Ieremia 11:1-23
11 KO e kupu ne hoko mai ia Iehova kia Ieremia, kua pehe mai,
2 Kia fanogonogo mai ā mutolu ke he tau kupu he maveheaga nai, ti vagahau atu ai e mutolu ke he tau tagata Iuta, mo lautolu ne nonofo i Ierusalema;
3 Mo e pehe atu a kia lautolu, Kua vagahau mai pehe a Iehova ko e Atua a Isaraela, Kia malaia e tagata kua nakai fanogonogo ke he tau kupu he maveheaga nai,
4 Ne poaki atu e au ke he tau matua ha mutolu ke he aho ne tamai e au a lautolu he motu ko Aikupito, mai he gutu umu ne tunu ai e lapatoa, kua pehe atu, Kia fanogonogo mai a ke he haku a leo, mo e eke e mutolu e tau mena ia, ke lata mo e tau mena oti ne poaki atu ai au kia mutolu; ti eke ai a mutolu mo motu haku, ti eke foki au mo Atua ha mutolu;
5 Kia fakamoli e au e omonuo ne omonuo ai au ke he tau matua ha mutolu, ke foaki atu e au kia lautolu e motu kua tafe ai e puke huhu mo e meli, ke tuga ne eke ai ke he aho nai. Ti tali atu au, kua pehe atu, Amene, Iehova na e.
6 Ti pehe mai a Iehova kia au, Kia fakamatala atu e koe e tau kupu oti nai ke he tau maga a Iuta mo e tau puhala i Ierusalema, kia pehe atu, Kia fanogonogo mai a ke he tau kupu he maveheaga nai, mo e eke ai e mutolu.
7 Ha ko e mena tala age fakalahi e au ke he tau matua ha mutolu ke he aho ne ta hake ai e au a lautolu mai he motu ko Aikupito, ke hoko ni ke he aho nai, ne uhu matike au mo e tala age kia lautolu, kua pehe age, Kia fanogonogo mai ā mutolu ke he haku a leo.
8 Ka e nakai fanogonogo mai a lautolu, ti nakai haga mai e lautolu e tau teliga ha lautolu, ka e takitaha a lautolu mo e fano ke lata mo e mao he ha lautolu a tau loto kelea; ko e mena ia kua fakahoko ai e au ki luga ha lautolu e tau kupu oti he maveheaga nai ne poaki atu e au kia lautolu ke eke; ka e nakai eke e lautolu.
9 Ti pehe mai a Iehova kia au, Kua kitia ai e fakafualoto ke he tau tagata Iuta, mo lautolu kua nonofo i Ierusalema.
10 Kua liliu atu a lautolu ke he mahani kelea he tau matua ha lautolu ne aho mua, ko lautolu nakai mafai ke fanogonogo ke he haku a tau kupu; mo e mumui atu a lautolu ke he tau atua kehe ke fekafekau kia lautolu; kua holi he magafaoa a Isaraela mo e magafaoa a Iuta haku a maveheaga ne eke e au mo e tau matua ha lautolu.
11 Ko e mena ia, kua vagahau mai pehe a Iehova, Kitiala to fakahoko atu e au e malaia kia lautolu, kua nakai maeke ke hao ai a lautolu; ti tagi mai ai a lautolu kia au, ka e nakai fanogonogo atu au kia lautolu.
12 Ti o ai e tau maga a Iuta mo lautolu ne nonofo i Ierusalema, mo e tagi a lautolu ke he tau atua ne huhunu mena manogi ki ai e lautolu; ka e nakai fakamoui e lautolu a lautolu ke he vaha ke malaia ai a lautolu.
13 Ha kua tatai e tau maga hau ka totou mo e hau a tau atua, Iuta na e; kua fakatu foki e mutolu e tau fatapoa ma e mena ke mā ai, ko e tau fatapoa ni ke huhunu ai e mena manogi kia Paala, ke tatai ka totou mo e tau puhala i Ierusalema.
14 Ko koe foki, aua neke liogi a koe ha ko e motu nai, ti ua tagi ai a koe, po ke eke ai e liogi ha ko lautolu; ha ko e mena nakai fanogonogo e au kia lautolu ke he vaha ke ui mai ai e lautolu ha ko e ha lautolu a malaia.
15 Ko e heigoa kia e mena kua eke haku a fakahele ke he haku a fale, ka kua eke ai e ia e tau mahani kelea loga? kua mole foki e tufaaga tapu ia koe; ka eke e koe e tau mena kelea ti fiafia ai a koe.
16 Ne fakahigoa e Iehova a koe, ko e olive tupuolamoui, kua fulufuluola, to mitaki hana tau fua; ko e tomumu lahi ni ne huhunu ai hana tau lau ke he afi, kua pakipaki hana tau la.
17 Ha ko Iehova Sapaota ne to a koe, kua talahau e ia e malaia ko e hoko ne fai kia koe, ha ko e mahani kelea he magafaoa a Isaraela mo e magafaoa a Iuta, ne eke e lautolu ke fakahogohogomanava mai kia au he huhunu ai e lautolu e tau mena manogi kia Paala.
18 Ne fakailoa mai e Iehova kia au ke iloa ai e au; ti fakakite mai e ia kia au ha lautolu a mahani.
19 Ka ko au kua tuga ne punua mamoe lalata kua takitaki ke tamate; ti nakai iloa e au kua manamanatu a lautolu ke he tau lagatau kelea kia au, kua pehe, Kia fakaoti e tautolu e akau mo e hana tau fua, mo e helehele kehe e tautolu a ia mai he motu he tau tagata momoui, ke aua neke manatu ai foki ke he hana higoa.
20 Ka ko koe, Iehova Sapaota na e, ko e fakafili tututonu, kua kamatamata ke he tau manatu mo e loto, kia kitia e au hau a lalago atu kia lautolu; ha kua fakakite atu e au haku a taufetoko kia koe.
21 Ko e mena ia kua vagahau mai ai e Iehova ke he tau tagata Anatota, ko lautolu ne kumi ke kelipopo a koe, kua pehe atu, Aua neke perofeta mai a koe ke he higoa a Iehova, neke mate a koe he tau lima ha mautolu.
22 Ko e mena ia kua vagahau mai pehe a Iehova Sapaota, Kitiala, to taui atu e au a lautolu; to mamate e tau fuata ke he pelu; to mamate foki e tau tama tane mo e tau tama fifine he hoge.
23 To nakai ni toe a lautolu; ha ko e mena to fakahoko atu e au e malaia ke he tau tagata Anatota, ke he tau ni ke taui ai a lautolu.