Hosea 12:1-14
12 KUA kai e Efaraimo e matagi, mo e tutuli e ia e matagi mai he fahi uta; kua fakalahi e ia e pikopiko mo e malaia ke he tau aho oti ni; kua eke foki e lautolu e maveheaga mo Asuria, mo e uta ai e puke lolo ki Aikupito.
2 Kua taufetoko a Iehova mo Iuta, to fakahala foki e ia a Iakopo ke lata mo e hana tau mahani; to taui atu kia ia ke lata mo e hana tau mena ne eke.
3 Ne toto ai e ia e muihui he hana matakainaga he ha i ai ke he manava; ko e hana malolo ne kautu ai a ia ke he Atua.
4 Ne taufagatua a ia mo e agelu, ti kautu ai a ia; ne tagi a ia mo e olelalo atu kia ia; ne moua e ia a ia i Peteli; ti vagahau mai a ia kia tautolu ke he mena ia;
5 Ko Iehova ko e Atua Sapaota; ko Iehova ko e hana higoa haia ke manatu ai a ia.
6 Hanai, kia liu mai ā ke he hau a Atua; kia eke a e mahani fakaalofa, mo e fakafiliaga, mo e tatali atu mau a koe ke he hau a Atua.
7 Ko e tagata fakafuakoloa a ia, ha he lima hana e tau fua tautau nakai tonu; kua fiafia a ia ke he favale.
8 Ne pehe foki a Efaraimo, Ko e moli, ko e maukoloa au, kua moua e au e tau koloa maku; nakai kitia e lautolu ha mahani kelea kia au, ko e mena ne hala ai au ke he haku a tau gahua oti.
9 Ka ko au ko Iehova hau a Atua tali he o mai he motu ko Aikupito, to fakanofo foki e au a koe ke he tau fale ie tuga he eke ke he tau aho he galue.
10 Ne vagahau atu e au ke he tau perofeta, ne fakaloga ai e au e tau fakakiteaga; ne taute atu ai foki e au e tau kupu fakatai ke he tau perofeta.
11 Kua mahani kelea kia a Kiliata? ko e pikopiko ni a lautolu; ne eke poa e lautolu ke he tau povi tane i Kilikala; ko e tau fakapoa foki ha lautolu kua tuga e tau tanakiaga maka ke he tau fakatapuke he fonua.
12 Ne hola a Iakopo ke he motu ko Suria; ne fekafekau a Isaraela ke moua ai hana hoana; ne leveki mamoe a ia ke moua ai hana hoana.
13 Ko e perofeta ne ta hake ai e Iehova a Isaraela i Aikupito; ko e perofeta ne leveki ai a ia.
14 Ne fakahogohogomanava lahi ni a Efaraimo kia ia, ko e mena ia ke toka ai hana toto ki luga hana; ko e hana ma foki to liuaki age he Iki hana kia ia.