Gahua 14:1-28
14 HA ha i Ikonio a laua, ti huhu fakalataha ke he sunako a Iutaia, ko e tau kupu foki kua fakamatala e laua kua tua ai e tau tagata Iutaia katoa foki mo e tau tagata Heleni ne tokologa.
2 Ka ko e tau tagata Iutaia nakai fanogonogo kua omoomoi atu a lautolu, mo e fakaita atu e tau loto he tau tagata kehe ke he tau matakainaga.
3 Ko e mena ia kua nonofo leva ai a laua mo e vagahau fakamalolo atu ke he kupu he Iki, kua talahau e ia ke he kupu he hana fakaalofa noa, mo e foaki kia eke e tau fakamailoga mo e tau mana ke he tau lima ha laua.
4 Ka kua veveheua e moto tagata he māga; ha he tau tagata lutaia falu, ha he tau aposetolo falu.
5 Kua pulega foki e tau tagata kehe, auloa mo e tau tagata lutaia, mo e tau iki ha lautolu, ke fakakelea, mo e taulitimaka kia laua;
6 Kua iloa ai e laua, ati fehola atu ai a laua ki Luseta mo Terepe, ko e tau māga haia a Lukaonia, mo e fahi oti ne takai ai;
7 Kua fakamatala ki ai e laua e vagahau mitaki.
8 Na nofo foki i Luseta e taha tagata kua nakai fahia e tau hui hana, kua kulikuli tali mai he fanau mai, kua nakai fano ni a ia.
9 Kua fanogonogo mai e tagata nai kia Paulo ha ne vagahau; kua fakapula a ia kia ia, kua iloa foki ha ha ia ia e tua ke malolo ai,
10 Kua tala age mo e leo lahi, Ati tu hako a hau a tau hui ki luga. Ti hopo ai a ia mo e fano.
11 Kua kitia he motu o tagata e mena kua eke e Paulo, ati tauui atu ai a lautolu ke he vagahau a Lukaonia, kua pehe, Kua haele hifo e tau atua kia tautolu tuga ne tau tagata.
12 Kua fakahigoa atu foki e lautolu a Panapa, ko Tia; ka ko Paulo, ko Hereme ia, ha ko ia ko e patu he vagahau.
13 Ka ko e ekepoa a Tia ha i mua he māga ha lautolu hana faituga, kua ta mai e ia ke he tau gutuhala e tau povi tane mo e tau foufou, ko e eke aki ne fai e poa e ia katoa mo e motu o tagata.
14 Kua logona tuai he tau aposetolo, ko Panapa mo Paulo, ati hēhē ai e tau tapulu ha laua mo e feoho atu ke he motu o tagata, kua tauhea a laua,
15 Kua pehe atu, Ma fanau na e, kua eke mo ha e mutolu e tau mena na? Ko e tau tagata ni a maua nai tuga a mutolu, kua fakamatala atu e maua e vagahau mitaki kia mutolu kia mafokifoki mai a mutolu he tau mena na kua nakai aoga, ka e hagao ke he Atua moui, ne eke e lagi, mo e lalolagi, mo e tahi, mo e tau mena oti kana ne toka ai ia lautolu.
16 Ne toka noa e ia e tau motu kehe oti kana ke he tau hau kua mole atu, ke eke e lautolu ha lautolu a tau mahani.
17 Ka e pete ni he mena ia, kua nakai toka noa ai e ia ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.
18 Kua tala atu e tau kupu ia fetamakina a kua nakai maeke he hataki ai e motu o tagata, kia toka, ua eke poa mai kia laua.
19 Ka kua o mai e tau tagata Iutaia mai Anetioka mo Ikonio, mo e ole age a lautolu ke he motu o tagata; kua taulitimaka e lautolu a Paulo, ti toho atu ai e lautolu a ia ki tua he māga, piko na lautolu kua mate a ia.
20 Kua agaagai a ia he tau tutaki, ti tu ai a ia ki luga, kua fano ke he māga; ko e pogipogi foki, kua o atu ai a laua mo Panapa ki Terepe.
21 Kua oti foki he fakamatala e laua e tala mitaki ke he māga ia, kua eke ai e tokologa mo tutaki, ati liliu ai foki a laua ki Luseta, mo Ikonio, mo Anetioka.
22 Kua fakamalolo e laua e tau loto he tau tutaki, mo e tomatoma atu kia tumau ke he tua; kua pehe atu foki, Ko e tau matematekelea ne loga kua lata ke hao atu ai a tautolu ke he kautu he Atua.
23 Kua oti he kotofa e laua e tau patu ma lautolu ke he taha ekalesia, mo e taha ekalesia, kua liogi mo e fakakanopogi, ati tuku atu ai e laua a lautolu ke he Iki ne tua a lautolu ki ai.
24 Kua o leva a laua i Pisitia, ati hoko atu ai ki Pafulia.
25 Kua fakamatala foki e laua e kupu i Pereka, ati o hifo ai a laua ki Atalia.
26 Ti o a laua halavaka mai he mena ia ki Anetioka, na o atu ai a laua he tuku atu ai a laua ke he fakaalofa noa he Atua, kia eke e gahua kua oti he eke e laua.
27 Kua hoko foki a laua, ati fakapotopoto ai e laua e ekalesia, mo e fakamatala atu ai e tau mena oti ne eke he Atua ia laua, he hafagi foki e ia e gutuhala he tua mo e tau motu kehe.
28 Kua nonofo ai foki a laua fakalataha mo e tau tutaki.