Filipi 1:1-30
1 KO au ko Paulo katoa mo Timoteo, ko e tau fekafekau a lesu Keriso, ko e tohi hanai ha maua ke he tau tagata tapu oti ha ha ia Keriso Iesu, ko lautolu kua nonofo i Filipi, katoa mo e tau epikopo mo e tau tiakono;
2 Kia ha ia mutolu e fakaalofa noa, mo e monuina mai he Atua ko e Matua ha tautolu, katoa mo e Iki ko Iesu Keriso.
3 Kua fakaaue atu au ke he Atua haku, ke he haku a tau manatu oti kia mutolu.
4 Nakai noa haku a ole mo e fiafia ha ko mutolu oti kana ke he haku a tau liogi oti,
5 Ha ko e ha mutolu a fakafetui fakalataha ke he tau mena he vagahau mitaki, tali mai he aho fakamua, kua hoko mai ke he vaha nai;
6 Kua iloa tonuhia e au e mena nai, ko ia ne kamata ai e gahua mitaki ki loto ia mutolu, to fakakatoatoa ai e ia ke hoko atu ke he aho a Iesu Keriso;
7 Pihia foki e lata he manamanatu e au ke he mena nai kia mutolu oti kana, ha ko e mena ha i ai a mutolu ke he haku a loto ke he haku a liliaga nai mo e haku a fakatonu atu katoa mo e haku a fakamoli ke he vagahau mitaki, kua igatia a mutolu oti fakalataha mo au ke he fakaalofa noa ha ha ia au.
8 Ha ko e mena kua fioia mai he Atua au, kua manako lahi au kia mutolu oti kana ke he fakaalofa hofihofi noa a Iesu Keriso.
9 Ko e haku a liogi hanai, kia fakatupu lahi ue atu ha mutolu a fakaalofa, mo e maama, katoa mo e loto matala oti kana.
10 Kia mailoga ai e mutolu e tau mena kehekehe, kia fakamoli a mutolu mo e nakai totoku fakakelea e taha a mutolu ka hoko ke he aho a Keriso.
11 Kia puke a mutolu ke he tau fua he mahani tututonu mai ia Iesu Keriso, ke tupu ai e fakaheke mo e fakaaue ke he Atua.
12 Ko e tau matakainaga na e, kua manako au kia iloa e mutolu, ko e tau mena ne hohoko kia au, kua tupu lahi ai e vagahau mitaki.
13 Ko e mena ia kua fakakite ai ia Keriso haku a tau liliaga ke he fale oti he kau leoleo, katoa foki mo e tau faoa oti;
14 Ko e tokologa foki e tau matakainaga ha ha he Iki, kua fakamanavalahi a lautolu ha ko e tau liliaga haku, kua au atu ai he fakamalolo ke talahau atu e kupu mo e nakai matakutaku.
15 Ko e falu kua fakamatala atu a Keriso mo e mahekeheke ni, mo e fetoko mai; ka ko e falu kua fakamatala mo e loto mitaki.
16 Ko lautolu kua fakamatala atu a Keriso mo e fetoko, nakai eke mo e fakamoli a lautolu, kua manatu a lautolu ke lafi age ai e matematekelea ke he tau liliaga haku.
17 Ka ko lautolu kua fakamatala atu mo e fakaalofa, kua iloa e lautolu kua kotofa au ke fakatonu atu e vagahau mitaki.
18 Ti kua fefe kia? ko e tau lagatau oti, po ke eke fakatupua, po ke eke mo e fakamoli, kua fakamatala atu ai a Keriso; ko e mena ia kua fiafia ai au, ko e moli to fiafia ai ni au.
19 Ha ko e mena kua iloa e au to tupu ai haku a monuina ke he mena ia, ha ko e ole ha mutolu, mo e lagomatai mai he Agaga a Iesu Keriso;
20 Tuga haku a fakaneinei mo e amaamanaki, kia nakai fai mena ke ma ai au, ka kia fakamalolo au, tuga ne mena kua eke e au nakai noa, ti pihia foki ainei, kia fakaheke ai a Keriso ke he haku a tino, po ke moui, po ke mate.
21 Ha ko e haku a moui ha ha ia Keriso ia; ka ko e mate, ko e haku a mena kua moua haia,
22 Kaeke ke moui au ke he tino, ti ko e fua ia kia au he haku a gahua; kua nakai iloa ai e au po ke mena fe ke fifili e au.
23 Ha kua fakauaua haku a loto ke he ua a manatu; ha ha ia au e manako kia vevete au, ke fakalataha au mo Keriso; ha ko e mena ia kua mua ue atu e mitaki.
24 Ka nofo mau au ke he tino, kua mua he aoga ia kia mutolu.
25 Kua iloa tonuhia foki e au e mena nai, to tumau au, mo e nonofo mau fakalataha a tautolu oti, kia mafiti a mutolu, mo e fiafia ke he tua;
26 Kia tupu lahi ai ha mutolu a hula kia Keriso Iesu ha ko au ke he haku a liu atu kia mutolu.
27 Ko e taha mena hokoia, kia lata e tau mahani ha mutolu mo e vagahau mitaki kia Keriso, po ke fina atu au mo e feleveia mo mutolu po ke nofo kehe au, kia fanogonogo au ke he tala kia mutolu, kua tumau a mutolu mo e loto fakalataha, mo e manatu fakalataha, mo e fakamakamaka fakalataha ha ko e tua ha he vagahau mitaki.
28 Kua nakai fakamatakutaku foki a mutolu ka he taha mena e lautolu kua totoko mai; ha ko e fakamailoga ia he malaia kia lautolu; ka ko e fakamailoga he moui kia mutolu, mai he Atua foki a ia.
29 Ha ko e mena kua foaki mai kia mutolu, ha ko Keriso, nakai ko e tua kia ia hokoia, ka kia mamahi foki a mutolu ha ko ia.
30 Ha ha ia mutolu foki e tau ia, tuga he kitekite a mutolu ha ia au, kua fanogonogo nei foki ha ha ia au.