Gahua 28:1-31
28 KUA hao atu a mautolu, ati iloa ai ko Melita e higoa he motu.
2 Kua lahi ni e fakaalofa mai he motu kehe kia mautolu; ha ko e mena kua tafu e lautolu e afi, mo e talia mai ai a mautolu oti kana ha ko e uha kua to, mo e makalili.
3 Kua fakapotopoto e Paulo e fala gāfi, mo e tuku ai ke he afi, ti hau ai e gata gagau mai he vevela, mo e pipiki ke he hana lima.
4 Kua kikite mai e tau tagata kehe ke he mena gagau kua tautau hifo he hana lima, ati fevagavagahauaki ai a lautolu, Ka e fakamoli ni ko e keli tagata hanā; pete ni he hao mai a ia he tahi, ka e nakai maeke he taui kia moui a ia.
5 Ka kua lulu atu e ia e mena gagau ke he afi, kua nakai logona ha kelea.
6 Kua tatali a lautolu, piko na lautolu to fufula, po ke veli hifo ki lalo mo e mate teia; ka kua leva he tatali a lautolu mo e kitia kua nakai hoko ha mena kelea kia ia, ati hiki ai ha lautolu a tau manatu, kua pehe age, ko e atua ni a ia.
7 Kua tata ke he mena nai e tau fonua he iki he motu ko Popilio e higoa; kua talia e ia a mautolu, po tolu he api a mautolu ke he hana fale, mo e totonu mai a ia.
8 Ne takoto e matua tane a Popilio he kafo vevela mo e pa toto; kua hu atu a Paulo kia ia, mo e liogi, ati fakalago ai e ia hana tau lima ki luga ia ia, kua fakamalolo ai a ia.
9 Kua eke e mena ia ati o mai ai a lautolu oti ne gagao he motu, kua fakamalolo a lautolu.
10 Kua fakaalofa mai foki a lautolu kia mautolu ke he tau mena mitaki ne loga; kua tukuvaka atu a mautolu, ati tanaki ai e lautolu ki luga he foulua e tau mena aoga.
11 Kua mole e tolu a mahina, ati tukuvaka atu ai a mautolu ke he foulua Alesania, ha ha he motu ke he tau ne afa ai, ko e hana fakamailoga ko Tiakuro.
12 Kua hake ki uta foki ki Surakusa, mo e nonofo ai a mautolu po tolu.
13 Ati fano fakakalakala age ai, kua hoko ki Rekiu; kua mole ai foki e aho taha, ati agi mai ai e matagi toga, ti hoko ai a mautolu ke he aho ua ki Puteoli.
14 Kua moua ai e tau matakainaga, kua ole mai ke nonofo a mautolu mo lautolu po fitu; ati o atu ai a mautolu ki Roma.
15 Kua logona e ogo kia mautolu he tau matakainaga ha ha i ai, ati o mai ai a lautolu ke fonofono a mautolu, kua hoko mai ni ki Apio Foro, mo Tapereno e Tolu; kua kitia atu e Paulo a lautolu, ati fakaaue ai ke he Atua, mo e fakamanavalahi a ia.
16 Kua hoko a mautolu ki Roma, ati tuku atu ai (he takitaki he tokoteau a lautolu ne lili ke he iki ne pule ke he tau kau; ka e tuku atu e ia) a Paulo ke nofo he hana fale mo e tagata tau ne leoleo a ia.
17 Kua mole e aho tolu, ti ahi atu ai e Paulo e tau iki Iutaia; kua fakapotopoto mai a lautolu, ati tala atu ai a ia kia lautolu, Ko e tau matakainaga na e, ma fanau, pete ni he nakai eke e au taha mena nakai lata ke he motu mo e tau mahani he tau matua ha tautolu, ka e tuku mai ni au kua lili mai Ierusalema ke he tau lima he tau tagata Roma;
18 Kua fakafili mai e lautolu au, kua loto ke tuku atu au ke fano, ha kua nakai fai mahani ke lata ke mate ai au.
19 Ka kua liuliu mai e tau tagata Iutaia, ati fakamakamaka au ke ui atu kia Kaisara; ka e nakai toka ia au taha mena ke fakakelea aki hoku motu.
20 Ko e mena ia kua ahi atu ai e au a mutolu, ke feleveia a tautolu mo e fevagavagahauaki; ha ko e amaamanaki a Isaraela kua lili ai au ke he toua lapatoa nai.
21 Ati tala mai ai a lautolu kia ia, Nakai moua e mautolu e tau tohi mai Iutaia kia koe; ti nakai hau foki taha he tau matakainaga ha tautolu ke tala mai, po ke vagahau mai taha mena kelea kia koe.
22 Ka ko e manako nai ha mautolu, ke fanogonogo atu kia koe he hau a taofi; ha ko e mena iloa e mautolu kua talahaua kehe e vahega na ke he tau motu oti kana.
23 Ko e aho foki ne kotofa e lautolu kua o mai ai e tokologa kia ia ke he api hana; kua fakamatala atu e ia, mo e talahau fakatonu atu e kautu he Atua kia lautolu, mo e ole atu ki ai ke he tau mena kia Iesu mai he fakatufono a Mose, katoa mo e tau perofeta, kua kamata mai he pogipogi, ati hoko ke he afiafi.
24 Kua talia fakatonu foki he falu e tau kupu ne tala age e ia, ka kua nakai talia he falu.
25 Kua taofi kehekehe a lautolu; ati o kehe ai, ka kua oti he tala age e Paulo e taha kupu, Kua mitaki ni e kupu ne tala mai he Agaga Tapu ke he perofeta ko Isaia ke he tau matua ha tautolu,
26 Kua pehe mai, Kia fano ke he motu na, mo e tala age ki ai, To fanogonogo ni a mutolu, ka e nakai logona; to kitekite ni a mutolu ka e nakai kitia e mutolu.
27 Ha ko e mena kua matolu e tau loto he motu na, ti nakai fanogonogo ha lautolu a tau teliga he fanogonogo; kua fakakikivi e lautolu ha lautolu a tau mata, neke kitia e tau mata ha lautolu mo e fanogonogo ha lautolu a tau teliga, mo e logona he tau loto ha lautolu, mo e mafokifoki mai a lautolu, mo e fakamalolo ai e au a lautolu.
28 Hanai foki, kia iloa e mutolu, kua fakafano atu e fakamouiaga nai mai he Atua ke he tau motu kehe, ke fanogonogo ai foki a lautolu.
29 (Kua mole atu hana tau kupu nai, ati o kehe ai e tau tagata Iutaia, kua taufetoko lahi ai a lautolu.)
30 Ne ua la e tau he nofo ai a Paulo ke he hana fale ne totogi e ia kua talia e ia a lautolu oti kana ne huhu mai kia ia;
31 Ha ne fakamatala e kautu he Atua, mo e fakaako atu e tau mena he Iki ko Iesu Keriso, mo e fakamalolo ni, nakai hataki taha kia ia.