Gahua 11:1-30
11 KUA logona he tau aposetolo mo e tau matakainaga ha i lutaia, kua talia he tau tagata kehe e kupu he Atua.
2 Kua hake foki a Peteru ki Ierusalema, ti taufetoko ai mo ia e tau tagata peritome,
3 Kua pehe mai a lautolu, Na hu atu a koe ke he tau tagata nakai peritome; kua kai mena foki a mutolu fakalataha mo lautolu.
4 Ti kamata ai e Peteru ke talatala fakamatafeiga kia lautolu, kua pehe atu.
5 Ne nofo au ke he maga ko Iopa ha ne liogi, ti kitia e au e fakakiteaga he hekeatua au; ko e taha mena kua hifo mai tuga ne ie laulahi, kua tuku hifo mai he lagi he tau matapotu ne fa hana, kua hoko ni kia au;
6 Kua onoono ki ai au mo e manamanatu ki ai, ati kitia atu ai e au e tau manu huifa totolo, mo e tau manu favale mo e tau mena totolo, mo e tau manu lele.
7 Ne logona atu foki e au e leo, kua pehe mai kia au, Peteru na e, ati tu a ki luga, ke keli mo e kai.
8 Ka kua tala age e au, Ko e Iki na e, aua ia; ha ko e mena nakai puku ke he gutu haku ha mena kua tapu, po ke kelea.
9 Ka kua tala mai lagaua e leo mai he lagi kia au, Ko e tau mena kua fakamea he Atua, ua totoku e koe kua tapu.
10 Na eke lagatolu foki e mena nai, ati liuaki hake ai e tau mena oti kana ke he lagi.
11 Kitiala, ne tutu agataha mai e tokotolu a tagata ke he fale ne nofo ai au, ne fakafano mai i Kaisaria kia au.
12 Kua tala mai e Agaga kia au, ke o fakalataha mo lautolu, aua neke mahalohalo noa. Ti o a mautolu mo e tau matakainaga nai tokoono, ne huhu atu a mautolu ke he fale he tagata.
13 Kua tala mai e ia kia mautolu he kitia e ia e agelu, kua tu mai ke he hana fale, mo e tala age kia ia, Ati fekau atu a e falu a tagata ki Iopa, ke ahi a Simona ne higoa ko Peteru;
14 To tala mai e ia e tau kupu kia koe, ke fakamoui ai a koe, katoa mo e hau a magafaoa oti kana.
15 Ne kamata he vagahau atu au, ati to hifo ai e Agaga Tapu kia lautolu, tuga ne to hifo kia tautolu ke he kamataaga.
16 Ati manatu ai na au ke he kupu he Iki, ne pehe mai, Ne papatiso e Ioane ke he vai, ka e papatiso a mutolu ke he Agaga Tapu.
17 Hanai, kaeke kua tatai e fakaalofa kua foaki mai he Atua kia lautolu mo tautolu, he tua ke he Iki ko Iesu Keriso, ko hai kia au nai, ke maeke ai kia au ke hataki atu ke he Atua?
18 Kua logona e lautolu e tau kupu ia ati fakamamate ai a lautolu, kua fakaheke atu foki ke he Atua, kua pehe atu, Ko e moli, kua foaki atu foki he Atua ke he tau tagata kehe e tokihala ke momoui ai.
19 Kua o atu a lautolu ne mavehevehe ke he favale ne tupu he keliaga a Setefano, na hoko ki Foinike, mo Kuperu, mo Anetioka, kua nakai fakamatala atu e kupu kia taha ka ko e tau tagata Iutaia hoko lautolu.
20 Ko e tau tagata Kuperu mo Kurene foki e falu ha lautolu, kua hoko a lautolu ki Anetioka, kua vagahau ke he tau tagata Heleni, mo e fakamatala atu e tala mitaki ke he Iki ko Iesu.
21 Ha i ai kia lautolu e lima he Iki; kua talia foki e lanu tagata tokologa, mo e hagao mai ke he Iki.
22 Kua tuogo atu e tala he tau mena nai ke he tau teliga he ekalesia ha i Ierusalema; ati fekau atu ai e lautolu kia Panapa, kia fina atu a ia ato hoko ki Anetioka.
23 Kua hoko atu foki a ia, mo e kitia e fakaalofa noa he Atua, ati olioli ai a ia, mo e tomatoma atu kia lautolu oti kana, kia toka ke he tau loto ha lautolu kia pipiki atu ke he Iki.
24 Ha ko e tagata mahani mitaki a ia; kua puke ke he Agaga Tapu mo e tua; ati lafilafi ai e tau tagata tokologa ke he Iki.
25 Ati fina atu ai a Panapa ki Taso, ke kumi a Saulo.
26 Kua moua a ia ati uta ai a ia ki Anetioka. Kua fakalataha a laua mo e ekalesia ke he tau hohoko kua fakaako foki ke he tau tagata tokologa. Ne fakahigoa fakamua e tau tutaki ko e tau Kerisiano i Anetioka.
27 Ko e vaha ia ne hifo mai ai e tau perofeta i Ierusalema ki Anetioka.
28 Kua tu ki luga e taha ha lautolu, ko Akapo e higoa, na fakailoa e ia mai he Agaga e hoge lahi ko e tupu ne fai ke he lalolagi oti kana; ne hoko foki ia ke he vaha ne pule ai a Kaisara Kalaotio.
29 Ati manatu ai takitokotaha e tau tutaki, ke fakalata ke he tau mena kua monuina ai, ke age ai e fakaalofa ke he tau matakainaga kua nonofo i Iutaia;
30 Na eke ai foki e lautolu, kua momoi ia Panapa mo Saulo ke he tau patu.