Gahua 7:1-60
7 ATI pehe mai ai e ekepoa ne mua, Ko e moli kia, kua pihia e tau mena na?
2 Ati tala age ai a ia, Ko e tau matakainaga na e, mo e tau matua na e, ati fanogonogo mai a. Ne fakakite e Atua lilifu ke he matua ha tautolu ko Aperahamo, he nofo a ia i Mesopotamia, ka e nakala hoko ke he hana nofo i Karana;
3 Ti pehe mai a ia kia ia, Ati toka a hau a motu mo e hau a faoa, ka e fano ke he motu ke fakakite atu e au kia koe.
4 Ati toka ai e ia e motu ko Kaletaia, ka e nofo i Karana; kua mate ai hana matua tane, ati takitaki ai e ia a ia mai he mena ia ke he motu nai, kua nonofo ainei a mutolu.
5 Kua nakai age foki māna ha fonua i ai nakai fakai ha mena ke tu ai hana hui; ka e talahau mai, ke age ai e ia kia ia ke eke mo fonua māna, katoa mo e hana fanau ka mole atu a ia, ka e nakaila fai fanau a ia.
6 Ne vagahau mai foki e Atua, kua pehe, To paea hana fanau ke he motu kehe, to fakatupatupa ai a lautolu mo e ekefakakelea ai ke he tau tau ne fa e teau.
7 Ne pehe mai foki e Atua, To fakahala e au e motu kua eke ai a lautolu mo tupa; ka mole foki e tau mena ia, ti o mai a lautolu, mo e fekafekau mai a lautolu kia au ke he mena nai.
8 Ne tuku atu foki e ia kia ia e maveheaga he peritoma; ko e haia kua fanau ai a Isaako, ti peritome e ia a ia ke he aho valu; ne fanau foki e Isaako a Iakopo; ne fanau foki e Iakopo e tau tupuna tokohogofulu ma ua.
9 Ko e tau tupuna foki ne mahekeheke kia Iosefa, kua fakafua atu e lautolu a ia ki Aikupito; ka e fakalataha e Atua mo ia,
10 Ti laveaki e ia a ia he hana tau matematekelea oti kana, mo e foaki mai kia ia kia ofania, kia iloilo foki a ia ki mua a Farao, e patuiki a Aikupito; ti kotofa ai a ia kia ia ke pule ki Aikupito, katoa mo e hana faoa oti.
11 Kua hoko e hoge mo e matematekelea lahi ke he motu oti ni ko Aikupito katoa mo Kanana; kua nakai moua foki ha mena kai he tau matua ha tautolu.
12 Ka kua logona e Iakopo ko e ha ha i Aikupito e tau saito, kua fakafano atu e ia ha tautolu a tau matua, ko e laga taha ia.
13 Ko e liliu laga ua a lautolu kua fakakite age ai a Iosefa ke he hana tau matakainaga, kua fakakite age foki e faoa a Iosefa kia Farao.
14 Ati fakafano atu ai e Iosefa, mo e ahi hana matua ko Iakopo, katoa mo e hana faoa oti kana, ne tokofitugofulu ma lima e tagata.
15 Ati hifo ai a Iakopo ki Aikupito, kua mate ai, katoa mo e ha tautolu a tau matua;
16 Kua uta foki a lautolu ki Sukema, mo e tuku ke he tukuaga ne fakatau e Aperahamo ke he totogi ario mai he fanau a Hamora, e matua tane a Sukema.
17 Kua tata tuai e tau ne talahau mai, ne omonuo ai e Atua kia Aperahamo, ati tutupu ai e tau tagata, kua fakatokologa ai i Aikupito;
18 Ati tu mai e taha patuiki, nakai kitia e ia a Iosefa.
19 Kua eke lagatau kelea a ia ke he motu ha tautolu, mo e favale atu ke he tau matua ha tautolu, kia tiaki ha lautolu a tau tama mukemuke, neke momoui a lautolu.
