Hosea 4:1-19
4 KO e fanau a Isaraela na e, kia fanogonogo mai a a mutolu ke he kupu a Iehova; ha kua fai taufetoko a Iehova mo lautolu kua nonofo ke he motu; ha kua nakai ha ha ia lautolu ha fakamoli, to nakai fai fakaalofa, to nakai ha i ai foki ke he motu, a lautolu kua iloa e Atua.
2 Kua omonuo a lautolu, mo e fakavai, mo e keli tagata, mo e kaiha, mo e faivao, kua favale ni a lautolu, kua fepikiaki e tau toto ne fakamaligi.
3 Ko e mena ia ke fakatutuku ai e motu, ti lolelole ai a lautolu oti kua nonofo ai; katoa mo e tau manu he vao, mo e tau manu lele he pulagi, to mole atu foki e tau ika he tahi.
4 Ka e aua neke ha i ai ha tagata ke taufetoko atu, mo e akonaki atu ke he taha tagata; ha ko e motu hau kua tuga a lautolu kua taufetoko mo e ekepoa.
5 To veli a koe ke he aho, to veli foki e perofeta fakalataha mo koe ke he po; to kelipopo foki e au hau a matua fifine.
6 Kua fakaoti haku a motu he nakai fai iloilo a lautolu, ko koe foki kua tiaki e iloilo, ko e mena ia kua tiaki ai e au a koe, nakai eke a koe mo ekepoa kia au; kua nimo ia koe e fakatufono he hau a Atua, ko au foki, to nimo ia au hau a fanau.
7 Tuga ne fakatokologa ai a lautolu, kua pihia he hala a lautolu kia au; to liliu e au e lilifu ha lautolu, ke he ma.
8 Kua kai e lautolu e hala he haku motu, mo e manako a lautolu ke he mahani kelea ha lautolu.
9 To hoko ni ke fakataufata e motu mo e ekepoa; to taui atu foki e au kia lautolu ha lautolu a mahani, to taui atu foki e au kia lautolu ha lautolu a tau mena ne eke.
10 Ha ko e mena to kai a lautolu ka e nakai makona a lautolu, to feuaki a lautolu, ka e nakai fakatokologa a lautolu; ha kua nakai tuai omaoma a lautolu kia Iehova.
11 Ko e feuaki, mo e uaina, mo e uaina fou kua uta kehe ai e loto.
12 Kua kumi he motu haku ke he tau akau ha lautolu; kua fakakite mai ai ha lautolu a tau tokotoko kia lautolu; ha ko e loto ke he feuaki kua fakahehe ai a lautolu, mo e o kehe a lautolu mo e Atua ha lautolu ke feuaki ai.
13 Kua ekepoa a lautolu ke he tau tapunu mouga, mo e huhunu mena manogi e lautolu ki luga he tau matiketike, mo lalo hifo he tau aluna, mo e tau lipeno, mo e tau tapeneto, ha kua malu mitaki e tau akau ia; ko e mena ia kua feuaki ai ha mutolu a tau tama fifine, mo e faivao ai e tau hoana ha mutolu.
14 To nakai fakahala e au ha mutolu a tau tama fifine ka feuaki a lautolu, mo e tau hoana ha mutolu ka faivao a lautolu; ha ko lautolu kua o kehe ni a lautolu mo e tau fifine feuaki, kua eke poa ai a lautolu fakalataha mo e tau fifine fakataka; ko e motu foki kua nakai manamanatu to veveli a lautolu.
15 Isaraela na e, pete he feuaki a koe, ka e aua neke hala a Iuta; aua neke o age a mutolu ki Kilikala, ti ua o hake a mutolu ki Petavene, ti aua neke omonuo a mutolu, Kua moui a Iehova.
16 Ha ko e mena tuga he matauka he punua povi fifine; kua matauka pihia a Isaraela; ka ko ainei to fagai e Iehova a lautolu tuga ne punua mamoe ke he mena pulahi.
17 Kua pipiki a Efaraimo ke he tau tupua; kia toka ai a ia.
18 Kua oti tuai ha lautolu a inuaga kava, kua feuaki lahi ni a lautolu; kua loto ni e tau iki ha lautolu ke he tau mena ke ma ai.
19 Kua moua he matagi a ia ke he hana tau tapakau, to ma foki a lautolu ha ko e tau poa ha lautolu.