Gahua 9:1-43
9 KA ko Saulo kua faguhe mai e fakamatakutaku mo e kelipopo ke he tau tutaki he Iki, kua fano a ia ke he ekepoa ne mua;
2 Kua ole atu kia ia e tau tohi ke uta ke he tau sunako i Tamaseko, kaeke ke moua falu he mahani na, ko e tau tane katoa mo e tau fifine, kia lili ai, mo e takitaki mai e ia ki Ierusalema.
3 Kua fina atu a ia kua tata tuai ki Tamaseko; ati fakaofo ai he kikila takai mai kia ia e maama mai he lagi.
4 Ati veli ai a ia ki lalo ke he kelekele, kua logona e leo kua pehe mai kia ia, Saulo, Saulo na e, ko e heigoa e mena ne favale mai ai a koe kia au?
5 Ati tala age ai a ia, Ko e Iki na e, ko hai kia a koe? Ati tala age ai e Iki, Ko au ko Iesu kua favale mai a koe ki ai;
6 Tu a a koe ki luga, ti fano ke he māga, to talahau atu ai kia koe e mena kua lata ke eke e koe.
7 Ka kua tutu e tau tagata ne o he fenoga mo ia, kua nakai maeke ke lelea; kua logona e lautolu e leo, ka e nakai kitia taha.
8 Kua tu ki luga a Saulo mai he kelekele; kua ala hana tau mata, ka e nakai kitia e ia taha; kua toto e lautolu hana tau lima kua takitaki a ia ki Tamaseko.
9 Tolu foki e aho nakai kitia e ia, ti nakai kai, ti nakai inu.
10 Ha i Tamaseko taha tutaki, ko Anania e higoa; ne vagahau mai foki e Iki kia ia ke he fakakiteaga, Anania na e. Ati tala age ai a ia, Ko e Iki na e ko au hanai.
11 Ti tala mai ai e Iki kia ia, Ati tu a ki luga, ti fano ke he puhala ne higoa ko e Hako, ti kumi ke he fale a Iuta e tagata ko Saulo e higoa, ko e Taso; ha ko e mena, kitiala, ha ne liogi a ia;
12 Kua kitia foki e ia ke he fakakiteaga e tagata ko Anania e higoa, kua hu atu, mo e fakalago hana lima ki luga hana, kia liu ala ai a ia.
13 Ati tala age ai a Anania, Ko e Iki na e, ne fanogonogo au ke he tau tagata tokologa e tau tala ke he tagata na, ke he tau mena kelea loga kua eke e ia ke he hāu a tau tagata tapu i Ierusalema;
14 Ti kua fai pule a ia ki hinei mai he tau ekepoa ne mua, ke lili a lautolu oti ni kua ui atu ke he hāu a higoa.
15 Ka e tala mai e Iki kia ia, Ati fano a; ha ko e kapiniu ni a ia kua fifili māku, ke uta haku a higoa ki mua he tau motu kehe, mo e tau patuiki, mo e fanau a Isaraela.
16 Ha ko e mena fakailoa atu e au kia ia e tau mena loga ke lata ke mamahi ai a ia, ha ko e haku a higoa.
17 Ati fano ai a Anania, kua hu atu ke he fale, ti fakalago atu e ia hana lima ki luga ia ia, kua pehe atu, Ko e matakainaga na e ma Saulo, kua fakafano mai au he Iki ko Iesu ne fakakite mai kia koe he magahehala ne hau ai a koe, kia liu foki ala a koe, mo e fakapuke a koe ke he Agaga Tapu.
18 Ati mokulu hifo agataha he tau mata hana ko e tau mena tuga ne tau hinafi; ati liu foki ala agataha a ia, kua matike a ia mo e papatiso;
19 Kua kai, ati malolo ai a ia kua fakaIataha foki a Saulo mo e tau tutaki ha i Tamaseko ke he falu a aho.
20 Ti fakamatala agataha e ia ke he tau sunako, ko ia ni ko e Tama he Atua.
21 Kua ofo lahi a lautolu oti kana ne fanogonogo ki ai, kua pehe age, Ka e nakai kia ko e tagata na ne favale i Ierusalema ke he tau tagata ne ui atu ke he higoa ia; ti kua hau a ia ki hinei kia lili mo e takitaki a lautolu ke he tau ekepoa ne mua?
