Heperu 12:1-29
12 HA ko tautolu foki kua agaagai a tautotu ke he fakapotopotoaga ha lautolu kua kitekite mai kua tokologa pihia, kia tuku kehe e tautolu e tau mena mamafa oti kana, mo e hala kua moua vave mai, ka e tafepoi fakauka a tautolu ke he poitufi kua toka ki mua ha tautolu,
2 Mo e kikite atu kia Iesu, ko e kamataaga mo e katoatoaaga he tua, ko ia ne fakauka ke he satauro, mo e fakateaga a ia ke he ma, ha ko e fiafia kua toka ki mua hana, kua nofo foki a ia ke he fahi matau he nofoaiki he Atua.
3 Ha ko e mena manamanatu la a mutolu kia ia ne fakauka ke he totoko mai he tau tagata hala kia ia, neke fakalolelole ha mutolu a tau loto mo e nakai fahia.
4 Kua nakaila totoko atu a mutolu ke hoko ke he fakamaligiaga he toto he totoko atu a mutolu ke he hala.
5 Kua nimo foki ia mutolu e tomatomaaga kua tala age kia mutolu tuga e talahau ke he fanau, Haku tama na e, aua neke fakateaga a koe ke he akonakiaga he Iki, aua foki neke fakalolelole a koe ka akonaki mai e ia a koe.
6 Ha ko ia kua ofania he Iki kua akonaki atu a ia kia ia, kua fahi foki e ia e tau tama oti kua talia a ia.
7 Kaeke kua talia e mutolu e akonaki, ti eke he Atua kia mutolu tuga e mahani hana ke he tau fanau; ha ko hai kia e tama kua nakai akonaki he matua?
8 Kaeke kua noa a mutolu mo e akonaki, kua igatia ai e tau fanau oti kana, ko e tau tama tohi a mutolu ka e nakai ko e tau fanau.
9 Ha ko e mena foki ha ia tautolu e tau matua he tau tino ha tautolu, ne akonaki mai kia tautolu, kua maimaina a tautolu ki ai; ka e nakai kia mua ha tautolu a omaoma ke he Matua he tau agaga ha lautolu, ti momoui ai?
10 Ha ko lautolu, ne akonaki mai a lautolu kia tautolu ke he tau aho gahoa he loto a lautolu ki ai; ka ko ia, kua akonaki mai a ia kia tupu e mitaki kia tautolu kia igatia ai a tautolu mo e hana mahani mitaki.
11 Ko e tau akonakiaga oti kana kua nakai manatu a tautolu ke he vaha ia ko e mena ke fiafia ki ai, ka ko e mena ke momoko ai; ati oti ka e fua mai e fua he tututonu ke monuina ai a lautolu kua akonaki ai.
12 Ko e mena ia, kia fakahakohako ai e tau lima kua piki mo e tau tulihui kua tagatagatō.
13 Mo e kupu e, kia eke fakamolemole e tau puhala ma e tau hui ha mutolu, neke mafoki kehe e tau kulikuli, ka e mitaki ke fakamalolo ai.
14 Kia tutuli e mutolu e mafola mo e tau tagata oti kana katoa mo e mahani mitaki, ka noa mo ia kua nakai maeke ia taha ke kitia e Iki;
15 A mutolu neke nakai moua he taha tagata e fakaalofa noa he Atua? neke tupu hake ha vaka kona ti fakalavelave ai a mutolu mo e kelea ai e tokologa;
16 Neke ha i ai ha tagata feuaki, po ke taha kua fakateaga ke he tau mena tapu, tuga na Esau, ko ia ne āge e tufaaga uluaki hana ke fakafua aki e taha mena kai.
17 Nukua iloa e mutolu kua mole e tau mena ia, ti manako ai a ia ke moua e fakamonuina ka e tiaki ni a ia; ha kua nakai moua e ia ha mena ke faliu ai e loto he matua hana, pete he kumi fakamakutu ai e ia mo e tau hihinamata.
18 Ha ko e mena nakai hohoko mai a mutolu ke he mouga kua amohia mo e puho he afi mo e tau aolagi uli, mo e pouli kikio, mo e afa,
19 Mo e leo he pu, mo e leo he tau kupu, kua olelalo atu a lautolu ne fanogonogo ki ai, aua neke liu vagahau mai foki ha kupu kia lautolu.
20 (Ha ko e mena nakai fahia a lautolu ke he mena ne poaki, Kaeke foki ke piki e manu ke he mouga kia taulitimaka a ia, po ke hoka ke he tao ato ati ai.
21 Kua fakamatakutaku pihia foki e mena ne kitia, kua talahau mai a Mose, Kua matakutaku ni au mo e vivivivi.)
22 Ka kua hohoko mai a mutolu ke he mouga, ko Siona, mo e māga he Atua moui, ko Ierusalema ha he lagi, mo e tau agelu afe mo afe,
23 Ke he fakapotopotoaga katoatoa mo e ekalesia he tau uluaki, kua tohia ke he lagi, mo e Atua ko e fakafili he tau tagata oti, mo e tau agaga he tau tagata tututonu kua fakakatoatoa ni,
24 Mo Iesu ko e hulalo he maveheaga fou, mo e toto ke pīpī aki kua talahau mai e tau mena kua mua e mitaki ke he toto a Apelu;
25 A mutolu, neke totoko a mutolu kia ia kua vagahau mai. Ha ko e mena kaeke kua nakai hao a lautolu ne totoko kia ia ne vagahau mai he lalolagi, ti au atu ai he nakai hao a tautolu ka mafoki kehe ia ia kua vagahau mai he lagi;
26 Ne luelue e lalolagi he hana leo ke he vaha ia; ka kua talahau mai nai a ia, kua pehe mai, To lagataha foki he luelue e au, nakai ko e lalolagi hokoia, ka e katoa foki mo e lagi.
27 Ko e kupu nai foki, To lagataha foki, kua fakailoa mai ai e ia e utakeheaga he tau mena ne luelue, tuga ne tau mena kua eke, kia tumau e tau mena kua nakai maueue.
28 Hanai, kua moua e tautolu e kautu kua nakai maueue, kia fakaaue ai a tautolu, kia fekafekau ai a tautolu ke he Atua mo e fakafiafia kia ia, mo e maimaina, mo e matakutaku.
29 Ha ko e Atua ha tautolu ko e afi puhopuho haia.