Gahua 2:1-47
2 KUA hoko atu foki ke he aho Penetekoso, ha ha i ai a lautolu oti kana ke he mena taha mo e loto fakalataha.
2 Ati fakaofo mai ai he tomumu mai he lagi tuga ne matagi kua havili lahi mai, kua puke oti ai e fale ne nonofo ai a lautolu.
3 Ne kitia foki e lautolu e tau alelo tuga ne afi kua mavehevehe kua nofo ki luga ha lautolu takitokotaha.
4 Ne fakapuke foki a lautolu oti ke he Agaga Tapu, kua kamata ai he vagahau ke he tau vagahau kehekehe tuga he foaki mai he Agaga e vagahau kia lautolu.
5 Ne nonofo i Ierusalema e tau tagata Iutaia, na matakutaku ke he Atua, mai he tau motu oti kana he lalolagi.
6 Kua eke foki e tomumu ia ati fakapotopoto mai ai e moto tagata, ti fakahakuhaku a lautolu ha ko e mena takitaha mo e fanogonogo atu kia lautolu kua vagahau mai ke he hana ni a vagahau.
7 Kua hohopo oti ai ha lautolu a tau ate, mo e ofo ai, kua fevagavagahauaki a lautolu, Kitiala, nakai kia ko e tau tagata Kalilaia a lautolu oti ni ne vagahau mai?
8 Fefe foki a tautolu he takitaha mo e fanogonogo atu ke he hana ni a vagahau ne tupu mo ia?
9 Ko e tau tagata Paretia, mo e tau tagata Matai, mo e tau tagata Elama, mo lautolu ne nonofo i Mesopotamia, i Iutaia mo Kapatokia, i Pono mo Asia,
10 Ne nonofo i Ferukia mo Pafulia, i Aikupito mo e fahi ko Lipua kua katofia mo Kurene, ko e tau tagata Roma foki ne paea, ko e tau tagata Iutaia mo e faoa kehe kua liogi,
11 Ko e tau tagata Kereta mo e tau tagata Arapi; kua fanogonogo atu a tautolu kia lautolu ha ne talahau mai ke he tau vagahau ha tautolu e tau mana he Atua.
12 Kua hohopo e tau ate ha lautolu oti, mo e fakahakuhaku, kua fevagavagahauaki, Ko e heigoa e kakano he mena nai?
13 Ka ko falu kua va a lautolu, kua pehe age, Kua konahia e tau tagata na ke he uaina humelie.
14 Ati tu ai a Peteru katoa mo e tokohogofulu ma taha, kua talatala atu mo e fakaleo lahi, kua pehe atu kia lautolu, Ko e tau tagata Iutaia na e, katoa mo lautolu oti kua nonofo i Ierusalema, kia iloa e mutolu e mena nai, mo e fakateliga mai ke he haku a tau kupu.
15 Ha ko e mena kua nakai konahia e tau tagata nai, tuga ne manatu e mutolu; ha ko e magaaho tolu hanai.
16 Ka ko e mena hanai ne tala mai ai e perofeta ko Ioelu,
17 Ko e tau aho fakamui, ne pihia mai e Atua to liligi hifo ai e au haku a Agaga ki luga he tau tagata oti kana; ati perofeta mai ai ha mutolu a tau tama tane mo e ha mutolu a tau tama fifine, to kitia foki he tau fuata ha mutolu e tau fakakiteaga, ti miti foki mo e ha mutolu a tau fuakau.
18 Ko e tau aho ia ke liligi hifo ai e au haku Agaga ki luga he haku a tau fekafekau tane mo e haku a tau fekafekau fifine, ti perofeta mai ai a lautolu.
19 To eke foki e au e tau mana ke he lagi i luga, mo e tau fakamailoga ke he lalolagi i lalo; ko e toto, mo e afi, mo e ahua kua fakatupou.
20 To faliu fakamua e la ke he pouli, mo e mahina ke he toto, to hoko mai e aho he Iki kua lahi mo e talahaua.
21 To fakamomoui foki a lautolu oti kana ke ui atu ke he higoa he Iki.
22 Ko e tau tagata Isaraela na e, fanogonogo mai a ke he tau kupu nai; ko Iesu ko e Nasareta, ko e tagata kua fakakite fakatonu he Atua kia mutolu ke he tau mana, mo e tau mena ke ofo ai, mo e tau fakamailoga, ne eke he Atua ki mua ha mutolu kia ia, tuga he kitia foki e mutolu.
23 Ko ia ne tuku mai he pule tonu mo e fioia he Atua i tuai, ne moua e mutolu, mo e fakamau e mutolu ke he akau, mo e kelipopo ke he tau lima he tau tagata hala.
