Heperu 6:1-20
6 KO e mena ia kia toka ai e tautolu e tau kupu fakamua a Keriso, kia hohoko atu a tautolu ke he katoatoaga, aua neke liu tuku hifo e fakaveaga he tokihala ke he tau gahua ke mamate ai, mo e tua ke he Atua,
2 Ko e tau kupu foki he tau papatisoaga, mo e fakalago he tau lima, mo e liliu tutu mai foki a Iautolu kua mamate, mo e fakafiliaga tukulagi.
3 To eke foki e tautolu e mena ia kaeke ke finagalo he Atua ki ai.
4 Ha ko e mena nakai maeke ia lautolu kua fakamaama tuai, kua kamata foki e mena kua foaki noa mai he lagi, ti igatia foki mo e Agaga Tapu,
5 Kua kamata foki e kupu mitaki he Atua, mo e tau malolo, he mouiaga ne tatali,
6 Kua veveli foki a lautolu, ti nakai maeke ke liu fakafou foki a lautolu ke he tokihala, nukua fakasatauro ni e lautolu e Tama he Atua, mo e fakavihiatia a ia ki mua he tau tagata.
7 Ha ko e kelekele kua inu e uha kua to mau ki ai, mo e tutupu ai e tau mena kua aoga kia lautolu kua gahua ki ai, kua moua ia e monuina mai he Atua.
8 Ka ko e mena kua tutupu mai ai e tau akau mahukihuki mo e talatala, kua tiaki ia, kua tata tuai ke he kaialu, ko e hana fakahikuaga ko e huhunu ia.
9 Ka ko mutolu, ko e tau fakahelehele na e, kua iloa tonuhia e mautolu kua mua e mitaki he tau mena mai ia mutolu, mo e tau mena ha ha he fakamouiaga pete ni he pihia ha mautolu a talahau atu.
10 Ha ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa, kua fekafekau tuai a mutolu ke he tau tagata tapu mo e fekafekau agaia ki ai.
11 Ka kua manako lahi a mautolu kia takitokotaha a mutolu mo e fakakite mai e fakamakutu ia, kia mauokafua ai e amaamanaki ato hohoko ke he fakahikuaga.
12 Kia nakai eke a mutolu mo tau tagata teva, ka kia fifitaki a mutolu kia lautolu kua moua tuai ke he tua mo e fakauka e tau mena kua talahaua mai.
13 Ha ko e mena ne talahau he Atua kia Aperahamo, kua nakai maeke ia ia ke omonuo ke he taha kua mua kia ia, ti omonuo ai a ia kia ia ni,
14 Kua pehe mai, Ko e moli ni, ke fakamonuina e au kia koe, mo e fakatokologa lahi e au e tau fanau hau.
15 Ne fakauka ni a ia, ti moua ai e ia e mena kua talahaua mai.
16 Ha kua omonuo ni e tau tagata ke he taha kua mua kia lautolu, ko e omonuo foki ko e fakahikuaga haia he tau taufetoko oti kia lautolu ke fakamoli aki.
17 Pihia foki e Atua kua finagalo ke fakakite fakatonu ai e mauokafua he hana pule kia lautolu kua kotofa ke moua ai e tau mena kua talahaua mai, kua lafilafi e ia ki ai e omonuo;
18 Kia ha ia tautolu e na mena ua kua mauokafua kua nakai maeke ke pikopiko ai e Atua, kia moua ai e tautolu e fakamafanaaga lahi, ko tautolu kua fehola ke toto e amaamanaki kua tuku tuai ki mua ha tautolu.
19 Ha ha ia tautolu e amaamanaki ia tuga ne taula he agaga, kua nakai matoho mo e mauokafua, kua hoko tuai ki loto he fahi atu he ie puipui.
20 Ko e mena haele atu ai a Iesu ko e toko ma tautolu; kua eke a ia mo ekepoa ne mua tukulagi he kainaga fakalataha mo Mekisateko.