Iakopo 1:1-27
1 KO au ko Iakopo, ko e fekafekau he Atua mo e Iki ko Iesu Keriso, kua fakaalofa atu au ke he tau faoa ne hogofulu ma ua kua paea fano.
2 Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe;
3 He iloa e mutolu ko e kamatamata he tua ha mutolu, kua tupu mai ai e fakauka.
4 Ka kia toka e fakauka ke eke hana gahua katoatoa, kia katoatoa ai mo e fakamaopoopo ai a mutolu, kia nakai toe ha mena kua nakai moua.
5 Kaeke ha ha ia mutolu taha kua nakai fai iloilo, kia ole atu a ia ke he Atua; ko ia kua foaki mai mo e totonu ke he tau tagata oti mo e nakai tauage; ti foaki mai ai kia ia.
6 Ka kia ole atu a ia mo e tua, aua neke mahalohalo ha ko ia kua mahalohalo kua lata a ia mo e peau he tahi kua fafati mai he matagi mo e fepokaki.
7 Aua neke manatu e tagata ia ke moua e ia ha mena mai he Iki;
8 Ko e tagata loto fakauaua a ia, kua hikihikifano ke he hana tau mahani oti.
9 Kia hula e matakainaga nofogati ha kua fakamatalahi a ia.
10 Ka ko e maukoloa kia hula a ia ha kua fakatokolalo a ia; ha ko e mena mole atu a ia tuga e fiti he vao;
11 Ha ko e mena ka hake e la mo e vevela, ti fifigo ai e tau vao, ti mokulu foki hana a fiti, kua maona foki hana fulufuluola; to mole atu pihia foki e tagata maukoloa ke he hana tau mahani.
12 Uhoaki e tagata kua fakauka ke he kamatamata; ha ko e mena ka oti e kamatamata, ti moua ai e ia e foufou he moui, kua talahau mai ai he Iki ke foaki e ia kia lautolu kua fakaalofa kia ia.
13 Aua neke pehe mai taha ka kamatamata a ia; Kua kamatamata au mai he Atua; ha ko e mena nakai kamatamata ai e Atua ke he mena kelea, nakai kamatamata foki e ia ke he taha;
14 Ka e takitokotaha mo e kamatamata a ia ka toho mo e hele a ia he hana tau manako lahi;
15 Ka fatu e manako lahi ti fanau mai ai e ia, ko e hala; ka motua foki e hala ti fanau mai ai, ko e mate.
16 Ko e haku a tau matakainaga fakahelehele na e, aua neke hehe a mutolu;
17 Ko e tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki, mai luga e tau mena ia, kua hifo mai mai he Matua he maama, ko ia nakai ha i ai ha mena hikihikifano, po ke mafoki fakatote;
18 Ko e hana finagalo ne fanau ai a tautolu ke he kupu moli, kia eke a tautolu mo tau fua uluaki he tau mena ne eke e ia.
19 Hanai, ko e haku a tau matakainaga fakahelehele na e, kia takitokotaha e tau tagata mo e alumaki ke fanogonogo, kia fakatuai ke vagahau atu, kia fakatuai ke he ita.
20 Ha ko e mena nakai tupu e tututonu mai he Atua mai he ita he tau tagata.
21 Ko e mena ia kia tiaki ai e tau mena oti kua pilo, mo e tau mena kua puke he kelea, ka kia talia mo e mahani molu e kupu ne to, kua maeke ke fakamomoui ha mutolu a tau agaga.
22 Kia eke a mutolu mo tau tagata omaoma ke he kupu, ka e aua neke fanogonogo hokoia ki ai, ke fakahehe ai e mutolu a mutolu.
23 Ka fanogonogo taha ke he kupu ka e nakai oma ki ai, kua lata e tagata ia mo e tagata kua kitekite ke he hana mata ni ke he fakaata,
24 Ha ko e mena kua kitekite atu a ia kia ia, ti fano kehe ai mo e nimo agataha ia ia po ke fefe e mata hana;
25 Ka ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, kua nakai fanogonogo fakanimonimo e tagata ia, ka kua eke e ia e gahua, to monuina e ia ke he hana omaoma.
26 Kaeke ha ha ia mutolu taha kua manatu hifo ko ia ko e tagata oma ke he Atua, ka e nakai taofi hana alelo, ka e fakahehe e ia hana loto, kua nakai aoga hana a oma ke he Atua.
27 Ko e hanai e oma ke he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea, kia leveki foki e ia a ia neke ilaila a ia he lalolagi.