Iakopo 2:1-26
2 HAKU a tau matakainaga na e, aua neke taofi e kupu ke he tua ke he Iki lilifu ha tautolu ko Iesu Keriso, mo e fakamailoga tagata.
2 Ha ko e mena ka hu mai e tagata ke he fakapotopotoaga ha mutolu, mo e tau mama auro ha he tau mata lima, mo e tapulu uho; ti hu mai foki e tagata nofogati mo e tapulu kelea,
3 Ti hagao atu ai a mutolu kia ia kua tapulu he tapulu uho, mo e pehe atu kia ia, Kia nofo a koe hinei ke he mena mitaki; ka e pehe atu ke he tagata nofogati, Kia tu a koe i kunā, po ke nofo a koe hinei ki lalo he fakatuagahui haku;
4 Kua nakai kia fakamailoga e mutolu kia mutolu, mo e eke a mutolu mo tau fakafili kua kelea e tau manatu?
5 Haku a tau matakainaga fakahelehele na e, fanogonogo mai ā; kua nakai kia fifili he Atua a lautolu kua nonofogati ke he lalolagi nai, ko e tau maukoloa ke he tua, ko lautolu ke eke ma lautolu e kautu kua talahaua mai e ia kia lautolu kua fakaalofa kia ia?
6 Ka ko mutolu, kua fakateaga a mutolu ke he tagata nofogati. Nakai kia favale mai e tau maukoloa kia mutolu, ti nakai kia ko lautolu ne toho a mutolu ke he tau fakafiliaga?
7 Ti nakai kia ko lautolu kua vagahau kelea ke he higoa mitaki kua fakahigoa aki a mutolu?
8 Kaeke foki ke omaoma fakaoti a mutolu ke he fakatufono kua mua ue atu, ke lata mo e Tohi, Kia fakaalofa atu a koe ke he tagata kua katofia mo koe, tuga hau a fakaalofa kia koe ni, ti mahani mitaki ni a mutolu;
9 Kaeke kua fakamailoga tagata e mutolu, kua hala tuai a mutolu, kua fakailoa ai he fakatufono a mutolu ko e tau holifono;
10 Ha ko ia kua omaoma ke he tau fakatufono oti, ka e taha e mena kua hala ai, kua lata ke fakahala a ia he tau fakatufono oti.
11 Ha ko ia kua pehe mai, Aua neke faivao, kua pehe mai foki a ia, Aua neke keli tagata; kaeke kua nakai faivao a koe, ka kua keli tagata, kua eke tuai a koe mo holifono.
12 Kia pehe ha mutolu a vagahau atu, kia pehe foki ha mutolu a mahani, tuga na lautolu ko e fakafili ne fai he fakatufono he tokanoaaga.
13 Ha ko ia nakai fakaalofa atu, nakai ofania a ia ke he fakafiliaga; ka ko e fakaalofa, kua olioli a ia ke he fakafiliaga.
14 Haku a tau matakainaga na e, kua aoga ha ha ka talahau mai taha kua tua a ia, ka e nakai ha ia ia e tau gahua? kua maeke kia ke he tua ke fakamoui a ia?
15 Kaeke kua nakai fai tapulu ha matakainaga po ke mahakitaga, kua nakai fai mena ke kai ke he taha aho mo e taha aho,
16 Ti pehe atu ai taha ia mutolu kia lautolu, Kia o atu a mo e monuina, kia mafanatia, mo e makona, ka e nakai age ki ai ha mena kua lata mo e tino, kua aoga ha ha e mena ia?
17 Ti pihia foki e tua, kaeke ke nakai ha i ai e tau gahua, ti mate ni a ia ha ko e tokotaha ni.
18 Ka pehe mai taha, Ha ia koe e tua, ka e ha ia au e tau gahua; hanai, kia fakakite mai kia au hau a tua ka e nakai ha i ai e tau gahua, ti fakakite atu foki e au haku a tua ke he haku a tau gahua.
19 Kua talia e koe kua tokotaha maka ni e Atua; kua mitaki ia; kua talia foki he tau temoni mo e vivivivi a lautolu.
20 Ko e tagata goagoa na e, nakai kia fia iloa e koe, kua mate ni e tua ka nakai fai gahua?
21 Nakai kia talahaua tututonu e matua ha tautolu ko Aperahamo ha ko e tau gahua he tuku atu e ia hana tama ko Isaako ki luga he fatapoa?
22 Nakai kia kitia e koe, ne gahua fakalataha hana tua mo e hana tau gahua, ko e tau gahua foki kua fakakatoatoa ai e tua?
23 Ti fakamoli ai foki e Tohi, kua pehe mai, Ne tua Aperahamo ke he Atua, ti talahaua ia kia ia mo tututonu, ti talahaua foki a ia, ko e kapitiga he Atua.
24 Hanai, kua kitia ai e mutolu kua talahaua tututonu e tagata ha ko e tau gahua, ka e nakai ko e tua hokoia.
25 Kua pihia foki a Raava ko e fifine fakataka, kua nakai kia talahaua tututonu a ia ha ko e tau gahua, he talia e ia e tau fekau mo e fakafano kehe a laua ke he taha hala?
26 Ha ko e mena tuga e tino kua mate ia ka noa mo e agaga, ti pihia foki e tua kua mate ia kaeke kua noa mo e tau gahua.