Gahua 24:1-27
24 KUA to e aho lima, ati hifo ai e ekepoa ne mua ko Anania, katoa mo e tau patu, mo e taha tagata vagahau pulotu, ko Teretulo e higoa, ke fakailoa atu e lautolu e tau mena ke he iki kia Paulo.
2 Kua ui kia ia, ati kamata ai e Teretulo ke hokotaki, kua pehe age, Ko e iki na e ma Feliki, ha ia mautolu e mafola lahi ha ko koe, ha ne eke foki e tau mena ke tonu mitaki ai e motu nai he hau a manamanatu pulotu.
3 Kua talia fakamitaki atu e mautolu ke he tau aho oti, katoa mo e tau motu oti, mo e fakaaue lahi atu.
4 Neke fakalavelave mau au kia koe, kua olelalo atu au kia fanogonogo mai mo e hau a fakaalofa kia mautolu ke he tau kupu gahoa.
5 Ha ko e mena moua e mautolu e tagata nai, ko e fakahoha mo e fakatupu e fakafualoto ke he tau tagata Iutaia oti ke he lalolagi, mo e takitaki he vahega he tau tagata Nasareta.
6 Ne eke foki a ia ke holi e faituga; kua tapaki e mautolu a ia, mo e fia fakafili e mautolu a ia ke lata mo e ha mautolu a fakatufono;
7 Ka kua hoko age a Lusia, ko e iki kua pule he tau kau, ti uta a ia mo e fakamalolo lahi mai he tau lima ha mautolu.
8 Ne poaki atu a ia kia lautolu ne hokotaki a ia ke o mai kia koe; ka fakafili e koe a ia ti maeke ai ke iloa fakatonu e koe e tau mena oti kana kua hokotaki atu ai e mautolu a ia.
9 Mena kau fakalataha foki e tau tagata Iutaia, ha ne talahau, kua pihia ni e tau mena na.
10 Kua tugaki atu e iki kia Paulo ke vagahau mai; ati tali atu ai a ia, Kua iloa e au, kua loga e tau tau ne eke e koe mo fakafili he motu nai, ti au atu ai haku a fiafia ke fakatonu atu e au haku a mahani;
11 Ha ko e mena kua maeke he fioia e koe, kua tu e aho hogofulu ma ua hokoia tali mai he hake au ke hufeilo i Ierusalema.
12 Nakai moua e lautolu au ke he faituga, po ke tau sunako, po ke māga, kua taufetoko mo taha, po ke fakalagalaga ke he moto tagata.
13 Kua nakai maeke ia lautolu he fakamoli e tau mena ia kua hokotaki mai ai e lautolu au.
14 Ka e tokutoku atu e au e mena nai kia koe, mena fekafekau au ke he Atua he tau matua ha mautolu ke lata mo e puhala ne talahaua e lautolu ko e vahega; kua talia e tau mena oti kana kua tohi ke he fakatufono katoa mo e tau perofeta;
15 Ha ha ia au e amaamanaki ke he Atua, kua taofi foki e lautolu nai, ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.
16 Ko e mena ia kua lali ai au, kia moua e au e loto manamanatu hifo mitaki ki mua he Atua katoa mo e tau tagata ke he tau aho oti.
17 Kua mole foki e tau tau loga, ati fano ai au ke ta atu e tau mena fakaalofa katoa mo e tau poa ke he haku a motu.
18 Kua eke e tau mena ia, ti moua au he falu a tagata Iutaia mai Asia, kua fakamea au ke he faituga, kua nakai mumu mai e tau tagata, ti nakai go foki.
19 Kane o mai a lautolu ki hinei ki ho mua po kua lata ai, kia hokotaki au, kaeke kua toka ai ha mena kia au.
20 Ka nakai, ti talahau mai a lautolu na po ke ne moua nakai e lautolu ha mahani hepehepe ia au he tu au ki mua he fakapotopotoaga;
21 Ko e kupu taha hokoia ne ui atu ai au he tu au ki mua ha lautolu, Ko e liliu tutu mai ha lautolu kua mamate kua fakafili ai au e mutolu he aho nai.
22 Kua fanogonogo a Feliki ke he tau kupu ia ati fakamule mai ai a ia kia lautolu, kua iloa mitaki foki e ia e kakano he puhala nai, kua pehe age, Ka hau e iki kua pule he tau kau ko Lusia, to kumi fakamakutu e au ha mutolu a tau mena.
23 Kua poaki atu foki a ia ke he takitaki he tokoteau ke leoleo a Paulo, ka e toka ke fai fano; aua foki neke hataki atu taha he hana faoa ke fekafekau atu kia ia, po ke fina atu kia ia.
24 Kua mole foki e falu a aho ati o mai ai a Feliki mo Tusila hana hoana, ko e fifine Iutaia, kua ahi atu kia Paulo, ti fanogonogo atu kia ia ke he tua kia Keriso.
25 Kua vagahau mai a ia ke he tututonu, mo e nakai matagaoi, mo e fakafiliaga ne tatali, kua hopo ai e ate a Feliki, mo e tala age, Kia fano a a koe ke he aho nai, ka moua foki e au e taha aho atā, to ahi atu ai e au a koe.
26 Kua tatali foki a ia ke he tau tupe ke foaki age e Paulo māna, ko e mena ia ne au atu ai he ahi kia vagavagahau mo ia.
27 Kua mole foki ua e tau, ati hukui ai a Pokio Feso kia Feliki; kua loto foki a Feliki ke fakafiafia e tau tagata Iutaia, ati toka ai e ia a Paulo kua lili.