Gahua 22:1-30
22 KO e tau matakainaga na e ma fanau, mo e tau matua tane na e, fanogonogo mai a ke he haku fakatonu atu nai kia mutolu.
2 Kua fanogonogo a lautolu ha ne vagahau mai a ia kia lautolu ke he kupu Heperu, ti au atu ai he fakamamate a lautolu; ati tala atu ai a ia,
3 Ko au ni ko e tagata Iutaia, ne fanau i Taso i Kilikia, ti nofo ke he māga nai, kua ako foki au he akoaga a Kamalielu ke he tonu he fakatufono he tau matua ha tautolu, ne fakamakutu ai ke he Atua, tuga a mutolu oti kana ke he aho nai;
4 Ne favale atu foki au ke he puhala nai, kia mamate a lautolu; ne lili foki e au mo e tuku ke he tau fale puipui e tau tane katoa mo e tau fifine;
5 Tuga he talahau foki kia au he ekepoa ne mua katoa mo e tau patu oti; ne moua mai ai foki e au e tau tohi ke he tau matakainaga, ti fina atu au ki Tamaseko ke lili ai a lautolu ha i ai, mo e takitaki mai a lautolu ki Ierusalema kia fakahala a lautolu.
6 Kua fano au, kua tata atu foki ki Tamaseko, ko e tupou la kua fakaofo ai he kikila takai mai kia au e maama lahi mai he lagi.
7 Ti veli na au ke he kelekele, ti logona ai e au e leo, kua pehe mai kia au, Saulo, ma Saulo na e, ko e heigoa e mena ne favale mai ai a koe kia au?
8 Ati tali atu ai au, Ko e Iki na e, ko hai kia a koe? ti pehe mai a ia kia au, Ko au ni ko Iesu ko e Nasareta, kua favale a koe ki ai.
9 Kua kitia ni e lautolu ne fakalataha mo au e maama, kua matakutaku ai; ka e nakai logona e lautolu e leo hana ne vagahau mai kia au.
10 Ati tala atu ai au, Ko e Iki na e, ko e heigoa e mena ke eke ai e au? Ti pehe mai ai e Iki kia au, Tu a a koe ki luga, ti fano ki Tamaseko, ke talahau atu ai kia koe e tau mena oti kana kua kotofa kia koe ke eke e koe.
11 Kua nakai tuai ala haku tau mata ha ko e kikila he maama ia; ti takitaki ai au e lautolu ne fakalataha mo au; kua hoko au ki Tamaseko.
12 Ko e taha tagata ko Anania, ko e tagata mahani Atua ke lata mo e fakatufono, mo e talahaua he tau tagata Iutaia oti ne nonofo ai,
13 Ne hau a ia kia au, kua tu mai, mo e pehe mai kia au, Ko e matakainaga na e, ma Saulo, kia ala a hau a tau mata; ti kitekite ai au kia ia ke he magaaho ia ni.
14 Kua tala mai foki a ia, Kua kotofa a koe he Atua he tau matua ha tautolu, kia iloa e koe hana finagalo, mo e kitia e koe a ia kua Tututonu, mo e fanogonogo atu a koe ke he leo mai he hana fofoga.
15 Ha ko e mena to eke a koe mo ogo kia ia ke he tau tagata oti kana ke he tau mena ia ne kitia e koe mo e fanogonogo a koe ki ai.
16 Hanai, ko e heigoa foki e mena ke fakamule ai a koe? Tu a, mo e papatiso a koe, mo e holoholo kehe hau a tau hala, mo e ui atu ke he higoa he Iki.
17 Ne liu atu au ki Ierusalema, ha ne liogi au ke he faituga, ati hekeatua ai au.
18 Ti kitia e au a ia kua vagahau mai kia au, Fakaave a, kia alumaki a koe ke fano kehe i Ierusalema, ha ko e mena nakai talia e lautolu hau a talahau kia au.
19 Ti pehe atu au, Ko e Iki na e, kua iloa e lautolu ne mahani au ke tuku ke he tau fale puipui, mo e fahi ke he tau sunako a lautolu ne tua kia koe;
20 Ko e vaha foki ne maligi ai e toto he hau a tagata talahau, ko Setefano, ne tu ai au mo e loto fakalataha mo lautolu, ti leveki e au e tau tapulu ha lautolu ne kelipopo a ia.
21 Ti pehe mai a ia kia au, Ati fano a, ha ko e mena to fakafano atu e au a koe ke he tau motu kehe ne mamao.
22 Kua fanogonogo mai a lautolu kia ia kua hoko ke he kupu na, ati tauhea mai ai a lautolu, kua pehe mai, Uta kehe a e tagata na he lalolagi; ha kua nakai lata ke moui a ia.
23 Ha ne miha a lautolu, kua lulu ha lautolu a tau tapulu, mo e liti hake e tau efuefu ki luga.
24 Kua poaki age e iki ne pule he tau kau kia uta a ia ke he kolo, kua tala age foki kia hūhu kia ia mo e fahi, kia iloa ai e ia e mena kua tauhea mai ai pihia kia ia.
25 Ha ne lili e lautolu a ia ke he tau pipi, ti pehe age ai a Paulo ke he takitaki he tokoteau ne tu mai, Ka e nakai kia ko e mena tapu kia mutolu ke fahi e tagata Roma, kua nakai fakahala?
26 Kua logona he takitaki he tokoteau, ati fano ai a ia mo e tala age ke he iki ne pule he tau kau, kua pehe age, A koe ke he mena ka eke e koe, ha ko e tagata Roma hanā.
27 Ati hau ai e iki ne pule he tau kau, kua pehe age kia ia, Tala mai a kia au, ko e Roma kia a koe? Ti tala age a ia, E.
28 Ati tala age ai e iki ne pule he tau kau, Ne loga e tau tupe ne fakafua aki e au kia eke au mo tagata he māga ia. Ka e pehe atu e Paulo, Ko au ne fanau mai ai.
29 Ati o kehe ai agataha ia ia a lautolu ne eke ke hūhu kia ia; kua matakutaku foki e iki ne pule he tau kau he iloa ko e tagata Roma a ia, mo e lili e ia a ia.
30 Ko e pogipogi kua fia iloa ai e tonu he mena ne hokotaki ai a ia he tau tagata lutaia, ati vetevete e ia a ia, mo e poaki atu ke he tau ekepoa ne mua, mo e fakapotopotoaga oti ke o mai; ati takitaki hifo ai e ia a Paulo, mo e tuku atu a ia ki mua ha lautolu.