Hapakuka 3:1-19
3 KO e liogi he perofeta ko Hapakuka, ne eke mo lologo.
2 Iehova na e, kua logona e au e tala kia koe, ti matakutaku ai au; Iehova na e, kia liu fakamoui ai e koe hau a gahua ke he tau tau ia; ko e tau tau ia kia fakailoa mai ai; kia manatu a e koe ke he fakaalofa, ka ita ai.
3 Ne haele mai e Atua i Timanu, ne haele mai foki a ia he Tapu mai he mouga ko Parana. Sila. Ne ufia e lagi ke he hana kikila, ko e hana fakahekeaga foki ne puke ai e lalolagi.
4 Ko e kikila foki ne tuga e la, ne hoko mai e tau kave he la mai he lima hana, ha ha i ai foki hana mana kua ufiufi.
5 Ne mua atu e tatalu ki mua hana, ne mui atu foki kia ia e gagao vevela.
6 Ne tu a ia mo e fafati e lalolagi; ne kitekite mai a ia mo e fakavivivivi ai e tau motu kehe; ne fakamavehevehe foki e ia e tau mouga tukulagi; ne fakatokolalo ai e tau matiketike tukulagi; ko e hana tau puhala ne tali mai i tuai tigahau.
7 Ne kitia e au e tau fale ie a Kusa ne matematekelea; ne vivivivi e tau ie puipui he motu ko Mitiana.
8 Ne mamahi kia e finagalo a Iehova ke he tau vailele? po ke ita kia a koe ke he tau vailele, po ke ita lahi kia a koe ke he tahi, he heke e koe hau a tau solofanua mo e hāu a tau kariota he fakamouiaga?
9 Ne fukefuke ni hau a kaufana, ko e tau omonuo ne vagahau mai ai a koe ke he tau magafaoa. Sila. Ne ihiihi ai e koe e lalolagi ke he tau vailele.
10 Ne kitia he tau mouga a koe, ti vivivivi ai a lautolu; ne tafe age a vai ko e fakapuke ni; ne vagahau mai e moana, ne nikiti ki luga hana tau lima.
11 Ne tutu ai e la mo e mahina ke he mena ha laua kua nonofo ai; ha ko e maama he hāu a tau fana he o a lautolu, mo e maama he hāu a tao kikila.
12 Ne haele atu a koe mo e ita lahi ke he lalolagi, ne taholi e koe e tau motu kehe ke he hau a ita.
13 Ne haele atu a koe ke fakamoui hau a motu, ke fakamoui a ia ne fakauku e koe; ne lipilipi e koe e ulu he fale he tau tagata mahani kelea, kua fakatoka noa e fakaveaga ke hoko ni ke he ua. Sila.
14 Ne hoka e koe ke he hana tau tao ni e tau ulu he hana tau tagata tau; ne feoho mai a lautolu tuga ne afa ke vehevehe au; ne eke mo mena ke hula ai a lautolu ke fakaotioti fufu e tau tagata nonofogati.
15 Ne haele a koe i loto he tahi mo e hau a tau solofanua, ne haele foki a ia ke he fakapotopotoaga he tau vai ne loga.
16 Ne logona e au ti ofotu ai haku manava, ne vivivivi ai haku a tau laugutu ke he leo; ti hoko mai ai e popo ke he haku a tau hui motua, ti vivivivi ai au; kia okioki ai au ke he aho matematekelea, ka hake a ia ke he motu ke tatanaki mai ke tau kia tautolu.
17 Pete he nakai fiti mai e mati, ti nakai fai fua foki e tau vine, ti fakahiku ai foki e tau fua olive, ti nakai tutupu mai foki e tau mena kai he fonua; ti fakaoti foki e fuifui mamoe ke he lotopa mamoe, ti nakai ha i ai e tau povi ke he tau fale povi;
18 Ka ko au to olioli ni au kia Iehova, to fiafia ni au ke he Atua he haku a Fakamouiaga.
19 Ko e Iki ko Iehova, ko e haku a malolo a ia, kua eke e ia haku tau hui ke tuga ne tau hui he aila, ko ia foki ke fano ai au ke he haku a tau mena tokoluga.
Ma e uhu lologo ke he tau nekina.