Gahua 4:1-37
4 HA ha ne vagahau atu a laua ke he tau tagata, ti hoko mai ai kia laua e tau ekepoa mo e takitaki he kau he faituga, katoa mo e tau satukaio,
2 Kua hogohogomanava a lautolu he fakaako atu e laua ke he tau tagata, mo e fakamatala atu e liliu tutu mai kia Iesu ha lautolu kua mamate.
3 Ti tapaki a laua, mo e tuku atu ke he fale puipui, ato hoko ke he pogipogi; ha ko e mena kua afiafi.
4 Ka e tua e tokologa ha lautolu ne fanogonogo ke he kupu; ko e katoa foki he tau tagata, na ko e lima e afe ka totou.
5 Kua hoko ke he pogipogi, ati fakapotopoto ai ki Ierusalema ko e tau iki ha lautolu, mo e tau patu, mo e tau tohikupu,
6 Mo Ana ko e ekepoa ne mua, mo Kaiafa, mo Ioane, mo Alesana, katoa mo e tau magafaoa oti he tau ekepoa ne mua.
7 Kua tuku e lautolu, a laua ke he lotoga, ati hūhu atu ai a lautolu, Ko e heigoa e mana, ko e higoa foki ha hai, ne eke ai e mua e mena nai?
8 Ati tala age ai a Peteru kia lautolu, kua puke a ia ke he Agaga Tapu, Ko mutolu e tau iki he motu, mo e tau patu a Isaraela,
9 Kaeke ke fakafili a maua ke he aho nai ke he fakaalofa ne eke ke he tagata kulikuli, po ke higoa ha hai ne malolo ai a ia;
10 Kia iloa e mutolu oti, katoa mo e motu oti ko Isaraela, ko e higoa a Iesu Keriso ko e Nasareta, ko ia ne fakasatauro e mutolu, ne liu fakatu mai he Atua ia lautolu kua mamate, ko ia ni kua tu mai ai e tagata nai kua malolo ki mua ha mutolu.
11 Ko e maka hanai ne tiaki e mutolu e tau tagata ati fale, kua uta a ia mo maka tapa ki luga he malokuaga.
12 Ti nakai tokai foki e fakamouiaga ke he taha; nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.
13 Kua kitia e lautolu e fakamalolo a Peteru mo Ioane, kua iloa foki ko e na tagata nakai ako a laua mo e tau tagata goagoa, ti ofo ai a lautolu; kua iloa mitaki ai e lautolu, ko laua ne fakalataha mo Iesu.
14 Kua kitia atu foki e lautolu e tagata ne fakamalolo, kua tutu fakalataha mo laua, ti nakai fai kupu a lautolu ke fetoko atu ai.
15 Kua fekau a laua kia o kehe he fakapotopotoaga; ti pulega ai a lautolu,
16 Kua pehe, Ko e heigoa e mena ke eke e tautolu ke he tau tagata nai? ha ko e mena kua iloa tonuhia e lautolu oti kua nonofo i Ierusalema, kua eke ni e laua e mena lahi; nakai maeke foki a tautolu ke fakatikai ki ai.
17 A neke fakapuloa lahi ue atu ke he motu kia fakamatakutaku atu fakalahi e tautolu a laua, aua neke liu foki vagahau a laua ke he taha tagata ke he higoa ia.
18 Kua ui atu kia laua, ati hataki atu ai kia laua, aua neke vagahau atu ni, po ke fakaako atu ke he higoa a Iesu.
19 Ka e tala age a Peteru mo Ioane, kua pehe age kia lautolu, Po ke tonu nakai ki mua he Atua, ke fanogonogo a maua kia mutolu ka e nakai fanogonogo a maua ke he Atua, ati fifili a a mutolu.
20 Ha kua nakai maeke ke fakamamate a maua ke he tau mena ne kitia e maua, mo e fanogonogo a maua ki ai.
21 Kua liu foki fakamatakutaku atu e lautolu a laua, ti toka ai a laua ke o, kua nakai moua e lautolu ha mena ke fakahala ai a laua, ha ko e motu; nukua fakaheke e tau tagata oti kana ke he Atua, ha ko e mena ne eke.
22 Ha ko e fagofulu mo e tumā e tau tau he tagata ne eke ki ai e mana kua malolo ai.
23 Kua tuku atu a laua ke o, ati o atu ai a laua ke he tau matakainaga mo e fakamatala atu ai e laua kia lautolu e tau mena oti kana ne tala mai he tau ekepoa ne mua mo e tau patu kia laua.
24 Kua fanogonogo a lautolu ki ai, ati ui fakaleo lahi ai a lautolu ke he Atua mo e loto fakalataha, kua pehe atu, Ko e Iki na e, ko e Atua a koe ne eke e lagi, mo e lalolagi, mo e tahi, mo e tau mena oti kana ne toka ai ia lautolu;
25 Ne talahau mai e koe ke he fofoga he hau a fekafekau ko Tavita, Ko e ha ne vale ai e tau motu kehe, mo e manamanatu ai e tau tagata ke he tau mena nakai aoga?
26 Kua tutu mai e tau patuiki he lalolagi, kua fakapotopoto foki e tau iki, ke totoko atu ke he Iki mo e hana Keriso.
27 Ha kua moli ni, ne fakapotopoto ai a Herota, mo Ponotio Pilato, katoa oti mo e tau tagata he motu kehe, mo e tau tagata a Isaraela, ke totoko atu ke he hau a Fekafekau tapu ko Iesu, kua fakauku e koe;
28 Kia eke e tau mena oti kana ne kotofa tuai he hau a lima, mo e hau a pule ke eke.
29 Ko e hanai, ma Iki na e, kia kitekite a koe ke he fakamatakutaku mai ha lautolu; mo e foaki mai e koe ke he hau a tau fekafekau, kia talahau atu e lautolu hau a kupu mo e fakamalolo ni,
30 Ke he fakaolo mai he hau a lima ke fakamalolo aki, kia eke foki e tau fakamailoga mo e tau mana ke he higoa he hau a Fekafekau tapu ko Iesu.
31 Kua mole atu ha lautolu a liogi, ati luelue ai e mena ne fakapotopoto ai a lautolu; kua puke foki a lautolu oti ke he Agaga Tapu, kua talahau atu e kupu he Atua mo e fakamalolo.
32 Ti taha ni e loto mo e manatu he tau tagata oti kana ne tua; kua nakai pehe foki taha ke he taha mena hana ko e hana mena haia, ka kua tuku fakalapalapa ha lautolu a tau mena oti.
33 Kua talahau atu he tau aposetolo mo e mana lahi e liu tu mai he Iki ko Iesu; kua ofania lahi foki a lautolu oti.
34 Kua nakai nofogati foki taha ia lautolu; ha ko lautolu kua fai fonua, po ke tau fale, kua fakatau ai e lautolu, ti ta mai e taui he tau mena ne fakatau;
35 Kua tuku atu ai ke he tau aposetolo ke pule; ti tufatufa ni kia lautolu takitokotaha ke fakalata ke he mena kua nofogati ai.
36 Ko lose foki, ne fakahigoa he tau aposetolo ko Panapa, (ko e kakano ka fakamatala, Ko e tagata he fakamafanaaga), ko e faoa a Levi, ko e tagata ne fanau i Kuperu,
37 Ne fai fonua a ia, ti fakatau atu ai e ia, kua uta foki e tau tupe, mo e tuku atu ke he tau aposetolo ke pule.