Heperu 4:1-16
4 HANAI, kia matakutaku a tautolu ha kua toka agaia ia tautolu e kupu ne talahaua mai ke hao atu ke he hana okiokihaga, neke tuga mo e mena nakai moua ai e falu ia mutolu.
2 Ha kua fakamatala mai e vagahau mitaki kia tautolu tuga na lautolu; ka kua nakai aoga e kupu ne fanogonogo a lautolu ki ai, ha kua nakai fakalata mo e tua ke he tau loto ha lautolu ne fanogonogo ki ai.
3 Ha ko tautolu kua tua to hao atu a tautolu ke he okiokihaga, tuga he talahau e ia, Tuga e omonuo au ke he haku a ita, Nakai fakai ke hao atu a lautolu ke he haku a okiokihaga; pete ni he mau e tau gahua ke he vaha ne fakave ai e lalolagi.
4 Ha ko e mena kua vagahau mai a ia ke he taha kupu ke he aho fitu kua pehe mai, Kua okioki foki e Atua ke he aho fitu he hana tau gahua oti kana.
5 Kua pehe foki e kupu nai, Nakai fakai ke hao mai a lautolu ke he haku a okiokihaga.
6 Hanai, kua tuku ke hao e falu ki ai; ka e nakai hao atu a lautolu ne fakamatala fakamua ki ai e vagahau mitaki ha kua faliuliu ni,
7 Kua kotofa foki e ia e taha aho ke he hana kupu kua talahaua mai e Tavita, Ko e aho nai, ka mole atu e taha vaha tuga he talahau mai, Ko e aho nai kaeke ke fanogonogo ai a mutolu ke he hana a leo, aua neke fakamao e tau loto ha mutolu.
8 Ka ko e mena kane mai fakahoko e Iosua a lautolu ke he okiokihaga; po kua nakai vagahau fakamui he Atua ke he taha aho.
9 Haia ni, kua toka agaia e okiokihaga tuga e aho sapati mo e tau tagata he Atua.
10 Ha ko ia kua hao atu ke he hana okiokihaga, kua okioki foki a ia ke he hana tau gahua, tuga e Atua ke he hana ni.
11 Hanai, kia eke taha a tautolu ke hao atu ke he okiokihaga ia, neke veli taha tagata he hana fifitaki kia lautolu ne faliuliu.
12 Ha ko e kupu he Atua kua moui ia, mo e gahua malolo, kua mua foki hana matila ke he tau pelu oti kana kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.
13 Nakai fakai foki ha mena taha kua galo ki mua hana, ka kua toka noa mo e maliali e tau mena oti kana ke he na fofoga hana ke talahau ki ai e tautolu e tau mahani ha tautolu.
14 Hanai, ha ha ia tautolu e ekepoa lahi ne mua, kua haele atu a ia ke he lagi, ko Iesu e Tama he Atua, kia toto mau e tautolu ke he kupu kua talahau atu e tautolu.
15 Ha kua nakai ha ia tautolu e ekepoa ne mua kua nakai maeke ke mamahi fakaalofa fakalataha mo tautolu ke he tau mena kua lolelole ai a tautolu, ka kua kamatamata a ia ke he tau mena oti kana tuga a tautolu, ka e nakai fai hala a ia.
16 Ko e mena ia kia fakatata atu ai a tautolu mo e fakamalolo ke he nofoaiki he fakaalofa noa, kia fakaalofa mai ai a ia kia tautolu, kia moua foki e fakaalofa noa ke lagomatai mai ai ke he aho kua lata ai.