Gahua 21:1-40
21 KUA o kehe a mautolu ia lautolu, ati tukuvaka atu ai mo e fano fakahako atu ki Koi; ko e pogipogi foki kua hoko ai ki Roto, ati o atu ai foki ki Patara.
2 Kua moua foki e foulua ko e fano ha ne fai ki Foinike, ti o hake ai a mautolu mo e tukuvaka atu ai.
3 Kua kitia atu foki e mautolu a Kuperu, kua toka atu ki tua ke he fahi hema, ti o atu ai ki Suria, mo e hake ki uta a mautolu i Turo; ha ko e mena ia ke ta hake ai e tau mena ne uta ai he foulua.
4 Kua moua foki e mautolu e tau tutaki, ti nonofo ai a mautolu po fitu; kua tala age a lautolu kia Paulo ke he Agaga, Aua neke hake ki Ierusalema.
5 Kua oti e tau aho ia kia mautolu, ti o kehe ai a mautolu, mo e o atu; ha ne fakafano a mautolu e lautolu oti, katoa mo e tau hoana, mo e tau fanau, kua hohoko ki tua he māga; ati fakatokotui ai a mautolu ke he mataafaga, mo e liogi.
6 Kua oti he mavehevehe, ati o hake ai a mautolu ke he foulua; ka kua liliu atu a lautolu ke he tau magafaoa ha lautolu.
7 Kua hohoko a mautolu ki Tolumai mai Turo, kua fakaoti ai ha mautolu a fenoga, ati feofanaki ai a mautolu mo e tau matakainaga, taha e aho ne nonofo ai a mautolu mo lautolu.
8 Ko e pogipogi, kua o atu ai a mautolu, kua hohoko ki Kaisaria; kua huhu atu a mautolu ke he fale a Filipo ko e tagata kua fakamatala e vagahau mitaki, ko e taha ia he tokofitu; kua nonofo foki a mautolu ia ia.
9 Ha ha he tagata ia e tau tama fifine ne tokofa, ko e tau tamafine tote agaia a lautolu, kua perofeta a lautolu.
10 Kua loga e tau aho ne nonofo ai a mautolu, ati hau ai a taha perofeta mai Iutaia, ko Akapo e higoa.
11 Kua hoko mai a ia kia mautolu, ati toto ai e ia e pipi a Paulo, mo e lili aki e ia hana tau lima mo e hana tau hui, kua pehe mai, Kua pehe mai e Agaga Tapu, To lili pihia i Ierusalema he tau tagata Iutaia e tagata hana e pipi e, mo e tuku atu e lautolu a ia ke he tau lima he tau tagata kehe.
12 Kua fanogonogo atu a mautolu ke he tau kupu ia, ati olelalo atu ai a mautolu, katoa mo lautolu he maga ia, aua neke hake a ia ki Ierusalema.
13 Ka kua tali mai a Paulo, Ke tagi mo e tuki malipilipi mai hoku loto he ha? ha ko e mena kua tauteute ni au nakai kuenaia he lili, ka e mate foki au i lerusalema, ha ko e higoa he Iki ko Iesu.
14 Kua nakai maeke he ole a ia, ati fakamamate ai a mautolu, kua pehe age, Kia eke a e finagalo he Iki.
15 Kua mole e tau aho ia, ti tauteute a mautolu, ti o hake ni ki Ierusalema.
16 Ne o foki mo mautolu e falu a tutaki mai Kaisaria; ne ta mai e lautolu e taha tagata Kuperu, ko Nasona, ko e tutaki mai tigahau ke api a mautolu mo ia.
17 Kua hoko foki a mautolu ki Ierusalema, ti talia mai ai a mautolu he tau matakainaga mo e fiafia.
18 Ko e pogipogi kua fina atu ai a Paulo mo mautolu kia Iakopo, ha i ai foki e tau patu oti.
19 Kua feofanaki mo lautolu, ati fakamatala ai e ia e tau mena oti takitaha ni ne eke he Atua ke he tau motu kehe he hana gahua.
20 Kua fanogonogo ai a lautolu, ti fakaheke ai a lautolu ke he Atua; kua tala atu foki kia ia, Ko e matakainaga na e, kua kitia e koe e tokologa afe mo afe he tau tagata Iutaia kua tua; kua fakamakutu foki a lautolu oti kana ke he fakatufono.
21 Kua talahau e lautolu a koe, kua fakaako atu ke he tau tagata Iutaia oti ke he tau motu kehe kia tiaki e lautolu a Mose, kua tala atu e koe, ua peritome ha lautolu a tau fanau, ua omaoma foki ke he tau mahani ia.
