Ieremia 18:1-23
18 KO e kupu ne hoko mai kia Ieremia ia Iehova, kua pehe mai,
2 Kia matike a, mo e hifo a koe ke he fale he tagata eke kapiniu kelekele, ti fakailoa atu ai e au kia koe ke he mena ia haku a tau kupu.
3 Ti hifo ai au ke he fale he tagata eke kapiniu kelekele, kitiala, kua eke e ia hana gahua ki luga he tau mena tavili.
4 Kua maona e kapiniu ne eke ai e ia he kelekele ke he lima he tagata eke kapiniu kelekele; ti liu eke ai e ia taha kapiniu ke lata mo e manatu he tagata eke kapiniu kelekele.
5 Ti hoko mai ai e kupu a Iehova kua pehe mai,
6 Ko e magafaoa a Isaraela na e, nakai kia maeke ia au ke eke kia mutolu tuga ne tagata eke kapiniu kelekele na? Kua pihia mai a Iehova. Kitiala, ko e magafaoa a Isaraela na e, tuga ne kelekele ke he lima he tagata eke kapiniu kelekele, kua pihia foki a mutolu ke he haku a lima.
7 Ko e magaaho ke vagahau atu ai au ke he motu, po ke kautu, ke taaki ai, mo e ulu ki lalo, mo e fakaoti;
8 Kaeke ke liliu mai ai e motu ne vagahau atu e au ki ai, mai he tau mahani kelea ha lautolu, ti tokihala ai au he malaia ne manatu e au ke fakahoko ki ai.
9 Ko e magaaho foki ke vagahau atu ai au ke he motu, po ke kautu, ke ati hake ai mo e to;
10 Kaeke kua eke e lautolu e tau mena kelea ki mua haku, mo e nakai fanogonogo mai a lautolu ke he haku a leo, ti tokihala au he monuina ne pehe atu au ke fakamonuina atu ai a lautolu.
11 Hanai kia talahau atu a koe ke he tau tagata Iuta mo lautolu ne nonofo i Ierusalema, kia pehe atu, Kua vagahau mai pehe a Iehova, Kitiala, ko au nai, kua taute e au e kelea ke hoko kia mutolu, kua manamanatu foki e au ke he lagatau ke kelea ai a mutolu; hanai, kia liliu mai a mutolu, takitaha e tagata mai he mahani kelea, hana, mo e taute fakamitaki e mutolu ha mutolu a mahani, mo e ha mutolu a tau mena ne fa eke.
12 Ka kua pehe mai a lautolu, Nakai aoga; ha ko e mena mumui atu a mautolu ke he tau fatuakiloto ha mutolu, to takitaha foki mo e eke ke lata mo e mao he hana loto kelea.
13 Ko e mena ia kua vagahau mai pehe a Iehova, Kia huhu atu a mutolu ke he tau motu kehe, po ko hai kua logona e tau mena pehenai? kua eke he tamāfine tote a Isaraela e mena vihiatia lahi.
14 To fakahiku kia e kiona a Lepanona mai he maka tumau ke he vao? to mamiti kia e vai hahau kua tafe mai he mena mamao?
15 Ka kua nimo au he motu haku, kua huhunu mena manogi e lautolu ke he mena fakateaga, mo e fakatupetupe e lautolu a lautolu ke he tau puhala ha lautolu, ko e tau puhala tuai, kia o ai a lautolu ke he tau puhala loto, ko e tau puhala nakai tanu;
16 Kia eke ha lautolu a motu mo mena ke ofo ai, mo mena foki ke fakakatakatakē ai tukulagi; ko lautolu oti ne o age ai kua takitaha mo e ofo, mo e luelue ai hana ulu.
17 To fakamavehevehe e au a lautolu, tuga ne matagi mai he fahi uta ki mua ha lautolu kua fai fi kia lautolu; to haga atu e au haku tua kia lautolu, ka e nakai ko e mata haku ke he aho he ha lautolu a malaia.
18 Ti pehe age ai a lautolu, O mai a, kia manamanatu ā tautolu ke he tau lagatau ke kelea ai a Ieremia; ha ko e mena nakai fakaoti e fakatufono mai he ekepoa, po ke pulega mai he tagata iloilo, po ke kupu mai he perofeta. O mai a, kia ta e tautolu a ia ke he tau alelo ha tautolu; ti aua neke haga atu ha tautolu a tau teliga ke he taha kupu hana.
19 Iehova na e, kia haga mai a koe kia au, mo e fanogonogo a koe ke he leo ha lautolu ne fetoko mai kia au.
20 To taui kia e mitaki ke he kelea? ha kua keli e lautolu e luo ke mate ai au, Kia manatu e koe au ne tu ki mua hau ke vagahau atu ha ko lautolu ke monuina ai, kia liliu kehe hau a ita ia lautolu.
21 Ko e mena ia kia tulu atu ai ha lautolu a fanau ke he hoge, kia tuku atu foki a lautolu ke he malolo he pelu; ti eke ha lautolu a tau hoana mo tau fifine kua oti ha lautolu a tau tama he mamate, mo e tau takape; mo e tamate ai ha lautolu a tau tane, mo e kelipopo e tau fuata ha lautolu he pelu ke he tau.
22 Kia logona ai e tagi mai he tau fale ha lautolu, ka fakahoko fakalutukia mai e koe e kau kia lautolu; na kua keli e lautolu e luo ke moua ai au, mo e fufu e lautolu e matahele ma e haku a tau hui.
23 Ka ko koe, Iehova na e, kua iloa e koe ha lautolu a tau pulega oti kia au ke mate ai au; aua neke ufiufi ha lautolu a mahani kelea, ti aua neke holoholo, kehe ha lautolu a tau hala mai mua hau, ka kia fakatupetupe ai a lautolu ki mua hau; kia eke pihia kia lautolu ke he vaha he hau a ita.