Heperu 13:1-25
13 KIA tumau e feofanaki he tau matakainaga,
2 Aua neke nimo ia mutolu ke fakaalofa age ke he tau tagata kehe; ha ko e mena ia kua talia ai he falu e tau agelu mo e nakai iloa.
3 Kia manatu a mutolu kia lautolu kua lili, tuga e mena lili a mutolu fakalataha mo lautolu; kia manatu kia lautolu kua matematekelea ha ko e mena ha he tino foki a mutolu.
4 Kia eke e mutolu ke mitaki he fai hoana e tau tagata oti kana, mo e mohega foki kua nakai fakakelea; ka e fakahala he Atua e tau tagata feuaki mo e faivao.
5 Kia noa ha mutolu a mahani mo e velevelekoloa; kia fakamamate a mutolu ke he tau mena ha ia mutolu; ha ko e mena talahau mai a ia, Nakai tuai toka ni e au a koe, nakai tuai tiaki ni e au a koe.
6 Ko e mena ia kua talahau atu e tautolu mo e fakamalolo, Ko e Iki, ko e haku a lagomatai haia, nakai matakutaku au ke he tau mena ke eke he tau tagata kia au.
7 Kia manamanatu e tau takitaki ha mutolu, ko lautolu kua talahau atu e kupu he Atua kia mutolu; kia fifitaki a mutolu ha lautolu a tua, mo e manamanatu e fakahikuaga he tau mahani ha lautolu.
8 Ko Iesu Keriso, nakai kehe a ia, neafi, mo e aho nai, to hoko foki ke he tukulagi.
9 Aua neke hikihikifano a mutolu ke he tau kupu kehe, mo e tau kakano kehekehe; ha kua mitaki ke fakamau e loto ke he fakaalofa noa, nakai ko e tau mena kai, kua nakai aoga kia lautolu kua omaoma ki ai.
10 Ha ha ia tautolu e fata poa kua nakai lata ke kai e tau mena kua toka ki ai a lautolu kua fekafekau ke he fale uta fano.
11 Ha ko e tau manu ha lautolu e toto ne uta he ekepoa ne mua ke he mena tapu ke eke mo poa ha ko e hala, kua huhunu ha lautolu a tau tino ki tua he heaga api.
12 Ko e mena ia kua mamahi ai a Iesu ki tua he gutuhala he maga, kia fakatapu ai e ia e tau tagata ke he hana toto ni.
13 Ko e mena ia kia o atu ai a tautolu kia ia ki tua he heaga api, mo e fakauka a tautolu ke he tauamuamu mai tuga ne amuamu kia ia.
14 Ha ko e mena nakai fai māga a tautolu ke tumau i hinei, ka kua kumi e tautolu kia ia ne tatali.
15 Hanai, kia uta mau e tautolu e poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.
16 Aua neke nimo ia mutolu ke mahani mitaki atu mo e fakaalofa atu; ha ko e tau poa pihia kua fiafia ai e Atua.
17 Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.
18 Kia liogi a mutolu ma mautolu; ha kua taofi e mautolu ha ha ia mautolu e loto manamanatu hifo mitaki, kua loto a mautolu ke mahani mitaki ke he tau mena oti kana;
19 Kua au atu ai foki haku a ole atu kia mutolu ke eke e mena na, kia vave ai haku a liuaki atu kia mutolu.
20 Ka kia fakakatoatoa a mutolu he Atua hana e monuina, ko ia ne liu fakatu mai ia lautolu kua mamate e Leveki mamoe ne mua, ko e Iki ha tautolu ko Iesu, ha ko e toto he maveheaga tukulagi.
21 Kia fakakatoatoa e ia a mutolu mo e tau gahua mitaki oti kana, kia eke e mutolu hana finagalo, kia eke ai e ia i loto ia mutolu e tau mena kua fulufuluola ki mua hana ha ko Iesu Keriso; kia ha ia ia e fakahekeaga tukulagi tukumuitea. Amene.
22 Ko e tau matakainaga na e, kua ole atu au kia mutolu ke talia e kupu tomatoma nai; ha ko e mena kua tohi atu e au kia mutolu mo e tau kupu gahoa.
23 Kia iloa e mutolu kua fakafano kehe tuai a Timoteo, ko e matakainaga ha tautolu; kaeke ke hau vave a ia, ti ahi atu a maua mo ia kia mutolu.
24 Fakaalofa atu au ke he tau takitaki oti ha mutolu, katoa mo e tau tagata tapu gotoa. Kua fakaalofa atu a lautolu i Italia kia mutolu.
25 Kia ha ha ia mutolu oti kana e fakaalofa noa. Amene.