Gahua 20:1-38
20 KUA oti he mumu, ati ahi atu ai e Paulo e tau tutaki, kua mavehe mo lautolu; ti fano ai a ia, kua fina atu ki Maketonia.
2 Kua fano a ia ke he tau magamotu ia, kua oti foki he tomatoma atu kia lautolu he tau kupu loga, ti hoko ai a ia ki Heleni.
3 Ko e tolu mahina i ai; kua takahao foki e tau tagata Iutaia kia ia, ko e fano ne fai halavaka a ia ki Suria; ti manatu ai a ia ke liu hala Maketonia.
4 Ne o fakalataha mo ia ki Asia, ko Sopata i Perea; ko Aritako, mo Sikuno i Tesalonia; mo Kaio i Terepe, mo Timoteo; ko Tuiko foki, mo Tofimo i Asia.
5 Kua mumua atu a lautolu na, mo e leo mai kia mautolu i Tiroa.
6 Kua mole e tau aho he tau areto nakai fakaea, ti o atu ai a mautolu halavaka mai Filipi, ti hoko atu kia lautolu ke he po lima ki Tiroa; ne po fitu he nonofo ai a mautolu.
7 Ko e aho fakamua foki he fahitapu kua fakapotopoto ai e tau tutaki ke tofitofi ai e areto kua vagavagahau atu a Paulo kia lautolu, ko e fano ne fai a ia a pogipogi; kua fakaleva foki e ia hana tau kupu kua hoko ke he tuloto po.
8 Ne loga foki e tau lamepa ke he poko tapa ki luga, ne fakapotopoto ai a lautolu.
9 Kua nofo foki e taha fuata, ko Eutuko e higoa, ke he fakamaama, kua moua he pulumohea; kua leva foki e vagavagahau a Paulo, kua hoko ni kia ia e mohe, ati to hifo ai a ia mai luga he tolu e fata he fale, kua lagaaki a ia kua mate tuai.
10 Ti hifo ai a Paulo, kua fakafohifo ki luga ia ia, kua peka foki kia ia, mo e tala age, Ua tagi hake a mutolu, ha ko e mena ha ia ia hana moui.
11 Kua liu hake foki a ia ki luga, kua tofitofi e areto, mo e kai, ti vagavagahau fakalevaleva, ato aho, ati fano ai a ia.
12 Kua takitaki mai foki e lautolu e tama kua moui, ti fiafia lahi ai a lautolu.
13 Ne mumua foki a mautolu hala vaka, mo e o atu a mautolu ki Aso, ke tatali ai a mautolu kia Paulo ke he mena ia; ha ko e mena ne pihia he kotofa e ia, ka e fano a ia hala uta.
14 Kua fakalataha foki a ia mo mautolu i Aso; ti talia ai e mautolu a ia; ati o atu ai ki Metulene.
15 Ti o atu ai halavaka he mena ia, kua hoko foki a mautolu a pogipogi ke he fahi hifo ki Kio; ati hoko atu ai a mautolu anoiha ki Samo; kua nonofo a mautolu i Tokulio; ati hoko atu ai a mautolu ke he aho atu ki Mileto.
16 Ha kua manatu e Paulo ke o leva, nakai afe ki Efeso, neke fakaleva hana nofo i Asia; mena alumaki a ia, po ke maeke ke hoko atu, kia ha i ai i lerusalema a ia ke he aho Penetekoso.
17 Kua fakafano atu e ia e falu i Mileto ki Efeso ke ahi e tau patu he ekalesia.
18 Kua hoko mai a lautolu kia ia, ti pehe age ai a ia kia lautolu, Kua iloa e mutolu, tali mai he aho ne hoko mai ai au ki Asia, haku a mahani he tau tau oti he nofo ai au ia mutolu.
19 Ne fekafekau au ke he Iki mo e loto holoilalo, mo e tau hihina mata loga, mo e tau mena kamatamata ne hoko kia au he tau takahao he tau tagata Iutaia;
20 Ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale;
21 Kua talahau fakatonu e au ke he tau tagata Iutaia, katoa mo e tau tagata Heleni e tokihala ke he Atua, mo e tua ke he Iki ha tautolu ko Iesu Keriso.
22 Kitiala, ko e fano ne fai au ainei ki Ierusalema kua lili hoku loto; nakai iloa e au e tau mena ke hoko mai kia au ke he mena ia;
23 Ko e mena nai hokoia, kua talahau fakatonu mai he Agaga tapu ke he taha māga mo e taha māga, kua pehe mai, kua leo mai e tau liliaga mo e matematekelea kia au.
24 Ka ko au ni, nakai manatu au ke he taha mena, ko e haku a moui foki nakai kuku e au, ka kia fakaoti e au haku a poitufi mo e fiafia, ko e feua ne moua e au mai he Iki ko Iesu, kia talahau fakatonu atu e au e tala mitaki he fakaalofa noa he Atua.
25 Ko e hanai, kitiala, kua iloa e au, nakai tuai kitia haku a mata e mutolu oti kana ne fai fano ai au, mo e fakamatala atu ai e kautu he Atua.
26 Ko e mena ia kua talahau atu ai e au kia mutolu ke he aho nai ni, kua mea na au he toto he tau tagata oti.
27 Ha ko e mena kua nakai toka e au taha kupu, neke nakai fakailoa atu kia mutolu e finagalo oti he Atua.
28 Hanai, a mutolu kia mutolu, katoa mo e fuifui mamoe oti kana kua kotofa a mutolu he Agaga Tapu ke eke ai mo leoleo, kia leveki e ekalesia he Atua ne fakafua e ia māna ke he hana toto ni.
29 Kua iloa e au ka mole haku a fano to hoko mai kia mutolu e tau luko favale, nakai fakahelehele e fuifui mamoe.
30 To tutupu foki ia mutolu ni e tau tagata ke vagahau mai ke he tau mena fakakeukeu, to futiaki ai e tau tutaki kia mumui atu kia lautolu.
31 Ko e mena ia kia mataala ai a mutolu, mo e manatu ā ne tolu la e tau nakai okioki au ke he po mo e aho he tomatoma atu mo e tau hihina mata ke he tau tagata takitokotaha.
32 Hanai, kua tuku atu e au a mutolu ke he Atua, mo e kupu he hana fakaalofa noa, ko ia ne maeke ai ke ati hake a mutolu, mo e foaki atu kia mutolu e tufaaga fakalataha mo lautolu oti kana kua fakatapuina.
33 Kua nakai manako au ke he ario, po ke auro, po ke tapulu a taha.
34 Kua iloa foki e mutolu kua fekafekau mai e tau lima nai ke he tau mena ke lata ke he haku a tino, katoa mo lautolu ha ha ia au.
35 Kua fakailoa atu e au kia mutolu ke he tau mena oti kana, kia pihia he gahua a mutolu, kia lagomatai ke he tau tagata lolelole ke lata ai, mo e manatu a mutolu ke he tau kupu he Iki ko Iesu, ne pehe mai a ia, Kua mua e monuina hana ke foaki atu, ke he monuina hana ke talia mai.
36 Kua mole atu e tau kupu ia, ati fakatokotui ai a ia, kua liogi fakalataha mo lautolu oti.
37 Ne tagi lahi a lautolu oti kana, mo e peka kia Paulo, mo e taufigita kia ia.
38 Kua mua foki he hukia a lautolu ke he kupu ne tala atu ai a ia, nakai tuai kitia e lautolu hana mata. Ati fakafano ai e lautolu a ia ke he foulua.