Ieremia 17:1-27
17 KUA tohi e hala a Iuta ke he peni lapatoa mo e mata he samira; kua hihika ke he tau lapatohi he tau loto ha lautolu, mo e tau hoe he tau fatapoa ha mutolu;
2 Ka kua manatu ai he fanau ha lautolu e tau fatapoa ha lautolu, mo e ha lautolu a tau tupua Asaira ke he tau akau lau uhiuhi ki luga he tau mouga tokoluga.
3 Haku a tau mouga na e ha ha he vao, to ta age e au hau a tau mena mo e hau a tau koloa oti ke eke mo mena kua fofo he tau, katoa mo e hau a tau mena tokoluga ha ko e hau a tau hala ke he hau a motu oti.
4 Ko koe foki, to toka e koe e tufaaga hau ne foaki atu ai e au kia koe; ti tuku atu e au a koe ke fekafekau kia lautolu kua fai fi kia koe ke he motu nakai iloa e koe; ha kua tafu e mutolu e afi ke he haku a ita ti kaka ai tukulagi.
5 Kua pehe mai e vagahau a Iehova, Kia malaia e tagata kua tua ke he tagata, mo e eke e tau tagata mo tau lima hana, mo e fano kehe ai hana loto ia Iehova.
6 To eke a ia ke tuga ne tagata nofogati ke he vao talue, ti nakai kitia e ia ka hohoko mai ai e tau mena mitaki; to nofo ai a ia ke he tau mena malamalaega ke he tutakale, ko e motu nakai fai vai mo e nakai nofo ai taha.
7 Uhoaki e tagata kua tua kia Iehova, ko ia kua eke a Iehova mo amaamanakiaga hana.
8 Ka kua lata a ia mo e akau kua to ke he tapa vai, kua totolo hana tau vaka ke he kauvai he vailele, nakai kitia foki e ia ka hoko mai e vevela, ka e lau uhiuhi hana tau lau; nakai fakaatukehe a ia ke he vaha la, to fua mai agaia ni hana tau fua.
9 Kua mua ke he tau mena oti e loto he fakavai, ti gagao lahi ni a ia; po ke maeke kia hai ke iloa a ia?
10 Ko au ko Iehova kua kumikumi ke he loto, kua kamatamata e au e tau manatu, kia ta atu e au ke he tau tagata takitokotaha ke lata mo e hana mahani, ke lata foki mo e tau fua he tau mena ne eke e ia.
11 Kua fakapulupulu e korē e tau fufua nakai fakato e ia, kua pihia a ia kua moua e koloa ka e nakai moua ai he mahani tututonu, to toka e ia hana tau koloa ke he lotoga he hana tau aho, ka e eke a ia mo tagata goagoa ke he hana fakahikuaga.
12 Ko e mena ne tu ai ha tautolu a faituga, ko e nofoaiki lilifu haia, kua tokoluga tali mai he kamataaga.
13 Iehova na e, ko e amaamanakiaga a Isaraela, to mā a lautolu oti kua tiaki a koe; ko lautolu ne o kehe ia au to tohia a lautolu ke he kelekele, ha kua tiaki e lautolu a Iehova ko e vaipuna he moui.
14 Iehova na e, kia fakamalolo e koe au ti malolo ai au, kia fakamoui e koe au ti moui ai au; ha ko koe kua fakaheke au ki ai.
15 Kitiala, kua pehe mai a lautolu kia au, Ko fe kia e kupu a Iehova? Kia hoko mai ni.
16 Ka ko au, nakai alumaki au ke ua eke au mo leveki mamoe ke mui atu kia koe; ti nakai manako au ke he aho ke matematekelea ai, kua iloa ni e koe; ko e mena ne fina atu ai he tau laugutu haku; kua ha ha i ai ki mua hau haia.
17 Aua neke eke a koe mo fakamatakutaku kia au; ko koe ko e haku a taue ke he aho kelea.
18 Kia fakamā a lautolu ne tutuli au, ka e aua neke mā ai au; kia matakutaku a lautolu ka e aua neke matakutaku au; kia fakahoko e koe kia lautolu e aho kelea, mo e fakaoti a lautolu ke he malaia fakalagaua.
19 Kua vagahau mai pehe a Iehova kia au, Fano a, ti tu a koe ke he gutuhala he tau tagata he motu, kua huhu mai ai e tau patuiki a Iuta mo e o atu ai a lautolu; kia tu foki a koe ke he tau gutuhala oti a Ierusalema;
20 Ti pehe atu a koe kia lautolu, Kia fanogonogo mai a mutolu ke he kupu a Iehova, ko mutolu ko e tau patuiki a Iuta, mo Iuta oti katoa mo mutolu oti kua nonofo i Ierusalema, kua huhu mai ai he tau gutuhala nai;
21 Kua vagahau mai pehe a Iehova, A mutolu kia mutolu, neke fua e mutolu ha kavega ke he aho sapati, aua neke tamai ai foki he tau gutuhala a Ierusalema;
22 Ti ua uta e mutolu ha kavega mai he tau fale ha mutolu ke he aho sapati, ti aua neke eke ai e mutolu ha gahua taha, ka kia fakatapu e mutolu e aho sapati, tuga ne poaki atu ai e au ke he tau matua ha mutolu.
23 Ka e nakai fanogonogo mai a lautolu, ti nakai haga mai ha lautolu a tau teliga, ka e fakamao e lautolu ha lautolu a tau ua, kia nakai fanogonogo mai a lautolu, mo e nakai talia e lautolu e akonakiaga.
24 Kua pehe mai a Iehova, Kaeke foki ke fanogonogo fakamitaki a mutolu kia au, mo e nakai tamai ai e mutolu ha kavega he tau gutuhala he maga nai ke he aho sapati, ka e fakatapu e mutolu e aho sapati, mo e nakai eke ai e mutolu ha gahua taha;
25 Ti huhu mai ai he tau gutuhala he maga nai e tau patuiki mo e tau iki kua nonofo ke he nofoaiki a Tavita, kua heke e tau kariota e tau solofanua, ko lautolu, mo e tau iki ha lautolu, ko e tau tagata Iuta mo lautolu ne nonofo i Ierusalema; to kakai tukulagi foki e motu nai.
26 To o mai a lautolu he tau maga i Iuta, mo e tau mena ne agaagai mai ki Ierusalema, mo e motu a Peniamina, mo e motu ke he kelekele tatai, mo e tau mouga, mo e fahi toga, ke tamai ai ha lautolu a tau poa huhunu, mo e tau poa, mo e tau poa mena kai, mo e tau pili lipano, ko lautolu foki ne ta mai e tau poa fakaheke ke he fale a Iehova.
27 Ka ko e mena kaeke ke nakai fanogonogo mai a mutolu kia au, ke fakatapu e aho sapati, ka kua fua ai e mutolu e tau kavega, mo e huhu mai a mutolu he tau gutuhala a Ierusalema ke he aho sapati; ti tafu ai e au e afi ke he hana tau gutuhala ti huhunu ai e tau fale iki i Ierusalema, ti nakai maeke ke tamate.