Iakopo 5:1-20
5 KITIALA, ko mutolu na ko e tau maukoloa, kia tagi mo e tagi tautau a mutolu ha ko e tau matematekelea ke hohoko mai kia mutolu.
2 Kua popo tuai ha mutolu a tau koloa, kua kai moko e tau tapulu ha mutolu.
3 Kua lama uli ha mutolu a auro mo e ario, to eke foki mo talahau kia mutolu ha lautolu a lama uli, ti kai foki e tau tino ha mutolu tuga e afi; kua tatanaki e mutolu e tau mena ke he tau aho ke fakahiku ai.
4 Kitiala, ko e totogi he tau tagata ne fakapotopoto e tau fua he tau kaina ha mutolu kua taofi ai e mutolu, kua kalaga ia; ko e kalaga foki ha lautolu ne helehele e tau saito kua hohoko ia ke he na teliga he Iki a Sapaota.
5 Kua nonofo a mutolu ke he motu mo e mitaki hololoa, mo e hula a mutolu ke he tau mena he tino; kua fagai e mutolu a mutolu tuga e tau manu mo e aho ke tamate ai.
6 Ne fakahala e mutolu mo e tamate e tagata tututonu, kua nakai totoko atu a ia kia mutolu.
7 Hanai, ko e tau matakainaga na e, kia fakauka a mutolu ato hohoko ke he haele mai he Iki; kitiala, kua tatali atu e tagata gahua fonua ke he tau fua mitaki he kelekele, mo e fakauka ki ai, ato moua e ia e uha fakamua mo e fakamui.
8 Kia fakauka foki a mutolu, kia fakamau ha mutolu a tau loto, ha kua tata e vaha ke haele mai ai e Iki.
9 Ko e tau matakainaga na e, aua neke felomaaki neke fakahala a mutolu; kitiala, ko e fakafili ha ne tu mai ki mua he gutuhala.
10 Haku a tau matakainaga na e, kia fifitaki a mutolu e fakamalolo ke he tau mena matematekelea, katoa mo e fakauka he tau perofeta ne vagahau mai ke he higoa he Iki.
11 Kitiala, kua talahau e tautolu kua monuina a lautolu kua fakauka; kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki, kua fakaalofa fakalahi mai e lki mo e hofihofi noa.
12 Haku a tau matakainaga na e, kua mua hanai ke he tau mena oti, aua neke omonuo a mutolu ke he lagi, po ke lalolagi, po ke taha mena ke omonuo ki ai; ka kia talahaua ha mutolu a ē, ē, mo e ha mutolu a nakai, nakai, neke fakahala a mutolu.
13 Kua matematekelea kia taha ia mutolu? Kia liogi a ia. Kua fiafia kia taha ia mutolu? Kia lologo a ia.
14 Kua gagao kia taha ia mutolu? Kia ui atu a ia ke he tau patu he ekalesia, kia liogi a lautolu mo ia, mo e fakatākai a ia ke he magalolo ke he higoa he Iki.
15 To fakamoui e tagata gagao ke he liogi kua eke mo e tua, to fakatu foki he Iki a ia; kaeke foki kua hala a ia, to fakamagalo ai.
16 Kia fefakakiteaki ha mutolu a tau holifono, mo e liogi ko e taha ma taha, kia fakamalolo ai a mutolu. Kua aoga lahi e liogi fakamakamaka he tagata tututonu.
17 Ko Elia, ko e tagata haia tuga na tautolu, ne liogi fakalahi a ia aua neke to e uha, ti nakai to ai e uha ke he kelekele ke he tolu a tau mo e ono a mahina.
18 To liu foki liogi a ia, ti to hifo ai e uha mai he lagi, ti fua mai e kelekele hana tau fua.
19 Ko e tau matakainaga na e, kaeke ke hehe taha ia mutolu mai he kupu moli, ti liuaki mai e taha a ia,
20 Kia iloa e ia, ko ia kua liuaki mai e tagata hala he puhala hehe hana, kua fakamoui e ia e agaga mai he mate, mo e ufiufi e tau hala loga.