20 Ko e vaha ia ne fanau ai a Mose, kua mitaki lahi a ia, tolu foki e mahina ne eke ai a ia he magafaoa he hana matua tane;
21 Kua tiaki foki a ia, kua ta hake he tama fifine a Farao, kua eke foki e ia a ia mo tama hana.
22 Ne fakaako foki a Mose ke he iloilo oti ni he tau tagata Aikupito; kua fakamalolo hana tau kupu mo e tau mena ne eke e ia.
23 Kua hoko ke he fagofulu he hana tau tau, ati manatu ai a ia ke fano ke ahi hana tau matakainaga ko e fanau a Isaraela.
24 Kua kitia atu foki e ia e taha tagata kua eke fakakelea, kua lagomatai a ia ki ai, mo e taui atu hana matematekelea, kua keli e ia e tagata Aikupito.
25 Piko a ia ko e mena iloa he hana tau matakainaga ko e mena fakamoui he Atua a lautolu ke he hana lima; ka kua nakai iloa e lautolu.
26 Ko e pogipogi foki kua tu atu ai a ia ke he tokoua ne latau, kua vevehe e ia e laua kia mitaki, kua pehe atu, Ma tokoua, ko e matakainaga a mua; kua mahani kelea he ha a mua kia mua?
27 Ka ko ia ne mahani kelea atu ke he taha, kua papage atu a ia, kua pehe atu, Ko hai ne kotofa a koe mo iki mo fakafili kia mautolu?
28 Kua fia kelipopo kia e koe au, ke tuga e tagata Aikupito ne kelipopo e koe neafi?
29 Ati hola ai a Mose ke he kupu ia, kua paea ai ke he motu ko Mitiana, kua fanau ai e na tama tane hana.
30 Kua mole foki e fagofulu a tau, ati fakakite ai kia ia ke he tutakale he mouga ko Sinai, e agelu he Iki ke he afi puhopuho ke he akau talatala.
31 Kua kitia e Mose, ati ofo ai ke he mena ne kitia; kua fakatata atu ai ke kikite ki ai, ati hoko mai ai e leo he Iki kia ia,
32 Ko au ko e Atua he tau matua hāu, ko e Atua a Aperahamo, ko e Atua foki a Isaako, ko e Atua foki a Iakopo. Ati vivivivi ai a Mose, kua matakutaku a ia ke kikite ki ai.
33 Ti kua vagahau mai ai e Iki kia ia, Vevete a hau a tau afialoalohui; ha ko e mena kua tu ai a koe ko e kelekele tapu haia.
34 Kua kitia tonu e au e matematekelea he haku motu ha i Aikupito, kua fanogonogo foki au ke he oi ha lautolu, kua hifo au ke laveaki a lautolu. Ko e hanai, hau a, to fakafano atu e au a koe ki Aikupito.
35 Ko Mose nā ne tiaki e lautolu, kua pehe atu, Ko hai kia ne kotofa a koe mo iki mo e fakafili? ko ia ni ne fakafano he Atua ke eke mo iki mo e fakamoui, ke he lima he agelu ne fakakite kia ia ke he akau talatala.
36 Ko ia ni ne takitaki atu a lautolu, kua oti he eke e tau mana mo e tau fakamailoga ke he motu ko Aikupito, mo e tahi Kula, katoa mo e tutakale, ke he fagofulu a tau.
37 Ko Mose haia, ne tala age ke he fanau a Isaraela, To fakatu mai he Iki ha mutolu Atua e perofeta ma mutolu mai he tau matakainaga ha mutolu, ke tuga au nai, to fanogonogo a mutolu kia ia.
38 Ko ia ni ha he ekalesia ke he tutakale fakalataha mo e agelu ne vagahau mai kia ia ke he mouga ko Sinai, katoa foki mo e tau matua ha tautolu; kua talia foki e ia e kupu ke moui ai, he ta mai ai kia tautolu.
39 Kua nakai loto ha tautolu a tau matua ke omaoma kia ia; ka e papage atu, mo e lililu foki ha lautolu a tau loto ki Aikupito;
40 Kua pehe atu kia Arona, Ati eke a e tau atua ma tautolu, ke mumua atu a lautolu ia tautolu; ha ko Mose nā, ne takitaki a tautolu mai he motu ko Aikupito, nakai iloa e tautolu e mena kua hoko kia ia.
