Gahua 5:1-42
5 KA ko e taha tagata ko Anania e higoa, mo Safaira hana hoana, ne fakatau atu e ia e fonua.
2 Kua toka foki e ia e taha maga he taui māna, kua iloa foki he hana hoana, ti uta e taha maga mo e tuku atu ke he tau aposetolo ke pule.
3 Ka e tala age a Peteru, Anania na e, ko e heigoa e mena kua fakapuke ai e Satani hau a loto, ke pikopiko ai a koe ke he Agaga Tapu, mo e kaiha e taha maga he taui he fonua?
4 Ko e vaha ne toka ai, nakai kia toka ai ia koe? Kua oti foki he fakatau, ti nakai kia toka ai ke he pule hau? Ko e heigoa e mena nai kua toka e koe ke he hau a loto? Kua nakai pikopiko a koe ke he tau tagata, ka ko e Atua.
5 Kua fanogonogo a Anania ke he tau kupu ia, ati veli ai a ia ki lalo, kua fakaoti hana fafagu; ati hoko ai e matakutaku lahi ke he tau tagata oti ne fanogonogo ke he tau mena nai.
6 Ati matike ai e tau fuata, kua afi a ia, ti uta e lautolu ki fafo, mo e tanu.
7 Kua mole atu e tau magaaho po ke tolu, ati hu mai ai hana hoana, nakai iloa e ia e mena ne eke.
8 Ti tala age a Peteru kia ia, Tala mai a kia au, po ke fakatau atu e mua e fonua ke he tau mena ia? Kua tala mai a ia, E, haia ni.
9 Ati tala age a Peteru kia ia, Ko e heigoa e mena kua loto fakalataha ai a mua ke kamatamata ke he Agaga he Iki? Kitiala, ko e ha ha he gutufale a lautolu ne tanu hau a tane, ke uta foki e lautolu a koe ki fafo.
10 Ati veli ai agataha a ia ki mua hana, kua fakaoti hana fafagu; kua huhu mai e tau fuata, kua kitia e lautolu a ia kua mate, ati uta ai e lautolu a ia ki fafo, mo e tanu ke he tapa he tane hana.
11 Kua hoko foki e matakutaku lahi ke he ekalesia oti ni, katoa mo lautolu oti ne fanogonogo ke he tau mena nai.
12 Kua eke foki he tau lima he tau aposetolo e tau fakamailoga mo e tau mana loga ki mua he motu. Ha ha he fakamaluaga a Solomona a lautolu oti kana mo e loto fakalataha.
13 Ka ko e tau tagata ne toe kua nakai fakamalolo e taha ke fakalataha mo lautolu; ka e nava e motu kia lautolu.
14 Ka kua au atu ai he lafilafi ke he Iki a lautolu ne tua, tokologa e tau tane katoa mo e tau fifine.
15 Ti kua ta mai e lautolu e tau tagata gagao ke he tau male, mo e fakatatakoto ai ke he tau mohega mo e tau fata, kia fakamalu ai e falu ha lautolu he ata ni a Peteru ka fina age.
16 Kua o mai foki e moto tagata mai he tau māga ne agaagai ki Ierusalema, kua ta mai e lautolu e tau tagata gagao mo lautolu ne matematekelea he tau agaga kelea; kua fakamalolo ai a lautolu oti kana.
17 Ati tutu ai ki luga e ekepoa ne mua, mo lautolu oti ne fakalataha mo ia, ko e vahega haia he tau satukaio, kua mahekeheke lahi ni a lautolu;
18 Ti tapaki e lautolu e tau aposetolo, mo e tuku atu a lautolu ke he fale puipui he motu.
19 Ka kua vevete mai he agelu he Iki e tau pa gutuhala he fale ke he po, kua takitaki ai e ia a lautolu ki fafo, kua pehe atu,
20 Ati o a a mutolu ti tutu ke he faituga, mo e talahau atu ke he motu e tau kupu oti kana he fakamouiaga nai.
21 Kua logona ai e lautolu, ati huhu ai a lautolu ke he faituga ke he matafatafa ata, mo e fakaako ai. Ati hau ai e ekepoa ne mua mo lautolu ne fakalataha mo ia, kua fakapotopoto e lautolu e fakapotopotoaga, katoa mo e tau patu oti kana he fanau a Isaraela; ti fekau atu ke he fale puipui ke takitaki mai a lautolu.
