Filipi 2:1-30
2 HANEI, kaeke kua toka ai ia Keriso ha tomatoma kaeke kua toka ai ha fakamafana ke he fakaalofa, kaeke kua toka ai e fakafetui mo e Agaga, kaeke kua toka ai e hofihofi noa mo e loto fakaalofa,
2 Kia fakakatoa e mutolu haku a fiafia, kia fakalataha e tau manatu ha mutolu, kia fakaalofa fakalataha, mo e loto fakalataha mo e manamanatu ke he mena taha;
3 Aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo kua mua e faoa oti kia ia;
4 Aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.
5 Kia toka foki ia mutolu e manatu ia ne toka ai ia Keriso Iesu,
6 Ko ia ne mahani fakalataha mo e Atua, nakai manatu a ia ko e fofo mena ke fakataufata a ia mo e Atua;
7 Ka kua fakatokolalo e ia a ia, ne mahani a ia fakalataha mo e tupa, nukua eke a ia tuga ne tagata;
8 Ne kitia foki a ia kua tino mai po ke tagata, ne fakatokolalo e ia a ia, ne oma e ia kua hoko ke he mate, ko e mate haia he satauro.
9 Ko e mena foki ia kua fakamatalahi ai he Atua a ia, mo e foaki atu ai kia ia e higoa kua mua ke he tau higoa oti kana;
10 Kia fakatokotui e tau tulihui oti kana ke he higoa a Iesu, ko lautolu ha ha he lagi, mo lautolu ha ha he lalolagi, mo lautolu ki lalo he lalolagi;
11 Kia tokutoku atu foki he tau alelo oti, ko Iesu Keriso ko e Iki a ia, ke tupu ai e fakaheke ke he Atua e Matua.
12 Hanai, ko e haku a tau fakahele na e, tuga ne omaoma e mutolu nakai noa, nakai kuenaia ke he vaha ne nonofo fakalataha ai a tautolu, ka kua au atu ai ke he vaha nai kua nakai nonofo fakalataha ai a tautolu, kia gahua ni a mutolu mo e matakutaku mo e vivivivi, kia momoui ai a mutolu.
13 Ha ko e Atua ni, kua gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.
14 Kia eke e mutolu e tau mena oti kana mo e nakai loma, mo e nakai mahalohalo noa;
15 Kia uta a mutolu mo tau tagata nakai totoku kua kelea, to totonu, ko e fanau he Atua, nakai fai ila i mua he hau fakakeukeu mo e faliuliu, kua kitia e lautolu ha mutolu a mahani tuga ne tau mena kua fakamaama aki e lalolagi,
16 He taofi e mutolu e kupu ke momoui ai, ke eke mo mena ke hula ai au ke he aho a Keriso, ha kua nakai poi teao au po ke gahua teao.
17 Kaeke foki ke fakamaligi haku a toto ki luga he poa mo e fekafekauaga ke he tua ha mutolu, to fiafia ai au, to fiafia foki au fakalataha mo mutolu oti kana.
18 Ko e mena foki ia kia fiafia ai a mutolu, kia fiafia foki a mutolu fakalataha mo au.
19 Ka e amaamanaki au ke he Iki ko Iesu, ke fakafano vave e au a Timoteo kia mutolu, kia fakamanavalahi au ka iloa e au e tala kia mutolu.
20 Ha kua nakai fai tagata au kua loto fakalataha mo au, ke manamanatu fakamoli a ia ke he tau mena ha mutolu.
21 Ha kua kumi e lautolu oti e tau mena ha lautolu, nakai ko e tau mena a Keriso Iesu.
22 Ka kua iloa e mutolu hana fakamoli, ne fekafekau a ia fakalataha mo au ha ko e tala mitaki, tuga ne tama ke he matua tane hana.
23 Ko ia haia kua amaamanaki au ke fakafano atu a enei e au, ka iloa e au po ke fefe au.
24 Ka e tua au ke he Iki, ke fina atu vave foki au.
25 Ka kua manatu au kua lata ke fekau atu kia mutolu a Epaferoti, ko e haku a matakainaga ia, ko ia foki ne gahua fakalataha mo au mo e femataaki mo au; ka ko e fekafekau ha mutolu, to fekafekau mai ke he haku a nofogati.
26 Ha kua manako lahi atu a ia kia mutolu oti kana; ne fakaatukehe foki a ia he logona e mutolu kua gagao a ia.
27 Ne gagao foki a ia, fetamakina kua mate, ka kua fakaalofa mai e Atua kia ia; ka e nakai ko ia hokoia, ka ko au foki, neke lafi mai kia au e taha momoko mo e taha momoko.
28 Ko e mena ia ne au atu ai he fekau vave atu a ia e au, kia liu foki fiafia a mutolu ka feleveia a mutolu mo ia; kia laukauka ai foki haku a momoko.
29 Hanai, kia talia e mutolu a ia ke he Iki mo e fiafia oti ni; kia fakahelehele foki e mutolu a lautolu kua pihia.
30 Ha ko e mena, fetamakina kua mate a ia ha ko e gahua a Keriso, kua nakai kuku e ia hana moui, kia fakakatoatoa e ia e tau mena ne toe ke he ha mutolu a fekafekau mai kia au.