Fakamatalaaga 9:1-18
9 NE manamanatu au ke he haku loto ke he tau mena oti nai, ke kumi fakamakutu foki e tau mena oti nai; ha ha he lima he Atua e tau tagata tututonu, mo e tau tagata iloilo katoa mo e tau gahua ha lautolu; nakai iloa foki he tagata, po ke fakaalofa po ke ita; ha ha i mua ha lautolu e tau mena oti.
2 Kua hohoko fakatatai e tau mena oti ke he tau tagata oti; ko e taha ni e mena kua hoko ke he tagata tututonu mo e tau tagata mahani kelea; kia lautolu ne mahani mitaki, ko lautolu foki kua meā mo lautolu nakai meā, ko lautolu kua eke poa, mo lautolu nakai eke poa; tuga he hoko ke he tagata mahani mitaki, kua hoko pihia foki ke he tagata hala; tuga he hoko ke he tagata kua eke e omonuo, kua hoko pihia foki ke he tagata kua matakutaku ke he omonuo.
3 Ko e mena kelea hanai ke he tau mena oti kua eke i lalo he lā, ko e mena taha kua hoko ke he tau tagata oti; kua puke foki e tau loto he tau tagata oti ke he kelea, ha ha i ai foki e goagoa ke he tau loto ha lautolu he momoui a lautolu; kua mole atu foki ia kua o atu a lautolu kia lautolu kua mamate.
4 Ha ko ia kua fakalataha mo lautolu oti kua momoui, ha ha ia ia e amaamanaki; ha kua mua he mitaki e kuli kua moui ke he leona ne mate.
5 Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena, to nakai tuai fai taui a lautolu; ha kua nimo ni a lautolu.
6 Ko e fakaalofa foki ha lautolu, mo e ha lautolu a ita, mo e ha lautolu a mahekeheke, kua mole atu ia; to nakai tuai fai tufaaga tukulagi a lautolu ke he tau mena oti kua eke i lalo he lā.
7 Kia fano a a koe, kia kai a hāu a tau mena kai mo e olioli, kia inu foki hāu a uaina mo e loto fiafia; ha kua fiafia tuai e Atua ke he hāu a tau gahua.
8 Kia hina mau hāu a tau tapulu; aua neke noa foki hāu a ulu mo e puke lolo.
9 Kia fiafia a koe ke he hāu a moui fakalataha mo e hoana hāu kua fakaalofa a koe ki ai, he tau aho oti he hāu a moui fakateaga, kua foaki atu he Atua kia koe i lalo he lā, ko e hāu a tau aho fakateaga oti; ha ko e hāu a tufaaga ke he mouiaga nai haia mo e hāu a tau gahua ne gahua ai a koe i lalo he la.
10 Ko e tau mena oti kua iloa he tau lima hāu ke eke, kia eke a mo e hāu a malolo; ha kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.
11 Ne liu foki kitia e au i lalo he lā, nakai ko e tau mafiti ne eke mo matakai ke he poitufi, nakai ko e tau tagata malolo ne kautu ai ke he tau, nakai ha ha i ai foki e tau mena kai ke he tau tagata iloilo, ti nakai ha ha i ai e koloa ke he tau tagata pulotu, nakai ko e tau tufuga foki kua ofania; ka ko e vaha mo e tau mena ke tutupu ai kua hoko ia kia lautolu oti.
12 Ko e mena nakai iloa foki he tagata hana vaha; tuga he moua e tau ika ke he kupega kua kelea ai, tuga he moua foki e tau manu lele ke he matahele; kua tauhele pihia foki e tau tagata ke he vaha kelea, ka hoko fakalatukia mai ai kia lautolu.
13 Kua kitia foki e au e iloilo nai i lalo he lā, kua lahi foki ia ke he haku a manatu;
14 Ko e taha maga tote, ko e tokogahoa foki e tau tagata kua nonofo ai; kua fina atu foki ki ai e patuiki lahi, ti pa takai ai e ia, ti eke foki e ia e tau taue lalahi kua fakafehagai mo ia;
15 Ne moua ai foki taha tagata nofogati, ka e iloilo ni a ia, ti laveaki e ia e maga ke he hana iloilo; ka e nakai fai tagata ne manatu ai ke he tagata nofogati na.
16 Ti pehe hifo au, Kua mua he mitaki e iloilo ke he malolo; ka e vihiatia e iloilo he tagata nofogati, ti nakai fanogonogo foki ke he hana tau kupu.
17 Kua mua he fanogonogo ke he tau kupu he tau tagata iloilo kua vagahau fakatekiteki, ke he fanogonogo ke he fakatutu hana kua eke mo pule ke he tau tagata goagoa.
18 Kua mua he mitaki e iloilo ke he tau kanavaakau ke tau ai; ka e moumou he tagata hala tokotaha e tau mena mitaki loga.