Gahua 16:1-40
16 NE hoko hifo foki a ia ki Terepe mo Luseta; kitiala, ha ha i ai e taha tutaki ko Timoteo hana higoa, ko e tama he taha fifine Iutaia ne tua, ka ko e matua tane hana ko e Heleni a ia;
2 Kua talahaua a ia he tau matakainaga i Luseta mo Ikonio.
3 Ne manako a Paulo ke o a laua mo ia, ati peritome atu e ia a ia ha ko e tau tagata Iutaia ha he tau motu ia; ha ko e mena iloa e lautolu oti kana ko e Heleni hana matua tane.
4 Kua o age a lautolu ke he tau māga, mo e ta atu e lautolu kia lautolu e tau poakiaga, ne kotofa ai he tau aposetolo mo e tau patu ha i Ierusalema ke omaoma ki ai a lautolu.
5 Ti kua mauokafua e tau ekalesia ke he tua, mo e fakatokologa a lautolu ke he taha aho mo e taha aho.
6 Kua mole foki he o leva a lautolu i Ferukia, mo e fahi ki Kalatia, ka kua hataki he Agaga Tapu, ua talahau atu e kupu i Asia;
7 Kua hoko foki a lautolu ki Musia, ti kua lali ai a lautolu ke o atu ki Pitunia; ka e nakai maeke e Agaga he o a lautolu.
8 Ati o age ai a lautolu he tapa Musia, kua hoko hifo ki Tiroa.
9 Kua fakakite mai foki kia Paulo e fakakiteaga ke he po; ko e taha tagata Maketonia kua tu mai, mo e ole mai kia ia, kua pehe mai, Hau a ki Maketonia, mo e lagomatai mai kia mautolu.
10 Kua iloa e ia e fakakiteaga, ati kolo ai agataha a mautolu ke o atu ki Maketonia, kua manatu ni a mautolu, kua ui mai e Iki kia mautolu ke fakamatala atu e tala mitaki kia lautolu.
11 Ati o ai halavaka mai Tiroa, mo e fano fakahako ki Samotake; ko e pogipogi foki kua hoko ai ki Neapoli;
12 Ati hoko atu ai ni ki Filipi, ko e māga fakamua ia ke he fahi ia ko Maketonia, ko e koloni. Kua nonofo foki a mautolu ke he māga ia he falu a aho.
13 Kua o foki a mautolu ke he aho sapati ki tua he māga ke he kauvai he vailele, ke he mena kua mahani ke eke ai e tau liogi; kua nonofo foki a mautolu ki lalo, mo e vagahau atu ke he tau fifine ne fakapotopoto ai.
14 Kua fanogonogo mai foki kia mautolu e taha fifine ne matakutaku ke he Atua, ko Litia hana higoa, ko e fifine fakafua ie kula uhi, ko Tuataira hana māga; kua vevete he Iki hana loto kia hagao mai ke he tau kupu ne vagahau atu e Paulo.
15 Kua papatiso a ia, katoa mo e hana magafaoa, ti kua ole mai ai a ia, kua pehe mai, Kaeke kua manatu a mutolu kua fakamoli au ke he Iki, o mai a ke he haku a fale, mo e nonofo ai. Kua taofi fakamakamaka a mautolu e ia.
16 Kua o a mautolu ke he mena ke eke ai e liogi, ati feleveia ai mo mautolu e taha fekafekau fifine ha i ai e agaga talahau tuai, kua moua e ia e tau koloa loga ma e tau iki hana he hana tau talahau tuai.
17 Kua mui fano a ia kia Paulo mo mautolu, mo e tauhea, kua pehe age, Ko e tau fekafekau he Atua mua ue atu e tau tagata na, kua talahau mai e lautolu kia tautolu e puhala he moui.
18 Kua eke pihia a ia ke he tau aho loga. Ka kua hogohogomanava a Paulo, kua haga atu, mo e pehe atu ke he agaga, Kua tala atu e au kia koe ke he higoa a Iesu Keriso, fano a ki fafo ia ia. Ati fano ai a ia ki fafo ke he magaaho ia ni.
