Gahua 26:1-32
26 ATI tala age ai a Akeripa kia Paulo, Kua toka kia koe ke fakatonu mai e koe. Ati fakaolo atu ai e Paulo hana lima, mo e fakatonu atu e ia a ia,
2 Ko e patuiki na e, Akeripa, kua manatu na au kua monuina au he fakatonu atu e au au nai ho mua ke he aho nai, ke he tau mena oti ne hokotaki ai au he tau tagata lutaia;
3 Kua au atu ai ha kua fioia e koe e tau mahani mo e tau kupu oti kana ha ha he tau tagata lutaia. Ko e mena ia kua olelalo atu ai au kia koe kia fanogonogo mai a koe kia au mo e fakamanavalahi.
4 Kua iloa he tau tagata lutaia oti haku a mahani ne eke tali mai he tote au, ke he haku a motu ni ha i lerusalema, tali mai he kamataaga;
5 Kua kitia foki e lautolu au nai tali mai i tuai, ane fia talahau e lautolu, ko e vahega uka lahi ha tautolu a tapuakiaga ne nofo ai au ko e farasaio.
6 Kua fakafili tuai au ha ko e amaamanaki ne talahau he Atua ke he tau matua ha tautolu;
7 Ha ne amaamanaki ki ai ha tautolu a tau faoa ne hogofulu ma ua, mo e fekafekau fakamalolo a lautolu ke he po mo e aho, kia moua e lautolu. Ko e patuiki na e, Akeripa, ha ko e amaamanaki ia kua hokotaki ai au he tau tagata lutaia.
8 Ko e ha kia ke manatu ai a mutolu, ko e mena nakai maeke ke talia kaeke ke fakatu mai foki he Atua a lautolu kua mamate.
9 Ne manatu hifo na au, kua lata ke eke e au e tau mena loga ke totoko atu ke he higoa a lesu i Nasareta.
10 Ne eke foki e au i lerusalema; ne moua e au e pule mai he tau ekepoa ne mua, ati puipui ai e au e tau tagata tapu tokologa ke he tau fale puipui; kua kelipopo a lautolu, kua kau fakalataha foki au ki ai.
11 Ne fa fakahala e au a lautolu ke he tau sunako oti kana, mo e fakamakamaka atu ai e au kia kupu kelea a lautolu kia Iesu; kua vale lahi ue atu au kia lautolu, kua favale atu au kua hoko ni ke he tau māga kehe.
12 Haia ni, ko e patuiki na e, ne fina age au ki Tamaseko mo e pule mo e fekau mai he tau ekepoa ne mua,
13 Ko e tupou la, ne kitia ai e au ke he magahehala e maama mai he lagi, kua mua hana kikila he la, kua kikila takai kia au mo e fenoga ha mautolu.
14 Kua veveli a mautolu oti ki lalo ke he kelekele; ti logona ai e au e leo kua vagahau mai kia au, kua pehe mai ke he kupu Heperu, Saulo, Saulo na e, ko e heigoa e mena kua favale mai ai a koe kia au? ko e mena uka kia koe he aka ke he tau huki.
15 Ti pehe atu ai au, Ko e Iki na e, ko hai kia a koe? Ati pehe mai ai a ia, Ko au ko Iesu, kua favale, mai a koe ki ai.
16 Ka e tu a ki luga hau a tau hui; ha kua fakakite au kia koe kia kotofa ai e au a koe mo fekafekau mo tagata talahau ke he tau mena kua kitia e koe, katoa mo e tau mena ke fakakite ai au kia koe.
17 To laveaki e au a koe mai he motu nai, katoa mo e tau motu kehe, ke fekau atu nai e au a koe,
18 Ke fakaala ha lautolu a tau mata, kia mafokifoki mai he pouli ke he maama, mai he pule foki a Satani ke hagao atu ke he Atua; kia moua ai e lautolu e fakamagaloaga he tau hala, mo e tufaaga fakalataha mo lautolu kua fakatapu ke he tua kia au.
19 Hanai, ko e patuiki na e, Akeripa, nakai liuliu au ke he fakakiteaga mai he lagi.
20 Ka kua fakamatala fakamua e au kia lautolu ne nonofo i Tamaseko mo lerusalema, ati hoko ai foki ke he tau magamotu oti kana i Iutaia, katoa mo e tau motu kehe, kia tokihala a lautolu mo e hagao mai ke he Atua, kia eke foki e lautolu e tau mahani ke lata mo e tokihala.
21 Ko e tau mena ia ni kua tapaki ai au he tau tagata Iutaia ke he faituga, mo e eke e lautolu ke tamate au.
22 Hanai, ko e lagomatai ne moua e au mai he Atua, kua tumau ai au, kua hoko ke he aho nai, ha ne talahau ke he tau lalotagata mo e tau iki, nakai tala age au ha mena kehe ka ko e tau mena ia ne talahau mai he tau perofeta mo Mose ke hohoko mai;
23 Ke mamahi e Keriso, mo e tu mua mai a ia ia lautolu kua mamate, mo e fakamatala e ia e maama ke he motu nai katoa mo e tau motu kehe.
24 Kua fakatonu atu e ia a ia ke he tau kupu ia, ti pehe mai ai a Feso mo e leo lahi, Paulo na e, kua vikoia a koe; ko e lahi he hau a kumi ke he tau tohi kua vikoia ai a koe.
25 Ka kua tali atu a ia, Ko e iki na e, ma Feso, nakai vikoia au; ka e vagahau atu au ke he tau kupu moli mo e lotomatala.
26 Ha kua fioia he patuiki e tau mena nai ne vagahau fakamalolo atu nai e au ki ai; ha kua iloa mitaki e au, kua nakai galo taha mena he tau mena ia kia ia; ha ko e mena nakai eke fufu e mena ia.
27 Ko e patuiki na e, Akeripa, kua talia nakai e koe e tau perofeta? Kua iloa ni e au, kua talia e koe.
28 Ati tala age ai a Akeripa kia Paulo, Toe tote ni, ati fakamafoki ai e koe au ke eke mo Kerisiano.
29 Kua tala age a Paulo, Kua olelalo atu ni au ke he Atua, nakai kuenaia he toe tote ni, ka kia tuga au nai, ka e nakai ko koe hoko koe, ka e katoa foki mo lautolu oti kana ne fanogonogo mai kia au ke he aho nai, kia pihia ni a mutolu; ka e toka ai e tau pipi ē.
30 Ati matike ai e patuiki, mo e iki, mo Perenike, mo lautolu ne nonofo fakalataha mo lautolu.
31 Kua o age a lautolu, kua fevagavagahauaki, kua pehe age, Kua nakai eke he tagata na ha mena ke lata ai ke mate po ke lili.
32 Ti pehe atu ai a Akeripa kia Feso, Kane mai nakai ui atu e tagata na kia Kaisara, po kua maeke ni ke tuku atu a ia ke fano.