Gahua 3:1-26
3 NE o hake fakalataha a Peteru mo Ioane ke he faituga ke he magaaho liogi, ko e magaaho hiva haia.
2 Kua uta foki e taha tagata kua kulikuli tali he fanau mai, kua tuku hifo a ia e lautolu ke he taha aho mo e taha aho ke he gutuhala he faituga ne higoa ko e Fulufuluola, ke ole mena fakaalofa ia lautolu ne huhu atu ke he faituga;
3 Kua kitia e ia a Peteru mo Ioane ko e huhu ne fai ke he faituga; ti ole atu a ia ha mena fakaalofa.
4 Ka e mataono a Peteru mo Ioane kia ia, kua pehe atu, Kikite mai a kia maua.
5 Ti amaamanaki age a ia kia laua, piko ni to moua mai taha mena ia laua.
6 Ti pehe age a Peteru Nakai fai ario au, po ke fai auro; ka ko e mena ha ia au, kua ta atu e au kia koe; ko e higoa a Iesu Keriso ko e Nasareta, ati matike a a koe, ti fano.
7 Ti toto e ia hana lima matau, kua fakamatike a ia; ati malolo ai agataha hana tau hui mo e tau tepuhui,
8 Kua hopo a ia ki luga mo e tu, ti fano ni, kua huhu fakalataha foki mo laua ke he faituga, kua fano a ia, mo e hopohopo, mo e fakaheke atu ke he Atua.
9 Kua kitia foki he tau tagata oti a ia ha ne fano, mo e fakaheke atu ke he Atua.
10 Kua kitia e lautolu ko ia ni ne fa nofo ke he gutuhala Fulufuluola he faituga mo e ole mena fakaalofa; ti kua ofo lahi a lautolu mo e hohopo ha lautolu a tau ate ke he mena ne hoko kia ia.
11 Kua pipiki atu kia Peteru mo Ioane e tagata kulikuli ne fakamalolo, ti tafepoi mai ai e tau tagata oti ni kia lautolu ke he fakamaluaga ne higoa ko e fakamaluaga a Solomona, kua ofo lahi.
12 Kua kitia e Peteru, ati tala age ai a ia ke he tau tagata, Ko e tau tagata Isaraela na e, ko e ha ne ofo ai a mutolu ke he tagata nai? ko e ha foki ne mataono mai ai a mutolu kia maua, kua tuga ne mana ha maua mo e mahani Atua ha maua kua fano ai a ia.
13 Ko e Atua a Aperahamo, mo Isaako, mo Iakopo, ko e Atua he tau tupuna ha tautolu, kua tuku atu e ia e fakahekeaga ke he hana Fekafekau ko Iesu; ko ia ne tuku atu e mutolu, mo e fakatikai atu e mutolu ki mua ha Pilato, ka kua manatu a ia ke vevete a ia ke fano.
14 Ka ko mutolu kua fakatikai atu e mutolu a ia ne Tapu mo e Tututonu, ka e tala age a mutolu kia tuku mai kia mutolu e tagata keli tagata;
15 Ti kelipopo ni e mutolu e Iki he moui, ko ia kua fakatu mai he Atua ia lautolu kua mamate; ko e tau tagata talahau a mautolu nai ke he mena na.
16 Ko e hana higoa foki, ha ko e tua ke he hana higoa, kua fakamalolo aki e tagata nai, kua kitia e mutolu mo e iloa e mutolu; ko e tua mai ia ia ni, kua foaki atu ai kia ia e fakamalolo nai he hana tino ki mua ha mutolu oti kana.
17 Hanai, ko e tau matakainaga na e, kua iloa tuai e au ne eke e mutolu mo e nakai iloa, ti pihia mo e ha mutolu a tau iki.
18 Ka ko e tau mena ia, ne fakailoa mai fakamua he Atua ke he tau fofoga he hana tau perofeta oti ni, ke mamahi ai a Keriso, kua fakamoli pihia e ia.
19 Hanai, kia tokihala a a mutolu, mo e mafokifoki a mutolu, kia holoholo kehe ai ha mutolu a tau hala, kia hoko mai ai foki e tau tau ke okioki ai mai mua he Iki;
20 Kia fakafano mai ai foki e ia a ia ne fakamatala mai fakamua kia mutolu, ko Iesu Keriso haia;
21 Kua lata ni he nofo a ia ke he lagi, ato hoko ke he tau tau ke liu fakafou ai e tau mena oti kana, ne talahau mai ai he Atua ke he tau fofoga he hana tau perofeta tapu oti tali mai he kamataaga,
22 Ha ko e mena talahau mai ni e Mose ke he tau tupuna, To fakatu mai he Iki ha mutolu Atua e perofeta ma mutolu he tau matakainaga ha mutolu, ke tuga au nai; to fanogonogo a mutolu kia ia ke he tau mena oti kana ke vagahau mai ai e ia kia mutolu.
23 To fakaoti ai foki mai he motu e tau tagata oti kana, nakai fanogonogo ke he perofeta nā.
24 Ko e tau perofeta oti foki ne vagahau mai kua kamata mai ia Samuela, mo lautolu ne mumui age, ko lautolu oti ni, kua talahau fakamua mai e lautolu e tau aho nai.
25 Ko e tau fanau he tau perofeta a mutolu mo e maveheaga ne eke he Atua mo e tau tupuna ha tautolu, kua pehe mai kia Aperahamo, Ko e taha he fanau hāu ke monuina ai e tau magafaoa oti he lalolagi.
26 Ko e Atua foki, kua fakatu mai ne ia hana Fekafekau ko Iesu, kua fakafano fakamua mai a ia kia mutolu, ke fakamonuina a mutolu he mafoki kehe takitaha a mutolu mai he tau mahani kelea ha mutolu.