Gahua 25:1-27
25 KUA hoko foki a Feso ke he hana magakautu, kua mole po tolu, ati hake ai a ia mai Kaisaira ki Ierusalema.
2 Ati fakailoa atu ai kia ia he ekepoa ne mua mo e tau iki a Iutaia kia Paulo kua ole atu foki a lautolu kia ia,
3 Kua olelalo atu foki kia fakaalofa mai ke he tau mena ia Paulo, kia ahi atu kia ia ke hau ki Ierusalema; kua lamalamati e lautolu ke kelipopo a ia he magahehala.
4 Ka kua tala mai e Feso, ke leoleo a Paulo i Kaisaira; nakai mule foki he fina atu a ia ki ai.
5 Kua tala atu a ia, Kia o hifo e tau iki ha mutolu, mo e hokotaki atu ai e lautolu e tagata nai, kaeke kua fai mena kia ia.
6 Kua nofo foki a ia ia lautolu he tau aho ne valu po ke hogofulu, ati hifo ai a ia ki Kaisaria; ko e pogipogi kua nofo ai a ia ke he nofoa fakafili, mo e fekau atu kia takitaki mai a Paulo.
7 Kua hoko mai a ia, ati agaagai ai a ia he tau tagata Iutaia, ko lautolu ne o mai i Ierusalema kua talahau mai e tau mena loga mo e mamafa kia Paulo, kua nakai maeke ia lautolu ke fakamoli.
8 Kua fakatonu atu e ia a ia, Nakai ni hala au ke he fakatufono a Iutaia, po ke faituga, po ko Kaisara.
9 Ka ko Feso, kua loto a ia ke fakafiafia e tau tagata Iutaia kua tala age ai a ia kia Paulo, kua pehe age, Po kua loto nakai a koe ke hake ki Ierusalema, kia fakafili ai a koe hoku mua ke he tau mena nai?
10 Ka e pehe age a Paulo, Ha ne tu nai au ki mua he nofoa fakafili a Kaisara, kua lata kia fakafili ai au; kua nakai eke e au taha mahani hepehepe ke he tau tagata Iutaia, kua iloa tonuhia e koe.
11 Kaeke kua mahani hepehepe au, po ke eke e au taha mena ke lata ke mate ai, nakai ole au, aua neke mate; kaeke kua nakai fakamoli taha mena he tau mena ia kua hokotaki mai ai kia au, nakai maeke ia taha ke tuku atu au kia lautolu. Kua ui atu au kia Kaisara.
12 Ti fevagavagahauaki a Feso mo lautolu ne pule, ati tala mai ai a ia, Kua ui atu kia a koe kia Kaisara? To fano ni a koe kia Kaisara.
13 Kua mole e falu a aho, ati o mai ai e patuiki ko Akeripa mo Perenike ki Kaisaria, ke fakaalofa kia Feso.
14 Kua loga e aho kua nonofo ai a laua, ati fakailoa age e Feso ke he patuiki e tala kia Paulo, kua pehe age, Ne toka e Feliki e taha tagata kua lili;
15 Ne nofo foki au i Ierusalema, ti fakailoa mai ai he tau ekepoa ne mua mo e tau patu Iutaia, kua ole mai foki ke fakahala a ia.
16 Ati tala atu ai au kia lautolu, Nakai ko e mahani ia a Roma ke tuku atu e taha tagata ke mate, ato fehagaoaki a ia kua hokotaki ki ai mo lautolu ne hokotaki mai kia ia, mo e tuku atu kia ia ke fakatonu mai e mena ne hokotaki ai a ia.
17 Kua hohoko mai foki a lautolu ki hinei, ti nakai fakamule au, kua nofo he pogipogi ke he nofoa fakafili, mo e tala atu kia takitaki mai e tagata.
18 Kua tutu mai a lautolu ne hokotaki mai kia ia, kua nakai talahau mai e lautolu ha mena ne manatu au ki ai;
19 Ka kua tala mai e lautolu kia ia e tau kupu ke he ha lautolu a tapuakiaga, mo e taha tagata ko Iesu kua mate, kua talahau e Paulo kua moui.
20 Kua mahalohalo foki au, po ke fefe e tau kupu ia, ati hūhu atu ai au, po ke loto a ia ke fina age ki Ierusalema, kia fakafili ai a ia ke he tau mena ia.
21 Ka kua ui e Paulo kia toka a ia ke fakafili e Aokuso a ia. Ti fekau atu ai au kia leoleo a ia, ato fakafano atu a ia kia Kaisara.
22 Ati tala age ai a Akeripa kia Feso, Kua fia fanogonogo atu foki au ke he tagata na. Kua tala age a ia, A pogipogi, to fanogonogo ai a koe kia ia.
23 Ko e pogipogi foki, kua hoko mai ai Akeripa mo Perenike, mo e lilifu lahi, kua huhu ke he mena ke fanogonogo ai, katoa mo e tau iki kua pule he tau kau, mo e tau iki he māga; ti poaki age ai a Feso, ti kua takitaki mai ai a Paulo.
24 Ati tala age ai a Feso, Ko e patuiki na e, Akeripa, katoa mo mutolu e tau iki oti ha ne fakalataha nai a tautolu, kua fioia e mutolu e tagata nai, kua olelalo mai ai kia au kia ia i Ierusalema katoa mo nai e moto tagata a Iutaia oti, kua tauhea a lautolu, nakai lata he moui a ia.
25 Ka ko au nakai iloa e au ha mena kua eke e ia ke lata ke mate ai; kua ui atu foki e tagata nai kia Aokuso, ti manatu tuai au ke fakafano a ia.
26 Kua nakai fai mena foki kua iloa fakatonu e au kia ia ke tohi atu ai ke he iki. Ko e mena ia kua takitaki mai ai e au a ia ki mua ha mutolu, mo mua foki hāu, ko e patuiki na e ma Akeripa, kia moua e au taha mena ke tohi atu ai ka oti he fakafili.
27 Ha ko e mena manatu au nakai lata ke fakafano e tagata kua lili, ka e nakai fakailoa atu e tau mena kua talahaua kia ia.