Hosea 9:1-17
9 ISARAELA na e aua neke fiafia a koe mo e olioli tuga ne tau motu; ha kua fano kehe a koe mo e hau a Atua ke feuaki ai; kua fia eke taui a koe ke he tau mena oti ne taholi ai e saito.
2 Nakai fagai ai a lautolu ke he mena taholi saito mo e holiaga vine, to hogeia ai e uaina fou.
3 Nakai nonofo a lautolu ke he motu a Iehova, ka e liu atu a Efaraimo ki Aikupito, to kai e lautolu e tau mena kelea i Asuria.
4 Nakai liligi atu e lautolu e tau poa uaina kia Iehova, ti nakai fiafia a ia kia lautolu; ko e tau mena kai ha lautolu to eke ia kia lautolu ke tuga ne tau mena kai he tau tagata kua tagi; to kelea ai a lautolu oti ka kai ai; ha ko e tau mena kai ha lautolu kua eke ma lautolu ni nakai hohoko atu ai ke he fale a Iehova.
5 Ko e heigoa kia e mena ke eke e mutolu ke he aho ka eke ai e fakapotopotoaga tapu, mo e aho ke eke ai e galue kia Iehova.
6 Ha ko e mena, kitiala, kua o a lautolu neke malaia; to fakapotopoto e Aikupito a lautolu, to tanu e Mafi a lautolu; ko e tau mena fulufuluola ha ha i ai e tau ario ha lautolu to vao a ia ke he tau lakau magiho; to ha i ai ke he tau fale ie ha lautolu e tau akau talatala.
7 Kua hoko mai e vaha ke ahi mai ai, kua hoko mai e vaha ke taui ai; to iloa e Isaraela; kua goagoa e perofeta, kua heketia e tagata ha i ai e agaga, ha ko e lahi he hau a mahani kelea, mo e fakavihia lahi.
8 Ne eke a Efaraimo mo tagata toko fakalataha mo e haku Atua, ka ko e perofeta ha ha i ai ke he hana tau puhala oti e hele he tagata hele manu, mo e fakavihia ke he fale he hana Atua.
9 Kua mahani kelea lahi a lautolu, tuga he eke ke he vaha ia Kipeā; to manatu ai e ia ha lautolu a mahani kelea, to taui atu e ia e tau hala ha lautolu.
10 Ne moua e au a Isaraela tuga ne tau fuhi fua vine ke he tutakale; ne kitia e au e tau matua ha mutolu tuga ne tau fua mati uluaki he mati he kamata ai ke fua; ka e o age a lautolu ki Paalapeoro, ne vevehe atu a lautolu ke he tau mena ke ma ai; kua vihiatia a lautolu ke lata mo e mena ne manako ki ai a lautolu.
11 Ko Efaraimo to lele kehe ha lautolu a lilifu tuga ne manu lele, nakai fai fanauaga, to nakai fai tama foki taha, mo e nakai kamata ke fakatoka tama.
12 Pete he leveki e lautolu ha lautolu a fanau, to uta kehe e au a lautolu, ke nakai toe ha tagata; oi te fakaalofa kia lautolu ka fano kehe au ia lautolu.
13 Kua to a Efaraimo ke he mena fulufuluola, tuga he kitia e au a Turo; ka to takitaki atu e Efaraimo hana fanau ke keli tagata.
14 Iehova na e kia foaki age e koe kia lautolu, ko e heigoa e mena ke ta age e koe kia lautolu? Kia ta age e koe kia lautolu e manava kua fanau maua, mo e tau huhu nakai huhua.
15 Ha ha i Kilikala e mahani kelea oti ha lautolu; he fakavihia e au a lautolu ke he mena ia; to vega e au a lautolu he fale haku ha ko e tau mena kelea kua eke e lautolu; nakai fakaalofa atu foki au kia lautolu, kua fakafualoto e tau iki oti ha lautolu.
16 Kua ta a Efaraimo, kua magomago ha lautolu a tau vaka; nakai ni fua mai ia lautolu e tau fua; kaeke foki ke fanau e lautolu to tamate e au e fanau fakahele ha lautolu.
17 To tiaki he Atua haku a lautolu, he nakai fanogonogo a lautolu kia ia; ti eke a lautolu mo tau tagata neva ke he tau motu kehe.