Filipi 3:1-21
3 KO e tau matakainaga na e, ko e tau mena nai kua toe; kia fiafia a mutolu ke he Iki. Nakai ko e mena fakahoha kia au ke tohi atu kia mutolu e tau mena ia ni, ka ko e mena ke hao ai a mutolu.
2 Kikite la a mutolu ke he tau kuli; kikite la a mutolu ke he tau tagata eke mena kelea; kikite la a mutolu ke he tau tagata katatome.
3 Ha ko e tau tagata peritome a tautolu, kua fekafekau ke he Atua mo e loto, to hula foki kia Keriso Iesu, ka e nakai tua ke he tino.
4 Ka e ha ha ia au ni e tua ke he tino; kaeke kua manatu taha ha ha ia ia e tua ke he tino, kua au atu he pihia au.
5 Ne peritome au ke he aho valu, ko e faoa a Isaraela, ko e magafaoa a Peniamina, ko e Heperu mai he tau tagata Heperu; ko e farasaio au ke he tau mena he fakatufono;
6 Ko e haku a fakamakutu ne favale ai au ke he ekalesia; ko e tau mena foki he mahani tututonu ke he fakatufono nakai maeke he totoku ai au kua kelea.
7 Ka ko e tau mena oti ne moua e au, kua manatu au nakai aoga e tau mena ia ha ko Keriso;
8 Ko e moli ni, ko e haku a manatu kua nakai aoga e tau mena oti kana ha ko e mitaki mua ue atu he iloa a Keriso Iesu ko e haku a Iki; ha ko ia kua nakai aoga ai kia au e tau mena oti, kua manatu foki au ko e otaota ia, kia moua e au a Keriso;
9 Kia moua foki au ha ia ia, kua nakai ha ia au haku a tututonu mai he fakatufono, ka ko e tututonu ha ha he tua kia Keriso, ko e tututonu ia mai he Atua ke he tua;
10 Kia iloa e au a ia mo e malolo he hana foki liu tu mai, kia fakalataha foki au mo ia ke he hana tau mamahi, ha kua fakatai au mo ia ke he hana matulei.
11 Po ke maeke nakai au ke hoko atu ke he liliu foki tutu mai a lautolu kua mamate.
12 Nakai pehe foki, kua moua tuai e au, po ke katoatoa e mitaki ke he vaha nai; ka e poi mau atu au po ke maeke ai ke moua e au e mena ne moua mai ai au e Keriso Iesu.
13 Ko e tau matakainaga na e, nakai manatu au kua moua tuai e au; ka e taha ni e mena kua eke e au, kua fakanimonimo e au e tau mena kua mole atu, ka e oho atu au ke he tau mena ha i mua,
14 Kua poi mau atu au ke he fakamailoga ke moua ai e palepale ne ui mai ai e Atua mai luga kia au ha ia Keriso Iesu.
15 Hanai, ko lautolu kua katoatoa e mitaki ha ia tautolu, kia manamanatu ke he mena nai; kaeke foki kua manamanatu kehe a mutolu ke he taha mena, to fakakite mai foki he Atua e mena ia kia mutolu.
16 Ka ko e mena kua hoko ki ai a tautolu kia o leva fakalata ke he fakatufono ia, kia manamanatu ke he mena ia ni.
17 Ko e tau matakainaga na e, kia fifitaki fakalataha a mutolu kia au; kia kitekite foki a mutolu kia lautolu kua ō pihia, tuga he eke e mautolu mo fakafifitaki kia mutolu.
18 Ha ko e mena kua o e falu tokologa, ne tala atu ai lagaloga e au kia mutolu, ke tala atu nai foki mo e tagi, kua eke mo fi ha lautolu e satauro a Keriso;
19 Ko e malaia, ko e fakahikuaga ha lautolu haia; ko e manava, ko e atua ha lautolu haia; ko e mena kua nava ki ai a lautolu, ko e mena ke ma ai haia; kua loto a lautolu ke he tau mena he lalolagi.
20 Ha ko e māga moli ha tautolu ha ha he lagi ia, ha ne fakatalitali ai a tautolu ke he Fakamoui, ko e Iki ko Iesu Keriso,
21 Ko ia ke faliu ai e tau tino nai ha tautolu kua kelea, kia fakatai ke he hana tino fulufuluola, ke lata mo e malolo kua maeke ai kia ia ke mahala e tau mena oti kia ia.