19 Kua iloa he tau iki hana, kua mole atu e mena ne tua ki ai ke moua ai e tau koloa ha lautolu, ti tapaki ai e lautolu a Paulo mo Sila, mo e toho atu a laua ke he male ki mua he tau iki.
20 Ti uta ai a laua ke he tau iki fakafili, kua pehe atu, Kua fakalavelave lahi e tau tagata nai ke he māga ha tautolu, ko e na tagata Iutaia a laua;
21 Kua talahau mai foki e laua e tau mahani kua tapu he talia, mo e eke e tautolu e tau tagata Roma.
22 Ti feoho mai e motu o tagata kia laua, kua hē kehe foki he tau iki fakafili e tau tapulu ha laua, ti fekau ke fahi kia laua ke he tau akau.
23 Kua fahi e lautolu a laua, loga e tau ta ha laua, ati tuku atu ai ke he fale puipui, kua tala age ke he leoleo he fale ke leoleo fakamitaki a laua.
24 Kua moua e poaki ia, ati tuku atu ai ne ia a laua ke he poko ha he puloto, mo e fakamau e tau hui ha laua ke he akau.
25 Ko e tulotopo kua liogi ai mo e lologo a Paulo mo Sila ke he Atua, kua logona foki a laua e lautolu ne lili.
26 Ti fakaofo mai he mafuike lahi, kua luelue ai e tau fakave he fale puipui; ti mahafagi agataha e tau pa gutuhala oti, kua mavetevete ai foki e tau lili ha lautolu oti kana.
27 Kua ala e leoleo he fale puipui ne mohe, kua kitia e ia e tau pa gutuhala he fale kua toka noa, ti aki ai e ia e pelu, ko e keli ne fai e ia a ia, piko a ia kua fehola a lautolu ne lili.
28 Ka e hea a Paulo mo e leo lahi, kua pehe atu, Aua neke fakakelea a koe kia koe; ha ko mautolu oti kana hanai.
29 Ati tala age ai a ia ke ta mai e tau hulu, ti hopo mai ai a ia, mo e fakaveli ki mua ha Paulo mo Sila mo e vivivivi.
30 Ti takitaki e ia a laua ki fafo, kua pehe mai, Ko e tau Iki na e, ko e heigoa e mena ke lata he eke e au ke moui ai au?
31 Kua tala age a laua, Kia tua a ke he Iki ko lesu, to moui ai a koe, katoa mo e hau a magafaoa.
32 Ti talahau atu ai e laua e kupu he Iki kia ia, mo lautolu oti ha he fale hana.
33 Kua ta mai foki e ia a laua ke he magapo ia ni, mo e holoholo e tau ta ha laua; ti papatiso ai agataha a ia mo e hana magafaoa oti.
34 Kua takitaki hake foki e ia a laua ke he hana fale, mo e fakatokatoka atu e tau mena kai; kua fiafia a ia mo e hana magafaoa oti, kua tua ke he Atua.
35 Kua aho, ti fekau mai ai he tau iki fakafili e tau fekafekau, kua pehe mai, Tuku atu a e na tagata ia ke o.
36 Ati tala age ai e leoleo he fale puipui e tau kupu ia kia Paulo, Kua fekau mai he tau iki fakafili kia tuku atu a mua ke o; hanai, kia o atu a, kia o mo e monuina.
37 Ka e tala age a Paulo kia lautolu, kua fahi e lautolu a maua ki mua he tau tagata, ka e nakai fakafili a maua, ko e tau tagata Roma a maua, ti tuku mai ai e lautolu a maua ke he fale puipui; ka e toka fakatekiteki nai kia e lautolu a maua? Aua ia; ka kia o mai ni a lautolu ke takitaki atu a maua ki fafo.
38 Ti tala age ai he tau fekafekau e tau kupu ia ke he tau iki fakafili; ati matakutaku ai a lautolu, he logona ko e tau tagata Roma a laua;
39 Ti o mai ai a lautolu, mo e olelalo mai kia laua, kua takitaki foki a laua ki fafo, ti ole atu kia o kehe a laua he māga.
40 Ati huhu atu ai na laua ki fafo he fale puipui, kua huhu atu ke he fale a Litia; kua feleveia foki mo e tau matakainaga, mo e fakamafana atu a laua kia lautolu, ti o ai na laua.