22 Kua hoko atu e tau fekafekau, kua nakai kitia e lautolu a lautolu ke he fale puipui; ati liliu atu ai a lautolu, mo e talahau,
23 Kua pehe, Ne kitia e mautolu e fale kua pāpā, kua mauokafua ni, mo e tau leoleo kua tutu i fafo i mua he tau gutuhala; kua hafagi atu e mautolu, ka a nakai moua e mautolu taha i loto.
24 Kua fanogonogo ke he tau kupu ia e ekepoa mo e takitaki he kau he faituga, katoa mo e tau ekepoa ne mua, ti fakahahaku ai a lautolu, po ke fakahiku fefe e mena nai.
25 Ati hau ai taha, mo e tala age kia lautolu, kua pehe age, Kitiala, ko e tau tagata ne tuku e mutolu ke he fale puipui, ha he faituga a lautolu, ha ne tutu mo e fakaako atu ke he tau tagata.
26 Ati fano ai e takitaki kau fakalataha mo e tau fekafekau, kua takitaki fakatekiteki mai a lautolu; ha kua matakutaku a lautolu ke he tau tagata, neke taulitimaka mai kia lautolu.
27 Kua takitaki mai a lautolu, ati tuku atu ai a lautolu ki mua he fakapotopotoaga; ti hūhu age e ekepoa ne mua kia lautolu,
28 Kua pehe age, Ka e nakai kia tala atu fakamakamaka e mautolu kia mutolu, aua neke fakaako atu ke he higoa na? kitiala, kua fakapuke e mutolu a Ierusalema ke he tau kupu ha mutolu, mo e fia fakahoko mai e mutolu ki luga ia mautolu e toto he tagata na.
29 Ati tali age ai a Peteru mo e tau aposetolo, kua pehe age, Kua lata ni ke mua e omaoma ke he Atua ke he omaoma ke he tau tagata.
30 Ko e Atua he tau tupuna ha tautolu kua fakatu mai e ia a Iesu, ne kelipopo e mutolu, he fakatautau ke he akau.
31 Ko ia kua fakatokoluga he Atua he hana lima matau ke eke mo Iki mo Fakamoui, ke foaki e ia kia Isaraela e tokihala mo e fakamagaloaga he tau hala.
32 Ko e hana tau talahau foki a mautolu ke he tau tala nai, katoa foki mo e Agaga Tapu, kua foaki atu he Atua ke he tau tagata kua omaoma kia ia.
33 Kua fanogonogo ai a lautolu, ati vale lahi ai, kua pulega ai a lautolu ke kelipopo a lautolu.
34 Ti tu ai e taha farasaio ke he fakapotopotoaga, ko Kamalielu e higoa, ko e ako fakatufono kua talahaua he motu oti ni, kua fekau e ia, ke uta e tau aposetolo ki fafo ke tatali fakatote mai ai;
35 Ati tala age ai a ia kia lautolu, Ko e tau tagata Isaraela na e, a mutolu, mo e tau mena ka eke e mutolu ke he tau tagata nai.
36 Ha ko e mena ne aho mua ne tu mai ai a Tiuta, ne talahau, kua mua ni a ia; ne fakalataha foki kia ia e tau tagata po ke fa e teau ka totou; kua kelipopo a ia, kua mavehevehe foki mo e fakaoti a lautolu oti kana ne omaoma kia ia.
37 Kua mole e tagata ia, ti tu mai ai a Iuta ko e Kalilaia ke he vaha he tohiaga; kua takitaki kehe e ia e tau tagata tokologa ne mumui kia ia; kua mate tuai a ia, kua mavehevehe ai foki a lautolu oti kana ne omaoma kia ia.
38 Hanai, kua tala atu e au kia mutolu, fakamamao a mo e tau tagata nai, ti tokai a lautolu; kaeke kua tupu mai he tau tagata e pule ia, mo e gahua ia, ti fakaoti ai;
39 Kaeke kua tupu mai he Atua, ti nakai maeke ia mutolu ke fakaoti ai; neke moua a mutolu kua tau ke he Atua.
40 Ti fanogonogo a lautolu kia ia; kua ui age ke he tau aposetolo ke o mai, kua fahi a lautolu, mo e tala age, aua neke vagahau ke he higoa a Iesu; ti tuku atu ai a lautolu ke o.
41 Ati o ai a lautolu mai mua he fakapotopotoaga mo e fiafia, ha kua eke ni kua aoga a lautolu ke eke fakakelea ha ko e hana higoa.
42 Kua nakai oki foki e tau aho oti he fakaako atu e lautolu, mo e fakamatala atu ke he faituga, ke he taha fale foki mo e taha fale, e tala mitaki kia Iesu Keriso.