Gahua 17:1-34
17 KUA mole ki tua ki Amefipoli mo Apolonia, ati hoko ai a laua ki Tesalonia, ha ha i ai e sunako he tau tagata Iutaia.
2 Kua hu atu foki a Paulo kia lautolu, ko e hana mahani haia, ne tolu foki e aho sapati kua vagavagahau ai a ia kia lautolu ke he tau Tohi,
3 Kua fakamatala mo e fakakite atu, kua lata he mamahi a Keriso, mo e liu foki tu mai a ia ia lautolu kua mamate; mo e pehe atu, Ko Iesu a enai, kua talahau atu ai e au kia mutolu, ko e Keriso a ia.
4 Kua talia fakatonu mai foki e falu ha lautolu, ti lafi age a lautolu kia Paulo mo Sila; ko e tau tagata Heleni foki ne matakutaku ke he Atua ne tokologa ni; mo e tau iki fifine ne tokologa.
5 Ka ko e tau tagata Iutaia nakai fanogonogo, kua mahekeheke a lautolu, kua ta mai ke fakalataha mo lautolu e falu a tagata kelea mo e neva fano, ti fakapotopoto e lautolu e moto tagata, mo e go falelea ai ke he māga; ti kua lagaatu ai ke he fale a Iasona, mo e kumi ai a laua ke takitaki ki fafo ke he tau tagata.
6 Nakai moua a laua, ati toho atu ai e lautolu a Iasona mo e falu he tau matakainaga ke he tau iki fakafili, ha ne tauhea atu, Ko e tau tagata nai kua fakatupu e fakaagitau ni ke he lalolagi oti, ti kua hohoko mai foki a lautolu ki hinei;
7 Kua talia foki a lautolu e Iasona. Kua eke foki e lautolu oti kana nai e tau mena nakai lata mo e tau poaki a Kaisara, kua tala mai, ko Iesu ko e taha patuiki a ia.
8 Kua fakatupu ai e lautolu e fakaatukehe ke he motu o tagata katoa mo e tau iki fakafili, kua fanogonogo mai ke he tau mena ia.
9 Kua kotofa a lautolu e palepale ke ta mai e Iasona mo e falu, ati tuku atu ai a lautolu ke o.
10 Ati fakafano atu ai agataha he tau matakainaga a Paulo mo Sila he po ki Perea; kua hoko ki ai a laua, ati huhu atu ai a laua ke he sunako he tau tagata Iutaia.
11 Kua mua e mahani mitaki ha lautolu nai ke he tau tagata Tesalonia; ha kua talia e lautolu e kupu mo e loto makutu, kua kumikumi ke he tau Tohi ke he taha aho mo e taha aho, po ke moli e tau mena ia.
12 Ko e mena ia ne tua ai he tokologa ha lautolu, mo e tau iki fifine Heleni, katoa mo e tau tane tokologa.
13 Ka kua iloa he tau tagata Iutaia i Tesalonia, kua fakamatala e Paulo e kupu he Atua i Perea, ati o atu ai a lautolu, mo e fakalagalaga e motu o tagata.
14 Ti fakafano kehe ai agataha he tau matakainaga a Paulo, ke hifo ni ki tahi; ka e nonofo ai a Sila mo Timoteo.
15 Ko lautolu foki ne fakafano a Paulo kua uta e lautolu a ia ki Atenai; kua poaki mai foki a ia kia lautolu ke tala age kia Sila mo Timoteo, kia vave mai ni a laua kia ia; ti liliu ai na lautolu.
16 Kua tatali atu a Paulo kia laua i Atenai, kua hukia lahi hifo hana loto, he kitia e ia e māga kua puke ke he tau tupua.
17 Ti kua vagavagahau ai a ia ke he sunako ke he tau tagata Iutaia, mo e tau tagata matakutaku ke he Atua, katoa foki mo lautolu ne feleveia mo ia ke he male he tau aho oti.
