Heperu 7:1-28
7 HA ko Mekisateko nai, ko e patuiki a Salema, ko e ekepoa he Atua mua ue atu, ne feleveia mo Aperahamo he liu mai a ia mai he keliaga he tau patuiki, mo e fakamonuina a ia,
2 Ne age foki e Aperahamo kia ia e tau mena ne hogofulu aki e tau mena oti; (ko e kakano fakamua he hana higoa ke fakamatala ai, ko e patuiki he tututonu, mo e patuiki a Salema, ko e patuiki he mafola haia),
3 Nakai fai matua tane, nakai fai matua fifine nakai fai tupuna, nakai fai kamataaga he hana tau aho, po ke fakahikuaga he hana moui, ka e fakatai ke he Tama he Atua a ia, kua tumau tukulagi a ia ko e ekepoa.
4 Hanai, kia manamanatu ke he homo atu he tagata ia, ne ta age he tupuaga ko Aperahamo ki ai e tau mena ne hogofulu aki e tau mena kua fofo mai.
5 Ko lautolu foki mai he fanau a Levi, kua eke e feua he ekepoa, kua moua e lautolu e poaki ke he fakatufono ke eke ma lautolu e tau mena ne hogofulu aki e tau mena he tau tagata, ko e tau matakainaga ha lautolu, pete ni he tutupu mai a lautolu mai he tino a Aperahamo.
6 Ka ko ia kua nakai mai ia lautolu hana tupuna, ne moua e ia mai ia Aperahamo e tau mena ne hogofulu aki, mo e fakamonuina atu kia ia kua toka ki ai e kupu ne talahaua.
7 Ka kua iloa maliali, ko ia kua mua kua fakamonuina e ia a ia kua tote.
8 Ha he mena nai foki kua eke ma lautolu he tau tagata ke mamate e tau mena ne hogofulu aki; ka ko e mena na kua eke ai e ia kua talahau ki ai kua moui na ia.
9 Kaeke foki kua lata ke pehe atu au, ko Levi, ko ia kua eke māna e tau mena ne hogofulu aki, ne hogofulu aki e ia hana tau mena ke he lima a Aperahamo.
10 Ha ko e mena ha he tino he hana matua tane a ia ke he vaha ne feleveia ai a Aperahamo mo Mekisateko.
11 Hanai, ane mai katoatoa e mitaki ke he feua he tau ekepoa he kainaga a Levi (ha ko e mena kua moua he tau tagata e tau fakatufono mo e mena ia), po kua aoga ha ha ke fakatu mai taha ekepoa he kainaga fakalataha mo Mekisateko, ka e nakai talahaua ko e kainaga fakalataha mo Arona?
12 Ha ko e mena kaeke kua hiki e tau ekepoa, ti kua lata foki ke hiki e fakatufono.
13 Ha ko ia kua talahaua ki ai e tau mena ia, ko e tagata he faoa kehe a ia, kua nakai fekafekau a lautolu ke he fatapoa.
14 Ha ko e mena kua maliali mai kua tupu e Iki ha tautolu mai ia Iuta, ko e faoa haia nakai talahaua ai e Mose ha kupu ke he feua he tau ekepoa.
15 Kua au atu ai foki he maliali mai, kaeke kua fakatu mai e taha ekepoa tuga na Mekisateko,
16 Nakai ko e fakatufono he poakiaga fakalata ke he tino kua eke ai a ia, ka ko e mana he moui nakai tuai oti.
17 Ha kua talahau mai a ia, Ko e ekepoa a koe tukulagi ke he kainaga fakalataha mo Mekisateko.
18 Ha ko e mena ha i ai e utakeheaga he poaki fakamua, ha ko e hana lolelole mo e hana nakai aoga,
19 Ha ko e mena nakai fakakatoatoa ai he fakatufono ha mena taha, ha i ai foki e lafilafiaga he amaamanaki kua mua he mitaki ha ko e mena ia kua fakatata atu ai a tautolu ke he Atua.
20 Tuga ne mua foki a ia ne eke mo e omonuo;
21 (Ha ko e mena kua eke a lautolu mo tau ekepoa mo e nakai omonuo; ka ko ia kua eke mo e omonuo a ia ne talahau kia ia, Kua omonuo e Iki, ti nakai tokihala foki a ia, Ko e ekepoa a koe tukulagi ke he kainaga fakalataha mo Mekisateko;)
22 Kua pihia foki he eke a Iesu mo fakahoko ke he maveheaga kua mua he mitaki.
23 Na tokologa foki a lautolu kua eke mo tau ekepoa, he nakai maeke ke tumau a lautolu ha ko e mate;
24 Ka ko ia ni kua tumau tukulagi, ko e mena ia kua toka ai ia ia e feua he ekepoa kua tumau fakaoti.
25 Ko e mena foki ia kua maeke ai ia ia ke fakamomoui fakaoti a lautolu kua fakatata atu ke he Atua ha ko ia, ha kua moui fakaoti ni a ia ke ole ma lautolu.
26 Ha kua lata ma tautolu e ekepoa ne mua pihia, kua tapu, kua totonu, kua nakai fai mena kelea kua mamao mo e tau tagata hala, kua fakamatalahi ki luga he lagi.
27 Ko ia kua nakai lata ki ai ke he tau aho oti, tuga ne tau ekepoa ne mua, ke eke poa tamate, fakamua mo e tau hala hana, ka oti ti eke ai mo e tau hala he tau tagata; ha kua eke lagataha e ia e mena ia he eke e ia a ia mo poa.
28 Ha kua fakatu he fakatufono e tau tagata ha i ai e lolelole ke eke mo tau ekepoa ne mua; ka ko e kupu he omonuo kua fakamui ke he fakatufono, kua fakatu e ia e Tama kua fakakatoatoa ai tukulagi.