Ieremia 19:1-15
19 KUA vagahau mai pehe a Iehova, Kia fano a koe, ti fakafua mai e koe e lupo kelekele he tagata eke kapiniu kelekele, ti o a mutolu mo e falu a patu he motu mo e falu a patu he tau ekepoa;
2 Ti o atu a ke he pahua he tama a Hinoma, ke he mena ne hu atu ai ke he gutuhala he tau tagata eke kapiniu kelekele, ti fakamatala e koe ke he mena ia e tau kupu ke vagahau atu ai e au kia koe.
3 Kia pehe atu a koe, Ko mutolu ko e tau patuiki a Iuta na e, mo mutolu kua nonofo i Ierusalema, kia fanogonogo mai ā mutolu ke he kupu a Iehova; kua pehe mai e vagahau a Iehova Sapaota, ko e Atua a Isaraela, Kitiala, to fakahoko mai e au e malaia ke he mena nai, ke takitaha a lautolu oti ne logona mo e go ai hana tau teliga.
4 Ha kua tiaki e lautolu au, kua liliu kehe foki e lautolu e mena nai, mo e huhunu mena manogi ai e lautolu ke he tau atua kehe nakai iloa e lautolu, po ke tau matua ha lautolu, po ke tau patuiki a Iuta; mo e fakapuke e lautolu e mena nai ke he toto he tau tagata nakai hala.
5 Kua ati e lautolu e tau mena tokoluga a Paala ke huhunu ai ha lautolu a fanau ke he afi ke eke mo tau poa huhunu kia Paala, ko e mena nakai poaki atu ai e au, ti nakai vagahau atu ai e au, ti nakai manatu ai e au.
6 Ko e mena ia kitiala, ko e hoko mai ne fai e tau aho, kua pehe mai a Iehova, ke nakai tuai ui e mena ia ko Tofeta, po ke pahua he tama a Hinoma, ka ko e pahua he keliaga tagata.
7 To eke e au mo mena nakai aoga e pule a Iuta mo Ierusalema ke he mena nai; ti tuku atu e au a lautolu ke keli ke he pelu ki mua ha lautolu kua fai fi kia lautolu, mo e tau lima ha lautolu kua kumi a lautolu ke tamate; ti ta atu ai e au e tau tino mamate ha lautolu ke eke mo tau mena kai he tau manu lele he pulagi mo e tau manu huifa he vao.
8 To eke foki e au e maga nai mo mena ke ofo ai, mo mena foki ke fakakatakatakē ai; ko lautolu oti ne o age ai, to takitaha a lautolu mo e ofo mo e fakakatakatakē ai ha ko e hana tau malaia oti.
9 To eke e au ke kai ai e lautolu e tau tino he tau tama tane ha lautolu, mo e tau tino he tau tama fifine ha lautolu, to takitaha a lautolu mo e kai e tino he taha, ha kua pa takai ai mo e mamahi, he fakamamahi ai a lautolu e lautolu kua fai fi mai, mo lautolu kua kumi a lautolu ke tamate.
10 Ti lipilipi ai e koe e lupo ki mua he tau tagata ne o mo koe,
11 Mo e pehe atu a koe kia lautolu, Kua vagahau mai pehe a Iehova Sapaota, To lipilipi pihia e au e motu nai mo e maga nai, tuga ne lipilipi ai he taha e kapiniu he tagata eke kapiniu kelekele, ti nakai maeke ke taute foki; to tanu foki a lautolu i Tofeta, ato nakai toe ha mena ke tanu tagata ai.
12 To eke pihia e au ke he motu nai, mo lautolu ne nonofo ai, kua pihia mai a Iehova, mo e eke e au e maga nai ke tuga a Tofeta;
13 To eke foki e tau fale i Ierusalema, mo e tau fale he tau patuiki a Iuta kua kelea, ke tuga ne mena kua ui ko Tofeta, ko e tau fale oti kua huhunu ai e lautolu ki luga he tau tua fale e tau mena manogi ke he kau oti he lagi, mo e liligi atu ai e tau poa inu ke he tau atua kehe.
14 Ti hau ai a Ieremia i Tofeta, ne fakafano atu e Iehova a ia ki ai ke perofeta ai, ti tu ai a ia ke he lotopa he fale a Iehova, mo e pehe atu a ia ke he motu oti.
15 Kua vagahau mai pehe a Iehova Sapaota ko e Atua a Isaraela, Kitiala, to fakahoko mai e au ke he maga nai, mo e hana tau maga oti e tau malaia oti, ne vagahau atu ai e au; ha kua fakamao e lautolu ha lautolu a tau ua, ke nakai fanogonogo mai ai a lautolu ke he haku a tau kupu.