Gahua 1:1-26
1 TEOFILO na e, ne tohi atu e au e tala fakamua ke he tau mena oti kana ne kamata e Iesu ke eke mo e fakaako atu,
2 Kua hoko ke he aho ne ta hake ai a ia, ka kua oti he poaki atu ke he Agaga Tapu ke he tau aposetolo, ko lautolu ne fifili e ia;
3 Ne fakakite mai foki e ia a ia kia lautolu kua moui a ia, ka kua mole hana mamahi kua fakamoli foki ke he tau fakamailoga loga; fa gofulu ni e po ne kitia ai e lautolu a ia, mo e vagahau atu a ia ke he tau mena he kautu he Atua.
4 Kua fakapotopoto foki a lautolu mo ia, ti hataki ai a ia kia lautolu, neke o kehe a lautolu i Ierusalema; ka kia tatali ai ke moua e mena ne talahau he Matua, ne fanogonogo a mutolu kia au.
5 Ha ko e mena papatiso ni a Ioane ke he vai; ka ko mutolu, to papatiso a mutolu ke he Agaga Tapu, ka e nakai la mole e tau aho loga.
6 Kua fakapotopoto a lautolu, ati hūhu ai a lautolu kia ia, kua pehe mai, Ko e Iki na e, ko e vaha nai kia ke liu fakafou mai ai e koe e kautu kia Isaraela?
7 Kua tala age a ia kia lautolu, Nakai lata he iloa e mutolu e tau vaha mo e tau tau, kua toka tuai he Matua ke he hana pule ni.
8 Ka to moua e mutolu e malolo, ka haele hifo e Agaga Tapu ki luga ia mutolu; to eke foki a mutolu mo tau talahau haku ki Ierusalema, mo Iutaia oti ni, mo Samaria, ke hoko ni ke he fakaotiaga he lalolagi.
9 Kua vagahau a ia ke he tau mena ia, ati ta hake ai a ia, ko lautolu ha ne kitekite atu ki ai; kua uta foki a ia he aolagi mai mua ha lautolu.
10 Kua mataono hake foki a lautolu ke he lagi, ha ne haele hake a ia, kitiala, e na tagata tokoua kua tutu mai kia lautolu mo e tau tapulu hina.
11 Kua pehe mai a laua, Ko e tau tagata Kalilaia na e, ko e heigoa e mena ne tutu ai a mutolu, mo e kitekite atu ke he lagi? Ko lesu hanā, kua ta hake ia mutolu ke he lagi, to liu mai foki pihia a ia, tuga hana haele atu ke he lagi ne kitekite a mutolu ki ai.
12 Ati liliu atu ai a lautolu ki Ierusalema he mouga ne higoa ko Olive, kua tata ia ki Ierusalema, ko e fanoaga he sapati e vaha loto ha laua.
13 Kua hoko atu a lautolu ki ai, ati o hake ai a lautolu ke he taha poko fale tapa ki luga, kua fa nonofo ai a Peteru, mo Iakopo, mo Ioane, mo Aneterea, ko Filipo mo Toma, ko Patolomaio mo Mataio, ko Iakopo ko e tama a Alefaio, mo Simona ko e Salote, mo Iuta ko e malakainaga a Iakopo.
14 Kua fakamakamaka mau a lautolu oti ia mo e loto fakalataha ke he liogi mo e ole, ko lautolu ni mo e tau fifine, mo Maria e matua fifine a lesu, katoa foki mo e hana tau matakainaga.
15 Ko e vaha ia ne tu ai a Peteru ki mua he tau tutaki (ko e katoatoa he tau higoa ha lautolu ne nonofo ai, po ke tokoteau mo e uafulu;) kua pehe atu;
16 Ko e tau matakainaga na e ma fanau, kua lata ni he fakamoli e Tohi nei, ne talahau fakamua mai he Agaga Tapu ke he fofoga a Tavita kia luta, ko ia ne eke mo takitaki kia lautolu ne tapaki a Iesu.
17 Ha ko e mena totou a ia fakalataha mo mautolu, ne kotofa foki a ia ke he feua nai.
18 Ne fakafua foki he tagata ia e fonua ke he taui he mahani hepehepe, ne veli fakahu hifo a ia, kua pa ai hana manava, kua maligi ai ki fafo hana gakau oti kana.
19 Kua kitia foki e mena na he tau tagata oti ne nonofo i Ierusalema, ko e mena ia ne higoa ai e fonua ia ke he vagahau ha lautolu, ko Akeletama, ko e hana kakano, ko e fonua he toto.
20 Ha kua tohi ke he tau Salamo, Kia toka noa e mena kua nofo ai a ia, aua foki neke nofo ai taha; mo e taha kupu, Kia eke e taha hana feua.
21 Hanai, ke lata he eke mo talahau ke he hana a liu tu mai, fakalataha mo mautolu nai, ko e taha he tau tagata ia ne o fano mo tautolu ke he tau vaha oti ni ne haele fano ai a tautolu mo e Iki ko Iesu,
22 Ke kamata mai he papatisoaga a Ioane, ke hoko ni ke he aho ne ta hake ai a ia ia tautolu.
23 Ati tuku mai ai e lautolu e tokoua, ko Iosefa ne higoa ko Pasapa kua higoa foki ko Iuso, katoa mo Matatia.
24 Ti liogi a lautolu, kua pehe atu, Ko e Iki na e, ko koe ni kua fioia e tau loto he tau tagata oti kana, kia fakakite mai e koe, po ko hai taha ia laua nai kua fifili e koe,
25 Ke kotofa a ia ke he feua nai he aposetolo, ne tiaki e Iuta kia fano a ia ke he hana mena ni ke nofo ai.
26 Ati eke ai e laua e vili, ati hagao ai e vili kia Matatia; ti fakalataha ai a ia mo e tau aposetolo ne tokohogofulu ma taha.