Heperu 11:1-40
11 KA ko e tua, ko e falanaki haia ke he tau mena kua amaamanaki ki ai, ko e fakamoli he tau mena nakai kitia atu.
2 Ha ko e mena ia ni ne talahaua mitaki ai e tau tagata i tuai.
3 Ko e tua kua iloa ai e tautolu ne eke e tau mena oti kana ke he kupu he Atua, kua nakai eke foki e tau mena kua kitia ke he tau mena kua fakakite.
4 Ko e tua ne ta age ai ke he Atua e Apelu e poa kua mua he mitaki ke he poa a Kaino, ko e mena ia kua talahaua ai kua tututonu a ia, kua talahaua he Atua kua mitaki hana tau poa; ko e mena ia foki pete ni he mate a ia, kua vagahau agaia ni.
5 Ko e tua ne uta kehe ai a Enoka kia nakai hoko ai a ia ke he mate, kua nakai kitia foki a ia, ha kua uta he Atua a ia; ha kua talahaua ka e nakaila uta kehe a ia, Ko ia ko e tagata kua fakafiafia atu ke he Atua.
6 Ka nakai tua, ti nakai maeke ke fakafiafia kia ia; ha ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.
7 Ko e tua ne taute ai e Noa e vaka mo e matakutaku, kia momoui ai hana faoa, ha kua fakailoa he Atua kia ia e tau mena nakaila kitia ke he vaha ia; kua fakahala ai e ia e lalolagi, ti moua e ia e tututonu, ha ha he tua.
8 Ko e tua ne omaoma ai a Aperahamo ka kua tala age kia ia ke fano ke he mena ke moua e ia ke eke mo fonua hana; kua fina atu foki a ia, ka e nakai iloa po ko fe e mena kua fano a ia ki ai.
9 Ko e tua ne nofo paea ai a ia ke he motu ne talahaua, tuga ne nofo ke he motu kehe, kua nofo ke he tau fale ie, katoa mo Isaako mo Iakopo, ko laua ne ohi fakalataha mo ia he talahauaga taha;
10 Ha kua tatali atu a ia ke he māga kua fai fakaveaga, ko ia ne eke mo e tufugatia ai ko e Atua haia.
11 Ko e tua ne moua ai e Sara e malolo ke fanau ai, ne fanau foki e ia ka kua mole atu e vaha he hana malolo, ha kua manatu a ia kua fakamoli a ia ne talahau mai;
12 Ko e mena ia ne tutupu ai mai ia ia toko taha, ko ia foki kua mate ke he tau mena ia, ne tokologa tuga e tau fetu he lagi, tuga e oneone foki he matāfaga nakai maeke ke totou.
13 Kua mamate a lautolu oti kana na mo e tau, kua nakai moua e tau mena ne talahaua mai, ka kua iloa ai ka e mamao, ne tua foki ki ai, ti talia mo e fiafia e lautolu, mo e talahau mai ko e tau tagata kehe a lautolu mo e tau tagata o fano ke he lalolagi.
14 Ha ko lautolu kua talahau pihia, kua fakailoa fakatonu mai e lautolu kua kumi e lautolu ha lautolu a motu.
15 Kane mai ke manatu a lautolu ke he motu ne o mai ai a lautolu, po kua maeke ia lautolu, ke liliu atu ki ai;
16 Ka ko e hanai, kua manako a lautolu ke he motu kua mua he mitaki ko e motu he lagi haia; ko e mena ia nakai ma ai e Atua kia lautolu ke totoku ai ko ia ko e Atua ha lautolu; ha kua taute e ia e māga ma lautolu.
17 Ko e tua ne eke ai e Aperahamo a Isaako mo poa, kua kamatamata mai a ia, ko ia foki ne talia e tau kupu ne talahaua ne ta atu e ia mo poa e tama fuataha hana,
18 Ko ia ne tala atu ki ai, Mai ia Isaako hau a fanau.
19 Kua manatu a ia kua maeke ni ke he Atua ke fakatu a ia mai ia lautolu kua mamate, ne moua mai ai foki a ia ke he fakatai.