18 Ti taufetoko mai ai falu he tau tagata fia iloilo he vahega a Epikuro, mo e vahega a Sitoiko; kua pehe mai foki e falu, Kua fia talahau ha he tagata fa lako nai? ka a pehe mai e falu, Tokai kua talahau mai e ia e tau atua kehe heutehepihia; nukua fakamatala atu e ia kia lautolu e tala mitaki kia Iesu, mo e liu foki tu mai.
19 Kua uta e lautolu a ia, kua takitaki atu ki Areopako kua pehe age, Kua fia iloa e mautolu po ke heigoa e kupu fou nai kua vagahau ai e koe?
20 Ha kua ogo mai e koe e falu a mena kehe ke he tau teliga ha mautolu, ko e mena ia kua fia iloa ai e mautolu, po ke heigoa e kakano he tau mena nai.
21 (Ha ko e mena kua nakai eke taha mena he tau tagata Atenai oti, katoa mo e tau tagata kehe kua nonofo ai, ka ko e vagahau atu mo e fanogonogo mai ke he tau tala fou hokoia.)
22 Ati tu ai a Paulo i Areopako, kua pehe age a ia, Ko e tau tagata Atenai na e ma fanau, kua kitia e au ke he tau mena oti kana kua mua a mutolu he tapuaki ke he tau atua.
23 Ha ko e mena ne fina atu au, mo e kitekite ke he tau mena tapu ha mutolu, ti kitia atu ai e au e taha fatapoa kua tohi ki ai, MO E ATUA NAKAI ILOA. Hanai, ko ia kua tapuaki ki ai a mutolu, mo e nakai iloa, kua fakamatala atu ai e au kia mutolu.
24 Ko e Atua ne eke e lalolagi mo e tau mena oti kana ha ha i ai, ha ko e Iki a ia he lagi mo e lalolagi, nakai haele a ia ke he tau faituga ne eke he tau lima;
25 Ti nakai ko e tau lima he tau tagata ke fekafekau ai kia ia, tuga e mena kua nofogati a ia ke he taha mena; kua foaki mai e ia e moui, mo e fafagu, mo e tau mena oti kana ke he tau mena oti;
26 Kua eke foki e ia e tau motu oti he tau tagata ke he toto taha, ke nonofo ai ke he fuga kelekele oti kana, kua tuku foki e tau tau ne kotofa tuai mo e tau katofia he tau mena ke nonofo ai a lautolu;
27 Kia kumi a lautolu ke he Iki, po ke maeke he tamotamo a lautolu mo e kitia e lautolu a ia; ka e nakai ni mamao a ia mo tautolu takitokotaha.
28 Ha ko e mena kua momoui a tautolu ia ia, mo e gahuahua ia ia, ha ha i ai foki a tautolu ia ia; tuga he tala mai foki e falu a fatilologo ha mutolu; Ha ko e hana fanau a tautolu.
29 Hanai, ha ko e fanau he Atua a tautolu, nakai lata he manatu a tautolu kua tatai e Atua mo e auro, po ke ario, po ke maka, kua laku he tufuga mo e fatuakiloto he tagata.
30 Kua nakai manamanatu ki ai e Atua ke he vaha ne goagoa ai; ka kua tala mai ainei ke he tau tagata oti he tau motu oti kana ke tokihala.
31 Ha ko e mena kua kotofa e ia e aho ke fakafili ai e lalolagi mo e tututonu he tagata kua kotofa ne ia; kua fakamoli mai ai e ia ke he tau tagata oti kana, he fakatu mai e ia a ia ia lautolu kua mamate.
32 Kua logona e lautolu e liu foki tutu mai e tau tagata ne mamate, ati va mai ai falu; ka e pehe mai e falu, To liu foki fanogonogo atu a mautolu kia koe he kupu nai.
33 Ati fina atu ai a Paulo ke he vaha loto ha lautolu.
34 Ka kua pipiki mai e falu a tagata kia ia, mo e tua; ha i ai a Taionesio ko e tagata Areopako, mo e fifine kua higoa ko Tamari, mo e falu foki fakalataha mo laua.