Ieremia 10:1-25
10 KO e magafaoa a Isaraela na e, kia fanogonogo mai ā mutolu ke he kupu kua vagahau mai a Iehova kia mutolu;
2 Kua vagahau mai pehe a Iehova, Aua neke ako e mutolu e mahani he tau motu kehe, ti ua matakutaku a mutolu ke he tau fakamailoga he lagi; ha kua matakutaku ai e tau motu kehe he tau mena ia.
3 Ha ko e mahani fakateaga e mahani he tau motu kehe; ha kua ta he tagata e akau he vao, ko e gahua he tau lima he tufuga kua eke aki he toki.
4 Kua fakafulufuluola ai e lautolu ke he ario mo e auro, mo e fakamau ai e lautolu ke he tau fao mo e tau hamala, kia nakai maueue a ia.
5 Kua tuga e pama kua ta fakapolopolo e tau mena ia; ti nakai vagahau a lautolu; ti uta a lautolu, he nakai maeke kia lautolu ke o. Aua neke matakutaku a mutolu kia lautolu; he nakai maeke kia lautolu ke eke fakakelea mai, ti nakai maeke foki kia lautolu ke eke e tau mena mitaki.
6 Nakai ni ha i ai taha ke tatai mo koe, Iehova na e; kua mua ue atu a koe, mo e hāu a higoa kua mua ue atu ia he malolo.
7 Ko hai ke nakai matakutaku kia koe ko e Patuiki he tau motu? Ha kua lata ia kia koe; ha kua nakai ha i ai taha ke tatai mo koe ke he tau tagata iloilo oti he tau motu, mo e tau kautu oti ha lautolu.
8 Ka kua goagoa a lautolu oti mo e nakai ni aoga; ko e mena kua fakaako atu ai he tau tupua, ko e potu gaafi haia.
9 Kua ta mai e lautolu i Tasisa e ario kua tuki fakalapalapa, mo e auro i Upasa, ko e gahua he tufuga, ko e gahua foki he tau lima he tufuga eke mena auro; ko e ie uli mo e kula uhi ke tapulu ai a lautolu, ko e gahua he tau tagata iloilo e tau mena oti ia.
10 Ka ko Iehova ko e Atua moli a ia, ko ia ni ko e Atua moui, mo e Patuiki tukulagi; ko e hana ita kua vivivivi ai e lalolagi, ti nakai maeke ke he tau motu ke fakauka ai ke he hana ita lahi.
11 Kia vagahau atu a mutolu ti pehe atu kia lautolu, Ko e tau atua kua nakai eke e lagi mo e lalolagi, to fakaoti a lautolu mai he lalolagi mo lalo foki he tau lagi na.
12 Ne eke ai e ia e lalolagi he hana malolo, ne fakatumau e ia e atu motu ke he hana iloilo, ne fofola foki e ia e lagi ke he hana pulotu.
13 Kua vagahau mai hana leo, ti ha i ai e go he tau vai ke he lagi; kua ta hake foki e ia e tau aolu mai he tau kala he lalolagi, kua eke e ia e tau uhila katoa mo e uha; kua ta mai e ia e matagi mai he hana tau fale koloa.
14 Kua takitaha e tagata mo e goagoa a lautolu oti, nakai fai iloilo a lautolu; kua takitaha foki e tufuga eke mena auro mo e fakama ai ha ko e hana tupua kua ta; ha ko e mena fakavai ha lautolu a tau tupua auro, nakai ha ha ia lautolu foki ha fafagu.
15 Ko e tau mena nakai aoga ia, ko e gahua ke va ki ai; to fakaoti a lautolu ke he vaha ke ahi atu ai a lautolu.
16 Nakai tuga e tau mena na e tufaaga a Iakopo; ha ko ia ni ne eke e tau mena oti; ko e magafaoa foki he hana tufaaga ko Isaraela haia; ko Iehova Sapaota ko e hana higoa haia.
17 Kia tanaki a hau a tau mena mai he motu ko koe na kua nofo ke he taue.
18 Ha kua vagahau mai pehe a Iehova, Kitiala, ko e vaha nai ke liti atu e au a lautolu kua nonofo ke he motu po ke maka kua liti aki he filo, mo e pa takai e au a lautolu kia moua a lautolu.
19 Oi te fakaalofa kia au ha ko e haku a kafokia; kua kelea lahi haku a kafokia; ko au foki, ne pehe age au, Ko e moli, ko e haku a matematekelea hanai, ka to fakauka ai ni au.
20 Kua malona haku a fale ie, kua motuhia haku a tau toua oti, kua o kehe haku a fanau ia au, ti kua nakai ha i ai foki a lautolu; ti nakai tuai fai tagata ke fakatu haku a fale ie, mo e ta hake ai haku a tau ie puipui.
21 Ha kua goagoa e tau leveki mamoe ti nakai kumi e lautolu a Iehova; ko e mena ia kua nakai pulotu ai a lautolu, ti fakamavehevehe ai ha lautolu a tau fuifui mamoe oti.
22 Ko e ogo kua tu, kitiala, kua hoko mai, mo e tomumu lahi mai he motu ke he fahi tokelau; to eke foki e tau maga a Iuta mo mena kua moumou, ko e mena ke ofaga ai e tau luko.
23 Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai.
24 Iehova na e, kia akonaki mai a koe kia au, ka kia eke ni mo e fakafiliaga; ka e aua neke eke e koe mo e ita, neke fakatokogahoa ai au.
25 Kia liligi atu hau a ita ki luga he tau motu kehe kua nakai iloa a koe, ki luga foki he tau magafaoa kua nakai ui atu ke he hau a higoa; ha kua kai e lautolu a Iakopo, kua kai e lautolu a ia, mo e fakaoti e lautolu a ia, mo e moumou e lautolu e mena ne nofo ai a ia.