24 Ko ia ne fakatu mai he Atua, kua vevete e ia e matematekelea he mate, ha ko e mena nakai maeke he mate ke taofi ai a ia.
25 Ha ko e mena tala mai e Tavita kia ia, Ne kitia e au e Iki ha i mua haku nakai noa; ha ko e mena ha ha he tapa matau haku a ia, neke fagahuatia ai au.
26 Ko e mena haia ne fiafia ai hoku loto, mo e olioli ai hoku alelo; ke okioki ai foki hoku tino mo e fakatalitali;
27 Ha ko e mena nakai toka e koe hoku agaga ki hate; nakai tuku atu foki e koe hau a tagata tapu kia hoko ki ai e popo.
28 Kua fakakite mai e koe kia au e tau puhala he moui; to fakapuke mai e koe au ke he fiafia ki ho mua.
29 Ko e tau matakainaga na e ma fanau, to vagahau fakatonu atu e au ni kia mutolu ke he tupuna ko Tavita, ne matulei a ia, ti tanu ni, ha ha ia tautolu foki hana tukuaga kua hoko mai ke he vaha nai.
30 Ko e hanai foki, ha ko e perofeta a ia, mo e iloa e ia kua tala mai e Atua kia ia mo e omonuo, ke fakatu mai ni e ia e Keriso mai he hana fanau ha he tino ke nofo ai a ia ke he hana nofoaiki;
31 Kua iloa fakamua e ia, ko e mena ia kua vagahau mai ai a ia ke he liu tu mai a Keriso, kua nakai toka a ia ki hate, ti nakai hoko foki e popo ke he hana tino.
32 Ko Iesu hanā kua liu fakatu mai he Atua, ko e tau tagata talahau a mautolu oti ke he mena ia.
33 Hanai, ha kua fakatokoluga a ia he lima matau he Atua, mo e moua mai e ia he Matua e talahauaga he Agaga Tapu, kua liligi hifo e ia e mena nai kua kitia e mutolu mo e fanogonogo ai nai.
34 Ha ko e mena nakai hake a Tavita ke he lagi, ka kua pehe mai a ia, Kua tala age e Iki ke he haku a Iki, Ati nofo a a koe ke he haku a fahi matau,
35 Ato eke e au a lautolu kua fai fi kia koe mo fakatuaga hui hāu.
36 Hanai kia iloa māli he faoa oti ni a Isaraela, ko Iesu ia ni ne fakasatauro e mutolu, kua eke he Atua a ia mo Iki mo e Keriso.
37 Kua fanogonogo mai a lautolu, ati hukia ai ha lautolu a tau loto; ti pehe mai a lautolu kia Peteru mo e tau aposetolo oti, Ko e tau matakainaga na e ma fanau, ko e heigoa kia e mena ke eke e mautolu?
38 Ati tala age ai a Peteru kia lautolu, Ati tokihala a, ti takitaha mo e papatiso a mutolu oti ke he higoa a Iesu Keriso; mo e fakamagaloaga he tau hala; ati moua ai e mutolu e mena foaki noa mai, ko e Agaga Tapu haia.
39 Ha ko e ha ha ia mutolu mo e ha mutolu a tau fanau e talahauaga, katoa mo lautolu oti ne mamao, ko lautolu oti ni ka ui ki ai he Iki ha tautolu a Atua.
40 Ko e falu a kupu loga foki ne talahau fakatonu atu e ia mo e tomatoma atu ai, kua pehe atu, Kia fakamomoui a a mutolu mai he hau fakakeukeu nai.
41 Ati papatiso ai a lautolu ne talia hana kupu mo e fiafia; ko e aho foki ia kua lafi ai po ke tolu e afe tagata.
42 Kua tumau a lautolu ke he tau kupu he tau aposetolo, mo e fakafetui, mo e tofitofiaga he areto, mo e tau liogi.
43 Ti kua hoko e matakutaku ke he tau tagata oti; kua eke foki he tau aposetolo e tau mana mo e tau fakamailoga loga.
44 Kua fakalataha foki e tau tagata oti kana ne tua, kua tuku fakalapalapa ha lautolu a tau mena oti kana;
45 Kua fakatau foki ha lautolu a tau fonua mo e tau koloa, mo e tufatufa e taui ke he tau tagata oti, fakalata ke he mena kua nofogati ai e tagata.
46 Kua nonofo mau a lautolu ke he faituga mo e loto fakalataha ke he taha aho mo e taha aho, kua tofitofi foki e areto ke he tau fale, kua kai e lautolu ha lautolu a tau mena kai mo e fiafia mo e loto fakamoli;
47 Kua fakaheke atu a lautolu ke he Atua, kua ofania foki he motu oti kana. Kua lafilafi he Iki ke he ekalesia ke he taha aho mo e taha aho a lautolu kua fakamomoui.