22 Hanai, po ke eke fefe? ha ko e mena logona ni e lautolu kua hau a koe.
23 Hanai, kia eke e koe e mena nai ke tala atu ai a mautolu kia koe. Ha ha ia mautolu e tau tagata ne tokofa, kua eke ha lautolu a omonuo;
24 Kia fakalataha mai a koe mo lautolu, mo e fakamea a koe fakalataha mo lautolu, mo e age e koe e tau koloa ma lautolu, kia hifipuga ai e lautolu e tau ulu ha lautolu, ke iloa ai he tau tagata oti, nakai fakamoli ha mena taha he tau mena ia ne talahaua kia koe; ka e lata ni hau a mahani mo e fakatufono.
25 Ha ko e tau motu kehe kua tua, kua oti he fifili mo e tohi atu a mautolu ki ai, aua neke omaoma a lautolu he tau mena pehena; ka kia fakamamao a lautolu mo e tau mena ne eke mo poa ke he tau tupua, mo e toto, mo e tau mena kua fofota, mo e feuaki, kuenaia.
26 Ti uta ai e Paulo e tau tagata ia; ko e pogipogi foki, kua fakamea ai a ia fakalataha mo lautolu, kua hu atu a ia ke he faituga, kua fakailoa atu e ia to fakakatoa e tau aho he fakameaaga, to eke e ia e tau poa ma lautolu takitokotaha.
27 Kua teitei oti e aho fitu, kua kitekite ai e tau tagata Iutaia mai Asia kia ia ke he faituga, ati fakalagalaga atu ai e lautolu e moto tagata oti, kua tapaki e lautolu a ia.
28 Ha ne tauhea a lautolu, Ko e tau tagata Isaraela na e, ma fanau, lagomatai mai a. Ko e tagata nai kua totoko ke he tau tagata, katoa mo e fakatufono, mo e mena nai he hana fakaako atu ke he tau tagata oti ha he tau mena oti kana; ti kua ta mai foki e ia e tau tagata Heleni ke he faituga, kua holimafafo e ia e mena tapu nai.
29 (Ha ko e mena kitia fakamua e lautolu a Tofimo ko e tagata Efeso ke he māga fakalataha mo ia, piko na lautolu kua uta e Paulo a ia ke he faituga.)
30 Kua mumu foki e maga oti kana, kua tafepoi mai ai e tau tagata; kua tapaki foki e lautolu a Paulo, mo e toho a ia ki fafo he faituga; ti papa ai agataha e tau gutuhala.
31 Kua kolo a lautolu ke kelipopo a ia, kua ogo hake ke he iki ne pule he tau kau, kua go a Ierusalema oti ni;
32 Ati uta ai agataha e ia e tau kau mo e tau takitaki he tau tokoteau, kua poi hifo kia lautolu kua kitia atu foki e lautolu e iki ne pule he tau kau mo e tau kau, ti toka ai e lautolu he keli e lautolu a Paulo.
33 Ti fakatata mai ai e iki ne pule he tau kau, kua tapaki a ia, mo e fekau ke lili a ia ke he na toua lapatoa; kua hūhu foki a ia, po ko hai a ia, po ke heigoa foki e mena kua eke e ia.
34 Kua tauhea mai foki e falu he moto tagata he taha mena, mo e falu he taha mena, kua nakai mailoga ia ia e tonu ha ko e go, ti fekau ai e ia ke uta a ia ke he kolo.
35 Kua hoko foki a ia ke he hala papahi, ti kua ta hake ai a ia he tau kau, ha ko e fakamalolo mai he moto tagata.
36 Nukua mumui mai e moto tagata kua tauhea mai pehe, Uta kehe a ia.
37 Ko e uta ha ne fai a Paulo ke he kolo, kua tala atu a ia ke he iki ne pule he tau kau, Kua aoga nakai ke tala atu e au ha kupu kia koe? Ti pehe mai a ia, Kua iloa kia e koe e kupu Heleni?
38 Ka e nakai kia ko e tagata Aikupito a koe, ne fakatupu e fakafualoto i tuai, mo e takitaki e tau tagata favale ne fa e afe ke he tutakale?
39 Ka kua tala atu a Paulo, Ko au ni ko e tagata Iutaia, ko e Taso i Kilikia, nakai ko e māga fakateaga haku a māga; kua ole atu au kia koe, kia tuku mai e koe au ke vagahau atu ke he tau tagata.
40 Kua tuku mai foki e ia, ati tu ai a Paulo ke he hala papahi, mo e alo atu hana lima ke he tau tagata. Kua fakamamate ni, ati vagahau atu ai a ia ke he kupu Heperu, kua pehe atu.