Hakai 2:1-23
2 KO e fitu mahina; ko e aho uafulu ma taha he mahina, ne hoko mai ai e kupu a Iehova ke he perofeta ko Hakai, kua pehe mai.
2 Kia vagahau la a koe kia Serupapelu ko e tama a Salatielu, ko e iki ne pule kia Iuta, mo Iosua ko e tama a Iosataka ko e ekepoa ne mua, katoa mo lautolu ne toe he motu, kia pehe age,
3 Ko hai kia ne toe ia mutolu ne kitia e fale nai ke he hana fulufuluola fakamua? Po ke fefe kia ha mutolu a kitekite nai ki ai? Nakai kia tuga e mena nakai ha i ai ke he manatu ha mutolu, ka fakatatai mo e mena na?
4 Ka ko e hanai, kia fakamalolo a koe ma Serupapelu na e, kua pihia mai a Iehova; mo e fakamalolo ā koe Iosua na e ko e tama a Iosataka ko e ekepoa ne mua; mo e fakamalolo ā mutolu ko e tau tagata oti he motu mo e gahua ai a mutolu, kua pihia mai a Iehova; ha ko au, kua ha i ai au mo mutolu, kua pihia mai a Iehova Sapaota.
5 Ko e maveheaga ne eke ai e au mo mutolu he ta mai e au a mutolu i Aikupito, katoa mo e haku a Agaaga kua tumau ai ia mutolu; aua neke matakutaku a mutolu.
6 Ha ko e mena kua pehe mai a Iehova Sapaota, Ko e laga taha foki ni, kua toe tote ni, ti luelue ai e au e lagi, mo e lalolagi, mo e tahi, katoa mo e kelekele momo.
7 To luelue foki e au e tau motu oti; ti hoko mai ai e tau mena kua manako ki ai e tau motu oti; to fakapuke foki e au e fale nai ke he lilifu, kua pihia mai a Iehova Sapaota.
8 Ha ha ia au e ario, ha ha ia au foki e auro, kua pihia mai a Iehova Sapaota.
9 Kua mua e lilifu fakamui he fale nai ke he hana lilifu fakamua, kua pihia mai a Iehova Sapaota, to foaki atu ai foki e au e monuina ke he mena nai, kua pihia mai a Iehova Sapaota.
10 Ko e aho uafulu ma fa he hiva mahina ke he tau ua a Tariu, ne hoko mai ai e kupu a Iehova ke he perofeta ko Hakai, kua pehe mai,
11 Kua pehe mai a vagahau a Iehova Sapaota, Kia huhu la a koe ke he tau ekepoa ke he fakatufono, kia pehe age,
12 Kaeke ke uta he tagata e tufaaga tapu ke he kala tapulu hana, ti piki atu ai hana kala tapulu ke he areto, po ke mena kua tunu, po ke uaina, po ke puke lolo, po ke taha mena kai, to tapu ai nakai e tau mena ia? Ti tali age ai e tau ekepoa, kua pehe age, Nakai tapu.
13 Ti pehe age a Hakai, Kaeke ke piki atu e taha ne kelea ha ko e tino he tagata mate ke he taha mena he tau mena ia, to kelea nakai e tau mena ia? Ti tali age ai e tau ekepoa, kua pehe age, To kelea ai ni.
14 Ti tali age ai a Hakai, kua pehe age, Kua pihia e tau tagata nai, kua pihia foki e motu nai ki mua haku, kua pihia mai a Iehova; kua pihia foki e tau mena oti kua eke ai he tau lima ha lautolu, ko e tau mena foki kua ta age ai e lautolu ke he mena na, kua kelea ia.
15 Hanai, kia manamanatu la a mutolu, kia kamata mai he aho nai ke hoko ke he tau aho kua mole atu ke he vaha nakaila fakatoka ai e taha maka ki luga he taha maka ke he faituga a Iehova;
16 Ne kamata mai he vaha ia ne fina age ai e tagata ke he tanakiaga saito, ko e uafulu e fafati, ka e hogofulu ni ne toka ai; ne fina age e tagata ke he mena ne hihina ki ai e huhua vine ke ahu mai ai limagofulu e paita huhua vine, ka e uafulu e paita ne moua ai e ia.
17 Ne ta e au a mutolu ke he fifigo, mo e polopologa, mo e uha tuli, ke he tau gahua oti he tau lima ha mutolu; ka e nakai liliu mai ai a mutolu kia au, kua pihia mai a Iehova.
18 Kia manamanatu ā mutolu, kia kamata mai he aho nai, ke hoko ke he tau aho kua mole atu, ko e aho uafulu ma fa he mahina hiva, tali he aho ne fakave ai e faituga a Iehova; kia manamanatu ā mutolu ki ai.
19 Kua fai fua saito agaia kia ke he fale saito? Kua hoko foki ke he aho nai kua nakai fua mai e vine, mo e mati, mo e rimoni, mo e olive; ke kamata mai he aho nai ni to fakamonuina atu e au a mutolu.
20 Ne hoko mai foki e kupu a Iehova, ko e laga ua ia, kia Hakai ke he aho uafulu ma fa he mahina, kua pehe mai,
21 Kia vagahau a koe ke he iki ne pule kia Iuta ko Serupapelu, kia pehe age, To luelue e au e lagi mo e lalolagi;
22 To fuluhi e au e nofoaiki he tau kautu; to fakaoti foki e au e malolo he tau kautu he tau motu kehe; to fulufuluhi foki e au e tau kariota mo lautolu ne heke; to veveli e tau solofanua mo lautolu ne heke ai, to fekeliaki a lautolu ke he ha lautolu a tau pelu.
23 Kua pehe mai a Iehova Sapaota, Ko e aho ia to uta e au a koe haku a fekafekau ko Serupapelu ko e tama a Salatielu, kua pihia mai a Iehova; ti eke e au a koe ke tuga ne fakamau fakamailoga; ha kua fifili e au a koe, kua pihia mai a Iehova Sapaota.