20 Ko e tua ne fakamonuina ai e Isaako a Iakopo mo Esau ke he tau mena ne tatali.
21 Ko e tua ne fakamonuina ai e Iakopo e na tama tokoua a Iosefa ke he vaha ne mate ai a ia, ne hufeilo foki a ia mo e falanaki ke he ulu he hana tokotoko.
22 Ko e tau ne fakamanatu mai ai e losefa he mate a ia ke he o keheaga he fanau a Isaraela, mo e poaki foki kia lautolu ke he tau huimotua hana.
23 Ko e tua ne fufu ai a Mose he hana tau matua tolu e mahina ke he vaha ne fanau ai ha kua kitia e laua ko e tama fulufuluola a ia; kua nakai matakutaku foki a laua ke he poaki he patuiki.
24 Ko e tua, kua lahi a Mose ti nakai maeke ai e ia ke talahau a ia ko e tama he tama fifine a Farao,
25 Ne fifili e ia e matematekelea fakalataha mo e tau tagata he Atua, ka e nakai ko e fiafia ke he hala kua mole vave.
26 Ne manatu a ia ko e ekefakakelea ha ko Keriso, ko e koloa haia kua mua ke he tau tanakiaga koloa a Aikupito; ha kua amaamanaki a ia ke he tuai.
27 Ko e tua ne toka ai e ia a Aikupito mo e nakai matakutaku a ia ke he ita he patuiki; ha kua fakauka a ia tuga ne mena kua kitia e ia a ia nakai kitia.
28 Ko e tua ne eke ai e ia e paseka mo e fakainuinu atu e toto, kia nakai piki kia lautolu a ia ne tamate e tau uluaki.
29 Ko e tua ne o hifo ai a lautolu ke he tahi Kula tuga e kelekele momo, kua kamata ai he tau tagata Aikupito, ti mahakava ai a lautolu.
30 Ko e tua ne mālŏlo ai e tau pa a Ieriko, he takai e lautolu fitu e aho.
31 Ko e tua nakai mamate fakalataha ai a Raava ko e fifine fakataka mo e tau tagata faliuliu kua talia e ia mo e totonu a laua ne toko e motu.
32 Ko e heigoa foki e mena ke lafilafi ke he haku a tala atu? ha ko e mena kūkū e tau aho ke talatala atu ai kia Kiteona, ko Palako foki, mo Samisoni, mo Iefeta, ko Tavita foki, mo Samuela, mo e tau perofeta.
33 Ko lautolu na, ne kautu a lautolu ke he tau motu ha ko e tua, ne eke ai e mahani tututonu, ne moua ai e tau kupu kua talahaua mai, ne pa ai e tau gutu he tau leona.
34 Ne tamate ai e malolo he afi, ne hao ai mai he mata he pelu, ne fakamalolo ai foki ka lolelole, ne eke ai a lautolu mo tau toa ke tau, ne tutuli ai e tau kau he tau motu kehe;
35 Ne moua he tau fifine ha lautolu a tau tagata mamate kua tutu mai tuai; ne fakakikiveka e falu, ti nakai talia e lautolu e fakamouiaga, kia moua ai e lautolu e liliu tutu mai kua mua he mitaki;
36 Ne kamatamata foki e falu he va ki ai, mo e fahi, katoa ni mo e lili, mo e tuku ke he tau fale puipui;
37 Ne taulitimaka a lautolu, ne helehele ke he tau kili, ne kamatamata, ne tamate ke he pelu; ne o fano a lautolu mo e tapulu ke he tau kili mamoe mo e tau kili koti; ne nonofogati a lautolu, mo e ekefakakelea mo e matematekelea,
38 (Nakai lata e lalolagi ke nonofo ai a lautolu,) ne o fano a lautolu ke he tau tutakale, mo e tau mouga, mo e tau ana, mo e tau maihi he kelekele.
39 Ko lautolu oti ia ne talahaua mitaki ke he tua, nakai moua e lautolu e mena ne talahaua mai,
40 Kua taute he Atua e taha mena kua mua he mitaki ma tautolu, kia nakai katoatoa ai a lautolu ka nakai ha i ai a tautolu.