Gahua 15:1-41
15 NE o hifo foki e falu a tagata mai Iutaia, mo e fakaako atu ke he tau matakainaga, kua pehe, Kaeke kua nakai peritome a mutolu tuga ne mahani a Mose, nakai maeke he fakamomoui a mutolu.
2 Kua loga e tau kupu miha mo e taufetoko ha lautolu mo Paulo mo Panapa, ti kotofa ai e lautolu a Paulo mo Panapa, katoa mo e falu ia lautolu, kia o hake ke he tau aposetolo mo e tau patu ki Ierusalema ke he taufetoko ia.
3 Kua fakafano he ekalesia a lautolu, kua o a lautolu hala Foinike mo Samaria, kua fakamatala atu ai he mafokifoki mai e tau motu kehe; kua fakatupu foki e fiafia lahi ke he tau matakainaga oti kana.
4 Kua hohoko a lautolu ki Ierusalema, ti talia ai a lautolu he ekalesia mo e tau aposetolo, mo e tau patu; ne fakamatala atu e lautolu e tau mena loga ne eke he Atua ia laua.
5 Ati tutu mai ai falu he vahega he tau farasaio kua tua, kua pehe age, Kua lata he peritome a lautolu, mo e poaki atu kia lautolu kia omaoma ke he fakatufono a Mose.
6 Ati fakapotopoto ai e tau aposetolo mo e tau patu ke pulega ke he mena na.
7 Kua lahi he taufetoko, ati tu ai a Peteru ki luga, kua pehe atu kia lautolu, Ko e tau matakainaga na e ma fanau, kua iloa e mutolu kua fifili tigahau he Atua taha ia tautolu, kia logona mai he tau tagata kehe e kupu he tala mitaki ke he gutu haku, mo e talia e lautolu.
8 Ko e Atua foki ne fioia e tau loto, kua talahau e ia kia lautolu he foaki atu ne ia e Agaga Tapu kia lautolu, tuga na tautolu nai.
9 Kua nakai fakakehekehe e ia a tautolu mo lautolu he fakamea e ia e tau loto ha lautolu ke he tua.
10 Hanai, ko e heigoa e mena ke kamatamata atu ai a mutolu ke he Atua he tuku atu e mutolu ke he tau ua he tau tutaki e akau hahamo kua nakai fahia ke uta he tau matua ha tautolu, po ko tautolu nai?
11 Ka ko e fakaalofa noa ni he Iki ko Iesu Keriso, kua taofi e tautolu, ke fakamomoui ai a tautolu, tuga foki na lautolu.
12 Ati fakamamate oti ai ni a lanu tagata, mo e fanogonogo mai kia Panapa mo Paulo, kua fakamatala atu e tau fakamailoga mo e tau mana loga ne eke he Atua ke he tau motu kehe ia laua.
13 Kua fakamamate a laua, ti tala mai ai a Iakopo, kua pehe mai, Ko e tau matakainaga na e ma fanau, fanogonogo mai kia au;
14 Kua fakamatala mai e Simona e ahiaga fakamua he Atua ke he tau motu kehe ke moua ai e tau tagata māna.
15 Kua fakalataha foki mo e mena nai e tau kupu he tau perofeta, tuga ne tohi mai,
16 Ka mole e tau mena nai to liu atu au, mo e eke e au e fale ie a Tavita kua malŏlo to liu foki ati e tau mena maona ha i ai to fakatu ai foki e au;
17 Kia kumi atu ke he Iki e tau tagata kua toe, mo e tau motu oti kana kua fakahigoa aki ke he haku a higoa; kua pihia mai ai e Iki ha ne eke e tau mena oti nai.
18 Kua fioia he Atua hana tau gahua oti kana tali mai he kamataaga.
19 Hanai, ko e haku a manatu hanai, kia toka, ua fakalavelave atu ke he tau tagata he tau motu kehe kua hagao ke he Atua.
20 Ka kia tohi atu kia lautolu, ke fakamamao a lautolu mo e tau mena kelea kua keli ma e tau tupua, mo e feuaki, mo e tau mena fofota, mo e toto.
