Gahua 27:1-44
27 KUA mau tuai ke o a mautolu hala vaka ki Italia; ati tuku atu ai e lautolu a Paulo mo e falu a tagata ne lili ke he takitaki he tokoteau, ko Iulio hana higoa, ke he kau a Aokuso.
2 Ti hake a mautolu ke he foulua Atamutiu, mo e tukuvaka atu ke o atu ke he tau fahi a Asia; ko mautolu foki mo Aritako ko e Maketonia mai Tesalonia.
3 Ko e pogipogi foki, kua afe ai a mautolu ki Saitonu. Kua mahani totonu mai foki a Iulio kia Paulo, mo e tuku atu kia ia ke fano ke he hana tau kapitiga, mo e talia e fakaalofa mai ha lautolu.
4 Kua tukuvaka atu ai foki, ti ō a mautolu he halavaka ke he fahi lalo a Kuperu, nukua kelea e matagi.
5 Kua mole ia mautolu he o i tutavaha a Kilikia, mo Pafulia, ati hoko ai a mautolu ki Mura i Lukia.
6 Kua moua ai foki he takitaki he tokoteau e foulua a Alesania, ko e fano ne fai ki Italia; kua tuku atu e ia a mautolu ki ai.
7 Kua mule ha mautolu a fenoga kua loga e tau aho, kua hao fetamaki a mautolu he tapa lalo i Nitoi, he nakai maeke he matagi; ati o atu ai a mautolu he tapa lalo i Kereta, hala Salamone;
8 Kua hao fetamaki he mena ia, ati hoko ai a mautolu ke he mena kua fakahigoa, Ko e tau ava fulufuluola; kua tata ki ai e māga ko Lasea.
9 Kua oti e tau aho loga, kua hoko tuai ke he vaha ke uka ai e tau fenoga; kua mole foki e tau aho he fakakanopogi, ati tomatoma atu ai a Paulo kia lautolu,
10 Kua pehe atu, Ma fanau, kua kitia e au, ko e kelea ha ne fai, mo e moumou lahi e tau mena ke he fenoga nai, nakai kuenaia he foulua hokoia, mo e tau mena ne uta ai, ka e katoa mo e tau moui ha tautolu.
11 Ka kua fanogonogo e takitaki he tokoteau ke he tagata ne fakatila a foulua mo e iki hana e foulua, ka e nakai ko e tau kupu a Paulo.
12 Kua nakai mitaki e ava ke nonofo ai e tau foulua ke he tau ke afa ai, ati talahau mai ai e manatu he tokologa ke tukuvaka atu ai, mo e Iali, po ke hoko nakai ki Foinike ke nofo ai ke he tau ke afa ai; ko e ava haia i Kereta, ne fehagai mo uta he fahi ki tokelau, ne fehagai foki mo uta he fahi ki toga.
13 Kua agi fakatekiteki mai foki e matagi toga, piko na lautolu kua moua e mena ne manatu ai a lautolu, ati tukuvaka atu ai, mo e ō fakatata age ki Kereta.
14 Ka kua nakai leva, ati to mai ai e afa lahi, ko Eurokuto e higoa.
15 Kua uta foki e foulua, kua nakai maeke he ulu ke he matamatagi, ati tuku atu ai e mautolu kua tafea.
16 Kua holo fakatata age ke he taha motu tote, ko Kalauta e higoa, fetamakina a ko e nakai maeke ke moua a mautolu e vaka paopao;
17 Kua futi e lautolu ki luga; ati eke ai e lautolu e tau lagatau, kua haihai hifo e foulua; kua matakutaku foki neke pē ke he oneone feutaaki; ati tuku ai e lautolu e akau fakalava, ati tafea ai pihia.
18 Kua taupagea ni a mautolu he afa, ati tiaki ai e lautolu he pogipogi e tau mena ne uta he foulua.
19 Ko e aho tolu, kua tiaki ai e lautolu ke he tau lima ha lautolu e tau mena he foulua.
20 Kua loga e tau aho kua nakai kitia ai e la, po ke tau fetu; kua to lahi hifo e afa kia mautolu, ati oti ka e uta kehe ai ha mautolu a amaamanaki ke he moui.
21 Kua leva nakai kai ha mena, ati tu ai a Paulo ki mua ha lautolu, kua tala age, Ma fanau, kane fanogonogo mai a mutolu kia au, mo e nakai tukuvaka mai i Kereta, ti nakai hoko mai ai e kelea nai, mo e tau mena nai kua moumou.
