Heperu 8:1-13
8 KO e kakano hanai he tau mena kua talahaua ai nai, ha ia tautolu e ekepoa ne mua pehenai kua nofo a ia ke he fahi matau he nofoaiki hana ne mua ue atu ha he lagi,
2 Ko e fekafekau ke he tau mena tapu, mo e fale uta fano moli ne fakatu he Iki, ka e nakai ko e tagata.
3 Ha kua kotofa e tau ekepoa ne mua oti ke eke e tau poa mo e tau poa tamate; ko e mena ia kua lata ai foki ke toka ke he ekepoa ne mua nai taha mena ke eke mo poa,
4 Ha ko e mena ane mai ha he lalolagi a ia, po kua nakai eke a ia mo ekepoa, ha ko e ha i ai e tau ekepoa kua eke e tau poa kua lata mo e fakatufono,
5 Ko lautolu haia ko e tau fekafekau ke he mena fakafifitaki mo e ata he tau mena he lagi, tuga ne hataki he Atua kia Mose ke he vaha ko e eke ai ha ne fai e fale ie, ha ko e mena ne pehe mai a ia, A koe, neke nakai eke e tau mena oti kana tuga ne fakatai ne fakakite e au kia koe ke he mouga;
6 Ha ko ainei kua moua e ia e feua kua mua e mitaki, tuga ne mua e mitaki he maveheaga ne eke a ia mo hulalo ki ai, kua fakamau ai ke he tau mena talahaua kua mua he mitaki.
7 Ha ko e mena ane mai katoatoa e mitaki he maveheaga fakamua ia, po kua nakai taute e ia taha mena ke ua aki.
8 Ha ko e mena kua pehe a ia kia lautolu ke he hana hataki, Kua talahau ma e Iki, Kitiala, to hohoko mai e tau aho ke eke ai e au e maveheaga fou mo e faoa a Isaraela katoa mo e faoa a Iuta,
9 Nakai tuga e maveheaga ne eke e au mo e tau tupuna ha lautolu ke he aho ne toto ai e au e tau lima ha lautolu ke takitaki ai a lautolu mai he motu, ko Aikupito; ha kua pehe mai a Iki, Nakai tumau a lautolu ke he haku a maveheaga, ti tiaki ai e au a lautolu.
10 Ha ko e maveheaga hanai ke eke e au mo e faoa a Isaraela ka mole atu e tau aho ia, kua pihia mai e Iki, to tuku atu e au haku a tau fakatufono ke he tau manatu ha lautolu, mo e tohi ai ke he tau loto ha lautolu; to eke foki au mo Atua ha lautolu, to eke foki a lautolu mo motu haku.
11 Ti nakai fakaako atu a lautolu takitokotaha ke he tagata kua katofia mo ia, mo e takitokotaha ke he hana matakainaga, kua pehe age, Kia iloa e koe e Iki, ha ko e mena to iloa e lautolu oti kana ni au, ko e tau lalotagata ha lautolu katoa mo e tau iki ha lautolu;
12 Ha ko e mena to fakamagalo ni e au ha lautolu a tau mahani hepehepe, nakai tuai manatu foki e au ha lautolu a tau hala, mo e ha lautolu a tau holifono.
13 Ke he hana talahau mai, Ko e maveheaga fou, kua talahau e ia e maveheaga fakamua ko e mena tuai; hanai, ko e tau mena kua talahaua ai ko e mena tuai mo e tau mena kua talahaua ai kua tigahau, kua teitei mole atu e tau mena ia.