41 Ti eke e lautolu ke he vaha ia e tama povi, kua eke foki e lautolu e poa ke he tupua, mo e fiafia a lautolu ke he tau gahua ni he tau lima ha lautolu.
42 Ati haga kehe ai e Atua, mo e tuku atu a lautolu ke tapuaki ke he kau he lagi; tuga ne tohi ke he tohi he tau perofeta, Ko e faoa a Isaraela na e, ne ta mai kia e mutolu kia au e tau manu kua keli katoa mo e tau poa ke he fagofulu a tau ke he tutakale?
43 Ne uta fano foki e mutolu e fale tapu a Moloka, mo e fetu he atua ha mutolu ko Refana, ko e tau fakatai ia ne eke e mutolu ke hufeilo a mutolu ki ai; ko e mena haia ke uta ai e au a mutolu ke paea ai ke he fahi atu a Papelonia.
44 Ha ha he tau matua ha tautolu ke he tutakale e fale uta fano he fakakiteaga, tuga ne poaki e ia ne vagahau kia Mose, kia eke e ia tuga e fakatai ne kitia e ia.
45 Ne moua foki ia he tau matua ha tautolu, ti ta mai e lautolu mo Iosua ke he tau fonua he tau motu kehe, ko lautolu ne vega he Atua i mua he tau matua ha tautolu, kua hoko ke he vaha ia Tavita.
46 Ko ia ne ofania he Atua, ne ole atu foki a ia kia moua e ia taha mena ke nofo ai e Atua a Iakopo.
47 Ka kua eke e Solomona e fale māna.
48 Ka ko ia ne Mua ue atu kua nakai haele a ia ke he tau faituga ne eke he tau lima, tuga he talahau mai he perofeta;
49 Ko e lagi ko e haku a nofoaiki haia, ko e lalolagi foki haku a tuagahui; kua pehe mai e Iki, po ke fefe taha fale ke eke e mutolu maku? po ko fe taha mena ke nofo ai au?
50 Nakai kia eke he tau lima haku e tau mena oti ia?
51 Ko mutolu kua mao e tau ua, mo e nakai peritome e tau loto mo e tau teliga, kua totoko mau atu ni a mutolu ke he Agaga Tapu; tuga e tau matua ha mutolu, kua pihia foki a mutolu.
52 Ko hai kia taha he tau perofeta nakai favale ki ai ha mutolu a tau matua? kua kelipopo foki e lautolu a lautolu ne fakamatala tuai e haele mai hana ne Tututonu; ko ia kua afo e mutolu mo e kelipopo ainei;
53 Ko mutolu ne moua e fakatufono ne fekafekau ki ai e tau agelu, ka e nakai oma a mutolu ki ai.
54 Kua fanogonogo a lautolu ke he tau kupu ia, ati vale lahi ai ha lautolu a tau loto; kua fakakonokonoi foki ha lautolu a tau nifo kia ia.
55 Ka kua puke a ia ke he Agaga Tapu, kua mataono ke he lagi, kua kitia atu e lilifu he Atua, mo Iesu ha ne tu ke he fahi matau he Atua; ti pehe mai a ia,
56 Kitiala, kua kitia e au e lagi kua maihi mai, mo e Tama he tagata ha ne tu ke he fahi matau he Atua.
57 Ati kalaga ai a lautolu, mo e leo lahi kua pa ha lautolu a tau teliga mo e feoho mai kia ia mo e loto fakalataha;
58 Kua tulei atu foki a ia ki tua he māga, ati taulitimaka ai e lautolu a ia; kua tuku atu foki he tau tagata talahau ha lautolu a tau tapulu ke he fuata, ko Saulo e higoa, ke leveki ai e ia.
59 Kua taulitimaka foki e lautolu a Setefano, kua ui a ia, kua pehe atu, Ko a Iki na e ma Iesu, kia talia mai e koe haku a agaga.
60 Kua fakatokotui foki a ia, mo e ui atu mo e leo lahi, Ko e Iki na e, aua neke tuku atu e koe e hala nai kia lautolu. Kua fakaoti atu e kupu na, ati mohe ai a ia.