Heperu 5:1-14
5 HA ko e tau ekepoa ne mua oti kana kua fifili mai he tau tagata, kua kotofa a lautolu ma e tau tagata ke he tau mena he Atua, kia eke ai e lautolu e tau poa mo e tau poa tamate ha ko e tau hala,
2 Kia maeke ai ia lautolu ke mahani totonu kia lautolu kua goagoa mo lautolu kua hehe, ha kua agaagai foki a lautolu ke he lolelole.
3 Ha ko e mena ia foki, kua lata he eke e lautolu e tau poa mo e tau tagata ha ko e tau hala, ti eke pihia foki e lautolu ma lautolu ni.
4 Nakai eke noa foki e taha e feua lilifu ia, ha ko ia hokoia kua kotofa he Atua, ke tuga a Arona foki.
5 Kua pihia foki a Keriso, nakai fakalilifu e ia a ia kia eke a ia mo ekepoa ne mua, ka ko ia ne vagahau kia ia, Ko e haku a Tama a koe, ne fanau e au a koe ke he aho nai;
6 Tuga foki he talahau mai e ia ke he taha kupu, Ko e ekepoa a koe tukulagi ke he kainaga fakalataha mo Mekisateko.
7 Ko ia haia ne liogi ke he tau aho ne tino tagata mai ai, mo e ole atu mo e tagi lahi mo e tau hihina mata kia ia kua maeke ni ke fakamoui a ia mai he mate, kua fanogonogo foki a ia kia ia he maimaina a ia.
8 Pete ni ko e Tama a ia, ka ko e tau mena ne mamahi ai a ia kua ako ai e ia e omaoma.
9 Kua fakakatoatoa foki a ia, ti eke ai a ia mo tupuaga he moui tukulagi kia lautolu oti kana kua omaoma kia ia.
10 Kua kotofa he Atua a ia ko e ekepoa ne mua ke he kainaga fakalataha mo Mekisateko.
11 Kua toka ia mautolu e tau kupu loga kia ia kua uka ke fakamatala atu ai, ha kua eke a mutolu mo tau tagata teligatuli.
12 Ha ko e mena ane mai eke a mutolu mo tau akoako po kua lata ai ha kua leva, ka e aoga ni kia mutolu ke liu foki fakaako e taha kia mutolu ke he tau kupu he kamataaga he kupu he Atua; kua eke a mutolu tuga na lautolu kua kai huhu ka e nakai ko e tau mena kakano.
13 Ha ko lautolu oti kua kai huhu, nakai maama a lautolu ke he kupu he tututonu; ha ko e tau tama mukemuke a lautolu.
14 Ka ko e tau mena kakano, kua lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.