21 Ha ko e mena tali mai e tau hau ke he vaha i tuai ha ha ia Mose e falu kua fakamatala a ia ke he taha māga mo e taha māga, kua totou ai ke he tau sunako ke he tau aho sapati oti kana.
22 Ti mitaki ai ke he tau aposetolo, mo e tau patu, katoa mo e ekalesia oti, ke fifili mo e fekau atu ki Anetioka fakalataha mo Paulo mo Panapa ni falu a tagata ha lautolu, ko Iuta ne fakahigoa ko Pasapa, mo Sila, ko e tau tagata talahau he tau matakainaga;
23 Kua tohi atu e tau kupu nai kia uta e lautolu, Fakaalofa atu e tau aposetolo, mo e tau patu katoa mo e tau matakainaga nai ke he tau matakainaga ko e tau tagata he tau motu kehe ha i Anetioka, mo Suria, mo Kilikia.
24 Kua logona e mautolu, kua fakalavelave a mutolu he falu ne o atu ia mautolu ke he tau kupu ha lautolu, kua fakamafoki foki e lautolu e tau loto ha mutolu, kua pehe atu, kia peritome a mutolu, mo e omaoma ke he fakatufono; nakai poaki atu ai a mautolu;
25 Ko e mena nai kua mitaki kia mautolu nai kua fakapotopoto mo e loto fakalataha, ke fekau atu kia mutolu e tau tagata ne fifili, fakalataha mo e tau matakainaga fakahele ha mautolu, ko Panapa mo Paulo,
26 Ko e tau tagata ia kua tukulele atu ha laua a tau moui ha ko e higoa he Iki ha tautolu ko Iesu Keriso.
27 Ko e mena haia kua fekau atu ai e mautolu a Iuta mo Sila, ke tala atu ha laua a tau kupu ke he tau mena ia.
28 Ha ko e mena kua mitaki ke he Agaga Tapu mo mautolu nai, aua neke tuku atu taha kavega kia mutolu, ko e tau mena nai hokoia ke lata;
29 Kia fakamamao a mutolu mo e tau mena kua ekepoa ai ke he tau tupua, mo e toto, mo e tau mena fofota, mo e feuaki; kaeke ke fakamamao a mutolu mo e tau mena ia, ti mitaki ai a mutolu. Kia monuina a mutolu.
30 Kua tuku atu a lautolu ke o, ati o atu ai a lautolu ki Anetioka; kua fakapotopoto mai foki e lautolu e lanu tagata, ati ta atu ai e tohi.
31 Kua totou e lautolu, ti fiafia ai a lautolu ha ko e fakamafanaga.
32 Ko Iuta foki mo Sila, ko e tau perofeta a laua, kua fakamafana atu e laua, mo e fakamalolo e laua e tau matakainaga ke he tau kupu loga.
33 Kua leva he nonofo ai a laua, ati tuku atu ai a laua he tau matakainaga ke o ke he tau aposetolo mo e monuina.
34 Ka kua loto a Sila ke nofo mau ai.
35 Ko Paulo foki mo Panapa, kua nonofo a laua i Anetioka, mo e falu foki ne tokologa; kua fakaako mo e fakamatala atu e vagahau mitaki he Iki.
36 Kua mole e falu a aho, ti pehe ai a Paulo kia Panapa, Kia liliu atu a a taua, ke ahi e tau matakainaga ha taua ke he tau māga oti kana ne talahau atu e taua e kupu he Iki, po ke fefe a lautolu.
37 Kua loto foki a Panapa kia o a lautolu mo Ioane, ne higoa ko Mareko.
38 Ka kua manatu a Paulo, nakai lata he o a lautolu mo ia ne tiaki a laua i Pafulia, mo e nakai o mo laua ke he gahua.
39 Ti kua hukia lahi ai e tau loto, kua mavehe kehekehe ai a laua; ati o ai a Panapa mo Mareko, kua o he foulna a laua ki Kuperu;
40 Ka kua fifili e Paulo a Sila, mo e fina atu, kua tuku atu he tau matakainaga a ia ke he fakaalofa noa he Atua.
41 Kua fano leva foki a ia i Suria mo Kilikia, mo e fakamalolo atu e ia e tau ekalesia.