha a koe ka e nakaila hoko ke he hāu a vaha?
18 Kua mitaki ke taofi ai e koe e mena nai, ua uta kehe foki e koe hāu a lima he mena na; ha ko ia kua matakutaku ke he Atua, to hao ai a ia he tau mena oti.
19 Ko e iloilo ne mua e malolo he tagata iloilo, ke he tau pule tokohogofulu ha ha he maga.
20 Nakai ni ha ha i ai ha tagata tututonu ke he lalolagi, kua eke e mahani mitaki, mo e nakai hala a ia.
21 Aua neke hagao atu a koe ke he tau kupu oti kua vagahau mai; neke logona ai e koe hāu a fekafekau kua kaialu kia koe;
22 Ha kua fa iloa foki he loto hāu, ko koe ni kua kaialu atu ke he falu.
23 Kua kamatamata e au mo e iloilo e tau mena oti na; ne pehe hifo au, Ko e iloilo ha ne fai au; ka e mamao ni a ia ia au.
24 Ko e tau mena ha ha i ai kua mamao ia mo e hokulo mahaki ni, kua maeke kia hai ke iloa?
25 Ne hagao atu au mo e loto haku ke iloa, mo e kumi, mo e huhu ke he iloilo mo e alito he tau mena, ke iloa foki ko e mahani kelea ko e goagoa haia, mo e mahani goagoa ko e heketia haia;
26 Ne kitia foki e au kua tote e mamahi he mate, ka e lahi ni e mamahi ha ko e fifine kua eke hana loto mo tau hele mo tau kupega foki, mo e eke hana tau lima mo tau liliaga; ko ia kua mitaki ki mua he Atua, to hao a ia ia ia; ka to moua e ia a ia kua hala.
27 Kua pehe mai a ia kua fakamatala kupu, Kikite mai a, kua kitia e au e tau mena nai ke he haku a fakalata he taha ke he taha, ke iloa ai e kakano he tau mena;
28 Kua kumi agaia ni e au, ka e nakai kitia; ko e taane tokotaha ke he tokoafe ne moua ai e au; ka ko e fifine ke he tokologa pihia nakai ni moua ai e au.
29 Kitiala, ko e mena nai hokoia kua kitia e au, ne eke he Atua e tagata ko e tututonu, ka ko lautolu, kua kumi e lautolu e tau lagatau loga.