Gahua 13:1-52
13 HA ha he ekalesia i Anetioka e falu a perofeta mo e tau akoako; ko Panapa, mo Simeona ne higoa ko Nikeru, mo Lukio i Kurene, ko Manaena ne leveki fakalataha mo Herota e iki ke he vaha ne ikiiki ai, katoa mo Saulo.
2 Ha ne fekafekau a lautolu ke he Iki, mo e fakakanopogi, kua vagahau mai e Agaga Tapu, Vevehe mai māku a Panapa mo Saulo ke he gahua kua ui e au kia laua ke eke.
3 Ati fakakanopogi ai na lautolu mo e liogi, mo e fakalago e tau lima kia laua, ati tuku atu ai ke o.
4 Kua fakafano tuai he Agaga Tapu e tau tagata ia, ati o ai na laua ki Selukia; kua o halavaka mai he mena ia ki Kuperu.
5 Ha i Salamina, ati fakamatala atu ai e laua e kupu he Atua ke he tau sunako he tau tagata Iutaia; kua fekafekau foki a Ioane kia laua.
6 Kua lakafia e lautolu e taha fahi he motu, kua hoko atu ki Pafo, kua kitia ai e lautolu e taha makoi, ko e perofeta pikopiko, ko e tagata Iutaia, ko Paiesu hana higoa;
7 Ha ha i ai a ia ke he iki ne pule, ko Sekio Paulo, ko e tagata pulotu haia; kua ahi e ia e Panapa mo Saulo, kua manako ke fanogonogo ke he kupu he Atua.
8 Ka ko Elima ko e makoi, (ha ko e alito haia he hana higoa,) kua totoko mai a ia kia laua, kua manako a ia ke fakamafoki kehe mo e tua e iki ne pule.
9 Ka ko Saulo, (ko Paulo foki haia,) kua puke a ia ke he Agaga Tapu, kua fakapupula kia ia, kua pehe atu.
10 Ko koe na kua puke ke he pikopiko oti kana mo e tau mahani kelea oti kana, ko e tama he tiapolo, ko e tagata fai fi ke he tau mahani tututonu oti kana; ka e nakai kia toka e koe e fakakeukeu e tau puhala tonu he Iki?
11 Kitiala, ko e hoko ne fai kia koe e lima he Iki, ke matapouli a koe, nakai kitia e koe e la, ato taha aho. Ati to ai agataha kia ia e polefu mo e pouli; ati faifano ai a ia, mo e kumi e falu ke takitaki a ia.
12 Kua kitia foki he iki ne pule e mena kua eke, ati tua ai a ia, kua ofomate a ia ke he tau kupu he Iki.
13 Kua o halavaka a Paulo mo e hana fenoga mai Pafo, kua hoko a lautolu ki Pereka i Pafulia; kua toka foki e Ioane a laua kua liu a ia ki Ierusalema.
14 Kua toka foki e laua a Pereka, ati hoko atu ai a laua ki Anetioka i Pisitia, kua huhu atu a laua ke he sunako ke he aho sapati, kua nonofo ki lalo.
15 Kua oti foki he totou ke he fakatufono mo e tau perofeta, ati fekau atu ai a lautolu ne pule he sunako e falu kia laua, kua pehe atu, Ko e tau matakainaga na e ma fanau, kaeke kua toka ia mua ha kupu fakamafana ke he tau tagata, ti talahau mai a.
16 Ati tu ai a Paulo ki luga, mo e alo atu hana lima, kua pehe atu, Ko e tau tagata Isaraela na e, mo mutolu ne matakutaku ke he Atua, fanogonogo mai a.
17 Ko e Atua he motu nai ko Isaraela ne fifili e ia e tau matua ha tautolu, mo e fakamatalahi e motu ka kua paea a lautolu ke he motu ko Aikupito, kua takitaki kehe atu ai foki e ia a lautolu mo e lima fakaolo.
18 Na fakamanavalahi foki a ia ke he mahani ha lautolu ke he tutakale, ke he tau tau po ke fa gofulu.
19 Kua oti foki he fakamahaikava e ia e tau motu ne fitu ke he fonua ko Kanana, ati tufatufa ai e tau fonua ha lautolu ma lautolu.
20 Kua mole foki e tau mena ia, ati tuku atu ai e tau iki fakafili ma lautolu, ato hoko ke he perofeta ko Samuela, ke he tau tau po ke fa e teau mo e limagofulu.
21 Kua mole atu ia, ati ole atu ai a lautolu ke moua ai e patuiki; ati tuku atu ai ni he Atua kia lautolu a Saulo, ko e tama a Kiso, ko e tagata he faoa a Peniamina, he tau tau ne fagofulu.
22 Kua uta kehe foki e ia a ia, ti fakatu ai e ia a Tavita mo patuiki ha lautolu; kua talahau foki a ia kia ia, kua pehe age, Kua moua e au a Tavita e tama a Iese, ko e tagata ke lata mo e haku a loto, to eke e ia e tau mena oti kana kua manako au ki ia.
23 Mai he fanau he tagata ia kua fakatu ai he Atua ma Isaraela e Fakamoui ko Iesu, tuga ne talahaua e ia;
24 Kua oti he fakamatala fakamua e Ioane, ka e nakala haele mai a ia, e papatisoaga he tokihala ke he motu oti ni a Isaraela.
25 Ko e fakaoti ha ne fai e Ioane hana feua, ti kua pehe mai ai a ia, Ko hai kia au nai ke he manatu ha mutolu? Nakai ko ia au nai. Ka e kitiala, ha ne mui mai kia au e taha, nakai aoga au ke vevete hana tau afialoalohui.
