Heperu 1:1-14
1 KO e Atua, ko ia ne vagahau mai ke he vaha i tuai, ne tuku fano mai ke he tau lagatau kehekehe ke he tau matua ke he tau perofeta,
2 Kua vagahau mai e ia kia tautolu ke he tau aho nai ke fakahiku ai ke he Tama, ko ia ne kotofa e ia mo mataohi he tau mena oti kana; ne eke foki e ia e tau mena oti kia ia;
3 Ko e kikila a ia he hana lilifu, mo e hana fakatai moli ni, kua fakatumau ai e ia e tau mena oti kana ke he kupu he hana malolo, ne fakamea e ia ni e tau hala ha tautolu, ti nofo ai a ia ke he fahi matau he Lilifu mua ue atu ha i luga.
4 Ti kua mua a ia ke he tau agelu, tuga ne mua e higoa kua to kia ia ke he tau higoa ha lautolu.
5 Ha kua tala age ne fe a ia ke he taha agelu, Ko e haku a Tama a koe, kua fanau e au a koe ke he aho nai? Mo e pehe, To eke au mo Matua hana, to eke foki a ia mo Tama haku.
6 Ka kua pehe mai a ia he liu foki ta mai e ia hana uluaki ke he lalolagi, Kia hufeilo e tau agelu oti he Atua kia ia.
7 Ko e tau agelu kua talahau ai ni e ia, Kua uta e ia hana tau agelu, ko e tau matagi, mo e hana tau fekafekau, ko e afi puhopuho.
8 Ka kua pehe age ke he Tama, Ko e hau a nofoaiki, ko e Atua na e, to tukulagi tukumuitea ia; ko e tokotoko he hau a kautu, ko e tokotoko he tututonu ia.
9 Kua fiafia a koe ke he mahani tututonu, ka e vihiatia e mahani hepehepe; ko e mena ia, kua fakauku ai a koe he Atua, ko e hau a Atua ni, ke he lolo he fiafia ke mua ke he tau kapitiga hau;
10 Mo e taha kupu, Ko e Iki na e, ko koe ni ne fakave e lalolagi ke he kamataaga; ko e tau lagi foki ko e tau gahua ia he hau a tau lima.
11 To fakaoti e tau mena ia, ka e tumau a koe, to popo e tau mena oti ia, tuga ne tapulu popo.
12 Tuga ne ie laulahi ke vakai ai e koe e tau mena ia, to fakaoti ia, ka ko koe kua toka taha ni a koe, nakai fakai foki ke fakahiku e tau tau hau.
13 Ka e tala age ne fe a ia ke he taha agelu, Nofo a koe ke he fahi matau haku, ato eke e au a lautolu kua fai fi kia koe mo fakatuagahui hāu.
14 Nakai kia ko e tau agaga ke fekafekau ai a lautolu oti, kua fakafano mai a lautolu ke fekafekau ma lautolu ke moua ai e moui?