Filipi 4:1-23
4 HANAI, ko e haku a tau matakainaga na e, kua fakaalofa mo e amaamanaki au ki ai, ko e haku a fiafia mo e foufou, ko e tau tagata fakahelehele, kia tumau pihia a mutolu ke he Iki.
2 Kua olelalo atu au kia Evotia, kua olelalo atu foki au kia Sunetuke, kia manamanatu a laua ke he mena taha ke he Iki.
3 Kua ole atu foki au kia koe ko e haku a lagomatai fakamoli, kia lagomatai a koe kia laua ha ko laua ne fakamakamaka fakalataha mo au ke he tala mitaki, katoa foki mo Kelemene, mo lautolu oti ne gahua fakalataha mo au, kua tohia ha lautolu a tau higoa ke he tohi he moui.
4 Kia fiafia a mutolu ke he Iki, aua neke noa; to liu foki tala atu e au, kia fiafia a mutolu.
5 Kia iloa ha mutolu a mahani totonu he tau tagata oti kana; kua tata mai tuai e Iki.
6 Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.
7 Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.
8 Ko e tau matakainaga na e, ko e kupu hanai kua toe; ko e tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.
9 Ko e tau mena foki kua ako ai a mutolu, mo e talia e mutolu, ne fanogonogo foki mo e kitia mai e mutolu kia au, kia eke e mutolu e tau mena ia; to ha ia mutolu e Atua hana e monuina.
10 Kua fiafia lahi au ke he Iki, ha kua liu foki tupu ke he vaha nai e manatu ha mutolu kia au; ne manatu ai foki a mutolu, ka e nakai maeke ai e mutolu.
11 Nakai tala atu au ha ko e nofogati; ha kua ako tuai au kuenaia haku a loto ke he tau mena ha ha ia au.
12 Kua iloa e au e nofogati, kua iloa foki e au e muhu mena; ko e tau mena oti ke nofo ai au, mo e tau mena oti ke hoko mai ai kia au, kua ako ai au kia makona mo e hoge, kia muhu mena mo e nofogati.
13 Kua maeke ia au e tau mena oti kana ke he fakamalolo mai a Keriso kia au.
14 Ka e pete ia, ne mahani mitaki a mutolu he fakaalofa mai a mutolu ke he haku a matematekelea.
15 Kua iloa foki e mutolu, ko e tau tagata Filipi na e, ko e kamataaga he tala mitaki, ne fina atu ai au i Maketonia, nakai fakaalofa mai kia au e taha ekalesia ke he kupu he foaki mo e talia e tau mena, ka ko mutolu hoko mutolu.
16 Ha ko e mena ne ta age kia au ki Tesalonia kua lagataha mo e lagaua e tau mena ne nofogati ai au.
17 Nakai kumi foki e au e mena fakaalofa, ka kua kumi e fua ke au atu ai he talahaua a mutolu.
18 Ka kua moua e au e tau mena oti, kua loga ue atu, kua katoa e tau mena ia au, kua moua mai e au ia Epaferoti e tau mena mai ia mutolu, ko e tau mena manogi mitaki, ko e poa ia ke talia he Atua mo e fiafia.
19 Ka ko e haku a Atua to fakakatoa e ia kia mutolu ke he monuina e tau mena oti kua nonofogati ai a mutolu, ke lata mo e hana koloa lahi ha ia Keriso Iesu.
20 Kia ha ha he Atua, ko e Matua ha tautolu e fakahekeaga tukulagi tukumuitea. Amene.
21 Kua fakaalofa atu au ke he tau tagata tapu oti ha ha ia Keriso Iesu; kua fakaalofa atu kia mutolu e tau matakainaga ha ha ia au.
22 Kua fakaalofa atu kia mutolu e tau tagata tapu oti ka e mua a lautolu ha he magafaoa a Kaisara.
23 Kia ha ha ia mutolu oti kana e fakaalofa noa he Iki ha tautolu ko Iesu Keriso. Amene.