22 Ti kua tomatoma atu nai e au kia mutolu, kia fakamanavalahi a mutolu; ha ko e mena nakai moumou taha moui ha mutolu, ka ko e foulua hokoia.
23 Ha ko e mena tu mai kia au ne po e agelu he Atua, ko e hana tagata au, kua fekafekau foki au kia ia,
24 Kua pehe mai, Paulo na e, ua matakutaku a koe; to tu ni a koe ki mua a Kaisara; kitiala, kua foaki atu he Atua kia koe a lautolu oti ne fenoga mo koe.
25 Hanai, ma fanau na e, kia fakamanavalahi a a mutolu; ha ko e mena tua au ke he Atua, ke hoko pihia ni, tuga e mena ne talahau mai e ia kia au.
26 Ka to pe ni a tautolu ke he taha motu.
27 Kua tu e po hogofulu ma fa, ha ne feutaaki a mautolu ke he vaha Ateria, ko e tuloto po kua manatu ai he tau tagata he foulua, na kua tata atu a lautolu ke he taha motu.
28 Ati fafati hifo ai e lautolu, ati iloa ai kua uafulu e ofa; kua tolotolomaki atu, ati fafati ai foki, kua iloa kua hogofulu ma lima e ofa.
29 Ti matakutaku a lautolu neke pe ke he mena tule; ati tuku hifo ai e lautolu fa e taula ke he muimui foulua, mo e ole atu a Iautolu kia aho.
30 Kua manatu e tau kauvaka ke fehola kehe a lautolu he foulua, kua tuku hifo e lautolu e vaka paopao ki tahi, mo e fakatupua a lautolu ke ta hifo e lautolu e tau taula ke he ulu foulua.
31 Kua tala age a Paulo ke he takitaki he tokoteau mo e kau, Kaeke kua nakai tumau a lautolu ke he foulua, ti nakai maeke ke fakamomoui a mutolu.
32 Ati hio kehe ai he tau tagata tau e tau toua he vaka paopao, kua tuku atu pihia kia to ki lalo.
33 Kua nakala hoko ke he aho, kua ole atu a Paulo kia lautolu oti ke kai mena, kua pehe atu, Ko e aho hogofulu ma fa ainei kua fakaneinei ai a mutolu, mo e fakamagoa ai, kua nakai kai foki ha mena.
34 Ko e mena ia kua ole atu ai au kia mutolu ke kai mena; ha ko e mena aoga ia ke momoui ai a mutolu; ha ko e mena nakai to ha lauulu ha mutolu a tau ulu.
35 Kua tala atu e tau kupu ia, ati toto ai e ia e areto mo e fakaaue atu ke he Atua ki mua ha lautolu oti, ati tofitofi ai e ia mo e kamata ke kai.
36 Ati fakamanavalahi ai a lautolu oti kana, ti kai mena ai a lautolu.
37 Ua geau ti fitu e hogofulu ma ono e tagata a mautolu oti kana ha ha he foulua.
38 Kua makona ke he mena kai, ati fakamama ai e lautolu e foulua, kua liti hifo e tau saito ki tahi.
39 Kua aho, kua nakai iloa e lautolu e higoa he motu; ka kua kitia atu ai e lautolu taha mena hokulo ha i ai e mataafaga, kua manatu a lautolu, po ke ne maeke nakai ke hoko ki ai e foulua.
40 Ati hio kehe ai e lautolu e tau taula, mo e tuku atu ki tahi, ti vetevete e tau mena ne lili aki e tau fohe muivaka, mo e futi e la he uluvaka ke he matagi mo e hagao ke he mataafaga.
41 Kua pe foki ke he mata oneone ati tu ai e tua he foulua, kua piki mau ai e uluvaka, kua mauokafua ni; ka kua malipilipi e muimui foulua he malolo he tau peau.
42 Kua pulega e tau tagata tau kia kelipopo a lautolu ne lili, neke kakau taha mo e hola.
43 Ka kua loto e takitaki he tokoteau ke fakamoui a Paulo; ti hataki atu ai e ia e pulega ha lautolu, mo e tala age kia lautolu ne fahia kakau ke hohopo ki tahi, mo e ō hake fakamua ki uta;
44 Mo lautolu ne toe, ko e falu i luga he tau lapa, mo e falu i luga he fala mena ke he foulua; ati oti ka e hao atu oti a lautolu ki uta.