22 Ka kua au atu ai he fakamalolo a Saulo; kua fakahakuhaku ai e tau tagata Iutaia ne nonofo i Tamaseko he fakakite fakatonu atu e ia, ko e Keriso ni hanai.
23 Kua mole atu e tau aho loga, ati pulega ai e tau tagata Iutaia ke kelipopo a ia;
24 Kua iloa e Saulo ha lautolu a pulega. Kua takahao e lautolu ke he tau gutuhala he māga, ke he aho, mo e po kia kelipopo a ia.
25 Ka kua uta he tau tutaki a ia he po, mo e tuku hifo he pa he māga, kua tuku hifo he kato.
26 Kua hoko foki a Saulo ki Ierusalema, ti eke a ia ke fakalataha mo e tau tutaki; ti kua matakutaku a lautolu oti kana kia ia, nakai talia e lautolu ko e tutaki a ia.
27 Ka e uta e Panapa a ia mo e takitaki ai ke he tau aposetolo, ti fakamatala atu e ia kia lautolu he kitia e ia e Iki ke he magahehala, mo e hana vagahau mai kia ia, mo e fakamatala fakamalolo e ia e higoa a Iesu i Tamaseko.
28 Ne o fano foki a ia mo lautolu i Ierusalema,
29 Mo e fakamatala fakamalolo e higoa he Iki ko Iesu; kua vagahau foki a ia mo e taufetoko mo e tau tagata Helenisi; ka e eke a lautolu ke kelipopo a ia.
30 Kua iloa foki he tau matakainaga ti ta hifo ai e lautolu a ia ki Kaisaria, mo e fakafano atu a ia ki Taso.
31 Ati mafola ai e tau ekalesia oti kana i Iutaia, mo Kalilaia, mo Samaria, kua fakamafanatia a lautolu; kua feoaki foki a lautolu mo e matakutaku ke he Iki, ti kua fakatokologa he lagomatai mai he Agaga Tapu.
32 Kua fai fano a Peteru ke he tau fahi oti kana, ati hifo ai a ia ke he tau tagata tapu kua nonofo i Lita.
33 Kua kitia ai foki e ia e taha tagata ko Ainea e higoa, ne valu e tau tau he takoto a ia ke he mohega, kua gagao ke he pareluti.
34 Ti tala age a Peteru kia ia, Ainea na e, kua fakamalolo tuai a koe e Iesu ko e Keriso; ati tu a ki luga, mo e folafola hau a mohega. Ati tu ai agataha a ia ki luga.
35 Ne kitia foki a ia he tau tagata oti kana ne nonofo i Lita mo Sarona, ti hagao atu ai a lautolu ke he Iki.
36 Ha i Iopa e taha tutaki fifine ko Tapita e higoa, ko e hana kakano ka fakamatala, ko Toreta; kua loga hana tau gahua mitaki mo e tau mena fakaalofa ne eke e ia.
37 Ko e vaha ia kua mamahi ai a ia, kua mate ai; kua oti foki he fakakoukou e lautolu a ia, ati tuku ai a ia ke he poko tapa ki luga.
38 Mena fetataaki a Lita mo Iopa; kua fanogonogo e tau tutaki ko Peteru ha i ai, ati fekau atu ai e lautolu e tokoua a tagata kia ia, kua ole atu, aua neke fakamule he fina age a ia kia lautolu,
39 Ti matike a Peteru kua o mo laua. Kua hoko atu a ia, ati takitaki hake ai e lautolu a ia ke he poko tapa ki luga; kua tutu mai foki e tau fifine takape oti, kua tagi, mo e fakakite mai e tau tapulu tino mo e tau tapulu lalahi ne eke e Toreta he nonofo a lautolu mo ia.
40 Ka kua tuku atu e Peteru a lautolu oti kana ki fafo, ati fakatokotui ai a ia mo e liogi; ati hagao atu ai a ia ke he tagata mate, kua pehe atu, Tapita na e, ati tu a ki luga. Kua ala a ia; kua kitia e ia a Peteru, ati matike hake ai a ia.
41 Ti kua toto ai e Peteru hana lima kua fakatu ai a ia; kua ui atu foki a ia ke he tau tagata tapu mo e tau fifine takape, ti tuku ai a ia kua moui.
42 Ne iloa e Iopa oti ni; kua tua ai foki e tau tagata tokologa ke he Iki.
43 Ati nofo ai a ia i Iopa ke he tau aho loga ke he taha tagata ko Simona e higoa, ko e taute kili manu.