Hapakuka 2:1-20
2 TO tu ai au ke he haku mena ke toko ai, to tu foki au ke he kolo, to kitekite foki au ke kitia po ke heigoa e mena ke vagahau mai ai e ia kia au, po ke heigoa foki e mena ke tali atu ai au ke he haku a taufetoko.
2 Kua tali mai foki a Iehova kia au, kua pehe mai, Kia tohi a e fakakiteaga, kia hihika ai fakamitaki ke he tau lapa maka, kia poi a ia kua totou ai.
3 Ha kua tuku mai e fakakiteaga mo e hana tau aho ne kotofa, kua alumaki foki a ia ke hoko ke he fakahikuaga, to nakai pikopiko a ia; pete he fakamule mai a ia, ka kia tatali atu ki ai; ha ko e mena to hoko mai ni, nakai mule mai.
4 Kitiala, ko ia kua mahani fakatokoluga nakai tonu hana loto i loto ia ia; ka to moui e tagata tututonu ke he hana tua.
5 Ka ko e moli ni, ko e uaina ko e mena fakavai haia, ko e tagata fakatokoluga nakai nofo foki a ia ke he hana fale, kua fakalahi e ia hana manako tuga a seoli, kua tuga e mate ni a ia, nakai ni makona; ne fakapotopoto ai e tau motu kehe oti kia ia, ne tatanaki ai foki e tau motu oti kia ia.
6 Nakai kia taute e lautolu oti e fakatai kia ia, katoa foki mo e lologo ke va kia ia, mo e pehe atu a lautolu, Oi te fakaalofa kia ia kua fakapotopoto ai e tau mena nakai ko e tau mena hana! Ato afe kia? Oi te fakaalofa foki kia ia kua tatanaki kia ia e tau koloa kehe!
7 Nakai kia mamatike fakatepetepe a lautolu ko e gagau ne fai a koe, mo e ala mai a lautolu ko e fakamamahi ne fai a koe, ti eke a koe mo mena kua fofo he tau ma lautolu?
8 Kua eke e koe e tau motu loga mo tau mena ne fofo he tau, ko e mena ia to eke ai a koe mo mena kua moua he tau ke he tau motu oti ne toe; ha ko e toto he tau tagata, mo e favale ke he motu, mo e maga mo lautolu oti kua nonofo ai.
9 Oi te fakaalofa kia ia kua moua ai ke he mahani kelea e koloa ma e hana magafaoa kia tuku ai e ia hana fata ke he mena tokoluga, kia laveaki mai a ia he malaia.
10 Kua pulega a koe ke he tau mena ke hoko ai e ma ke he magafaoa hau ni, he fakaoti ai e koe e tau motu loga; kua hala foki a koe kia koe ni.
11 Ha ko e mena to tagi mai e maka mai he kaufale, to tali age foki kia ia he akau fakalava mai he tau akau.
12 Oi te fakaalofa kia ia kua ati e maga ke he toto, mo e fakatu ai ke he mahani hepehepe!
13 Kitiala, nakai kia mai ia Iehova Sapaota ne gahua ai he tau tagata ma e afi, mo e oti manava ai e tau motu ke he tau mena nakai aogo?
14 Ha ko e mena to puke e lalolagi ke he maama he lilifu a Iehova, tuga ne toka kua ūfia ke he puke tahi.
15 Oi te fakaalofa kia ia kua fakainu e tagata ne katofia mo ia, ko koe kua liligi atu hau a tau mena kona kia ia, kua fakakona foki a ia kia kitekite atu a koe ke he ha lautolu a nakai fai felevehi.
16 Kua puke a koe ke he ma nakai ko e lilifu; kia inu foki a koe mo e kitia ai hau a nakai peritome; to liu aki atu kia koe e kapiniu he lima matau a Iehova, to ha i ai foki e kokō ke ma ai ki luga hau a lilifu.
17 Ha ko e mena to ufiufi ai a koe ke he favale ne eke i Lepanona, mo e fakaoti ai e tau manu, ne matakutaku lahi ai a lautolu; ha ko e toto he tau tagata, mo e favale ke he motu, mo e maga, mo lautolu oti kua nonofo ai.
18 Ko e heigoa kia e mena ne aoga ai e tupua kua ta he ta ai e ia ne eke ai; ko e tupua lapatoa, ne fakaako ai foki ke he pikopiko, he tua ai a ia ne eke ke he hana mena ne eke, kia eke ai e ia e tau tupua nakai vagahau.
19 Oi te fakaalofa kia ia kua pehe age ke he akau, Kia ala mai a; mo e maka nakai vagahau, Kia matike mai a! To fakaako mai kia he mena na? Kitiala a ia, kua fakakili aki ke he auro mo e ario, ka e nakai ha i ai ha fafagu i loto ia ia.
20 Ka ko Iehova ha ha he faituga tapu hana a ia; kia fakanonono a e lalolagi oti ki mua hana.