26 Ko e tau matakainaga na e ma fanau, ko e tau fanau a Aperahamo, katoa mo lautolu ha ha ia mutolu kua matakutaku ke he Atua, kua fakafano mai e kupu he fakamouiaga nai kia mutolu ni;
27 Ha ko lautolu kua nonofo i Ierusalema, mo e tau iki ha lautolu, kua nakai iloa e lautolu a ia, mo e tau kupu he tau perofeta kua totou ke he taha aho sapati mo e taha aho sapati, kua fakamoli ai e lautolu he fakahala e lautolu a ia.
28 Pete ni he nakai moua e lautolu ha mena ke lata ai he mate a ia, ka e tala age a lautolu kia Pilato kia kelipopo a ia.
29 Kua fakaoti foki e lautolu e tau mena oti kana kua tohi kia ia, ati ta hifo ai e lautolu a ia he akau, mo e tuku ke he tukuaga.
30 Ka kua liu foki fakatu mai he Atua a ia ia lautolu kua mamate;
31 Ne loga foki e aho ne kitia ai a ia he tau tagata ne o hake mo ia mai Kalilaia ki Ierusalema; ko lautolu haia ko e hana tau alahau ainei ke he motu.
32 Kua fakamatala atu foki e maua e tala mitaki kia mutolu ke he mena ne talahau atu ke he tau tupuna ha tautolu;
33 Kua fakahoko tuai e mena ia he Atua kia tautolu ko e tau fanau ha lautolu, he liu foki fakatu e ia a Iesu; tuga ne tohi ke he salamo ne ua, Ko e haku a Tama a koe, kua fanau e au a koe ke he aho nai.
34 Ka e liu foki fakatu mai e ia a ia ia lautolu kua mamate, kia nakai tuai liu atu ke he mena ke popo ai, kua pehe mai ai hana kupu, To foaki atu e au kia mutolu e tau mena tapu a Tavita kua fakamoli.
35 Ko e mena foki haia kua tala mai ai a ia ke he taha salamo, Nakai tuku atu e koe hau a tagata tapu kia hoko ki ai e popo.
36 Ko Tavita foki, kua oti he fekafekau ke he finagalo he Atua ke he hau ni hana, kua mohe a ia mo e fakalataha ke he tau matua hana, ti hoko kia ia e popo.
37 Ka ko ia ne liu foki fakatu mai he Atua, kua nakai hoko kia ia e popo.
38 Hanai, ko e tau matakainaga na e, ma fanau, kia iloa e mutolu, kua fakamatala kia mutolu e fakamagaloaga he tau hala ha ko e tagata ia;
39 Ko e tau tagata oti ke tua, to talahaua tututonu a lautolu ia ia ke he tau mena oti kana nakai maeke ke talahaua tututonu ai a mutolu ke he fakatufono a Mose.
40 Hanai, a mutolu neke hoko kia mutolu e mena ne talahau mai ai ke he tau perofeta.
41 Ko mutolu ne fakalialia atu, kia kikite mai a, mo e ofo, mo e fakamou; ha ko e mena eke ai ni e au e gahua ke he tau aho ha mutolu, ko e gahua pete ni he fakamatala e taha kia mutolu, ka e nakai talia e mutolu.
42 Kua o foki a lautolu ki fafo he sunako he tau tagata Iutaia, ti kua ole atu ai e tau tagata kehe kia fakamatala mai e tau kupu ia kia lautolu ke he aho sapati ka hau.
43 Kua mavehevehe e fakapotopotoaga, ati mumui atu ai kia Paulo mo Panapa e tau tagata Iutaia mo lautolu ne tokologa kua liogi kua matakutaku ke he Atua; kua vagahau atu a laua, mo e tomatoma kia lautolu, kia tumau a lautolu ke he fakaalofa noa he Atua.
44 Kua hoko ke he aho sapati, ti kua teitei oti he māga he o mai ke fanogonogo ke he kupu he Atua.
45 Kua kitia he tau tagata Iutaia e motu o tagata, ati mahekeheke lahi a lautolu, kua liuliu mai ke he tau mena ne tala atu ai a Paulo, kua liuliu mo e kupu kelea kia lesu.
46 Ti kua fakamalolo atu ai a Paulo mo Panapa, kua pehe atu, Kua lata ni he fakamatala fakamua e kupu he Atua kia mutolu; ka kua papage atu ai e mutolu mo e talahaua e mutolu kua nakai aoga a mutolu ke he moui tukulagi, ko e mena ia, kitiala, kua hagao atu ai a maua ke he tau tagata kehe.
47 Ha ko e mena kua pihia ne poaki mai he Iki kia mautolu, Kua kotofa e au a koe mo maama he tau motu kehe, kia eke a koe mo fakamouiaga ke hoko ke he fakaotiaga he lalolagi.
48 Kua logona he tau tagata kehe, ati olioli ai, mo e fakaheke atu a lautolu ke he kupu he Iki; kua tua foki a lautolu oti ne kotofa ke he moui tukulagi.
49 Kua tuogo foki e kupu he Iki ke he motu oti na.
50 Ka kua omoomoi he tau tagata Iutaia e tau fifine kua matakutaku ke he Atua, mo e tau iki fifine mo e tau iki he māga, mo e fakatupu e favale kia Paulo mo Panapa, ti vega atu a laua he katofia ha lautolu.
51 Ka kua lulululu atu e laua e kelekele ha ha he tau hui ha laua kia lautolu, ati o atu ai a laua ki Ikonio.
52 Kua puke foki e tau tutaki ke he olioli, mo e Agaga Tapu.